Levítico 25:1-55
25 Sinaí jirkachömi Moisésta TAYTA DIOS kayno nirqan:
2 “Israel runakunata kayno niy: ‘TAYTA DIOS qoykushunaykipaq kaykaq nacionman chayarqa payta cäsukur chakrata jamatsipäkunki.
3 Soqta watami chakrakunata murupäkunki. Üva yörakunatapis soqta watalami rämapar wayuyninta palapäkunki.
4 Qanchis wata kaqchöqa TAYTA DIOSTA cäsukur chakrata jamatsipäkunki. Tsay wataqa ama imatapis murupäkunkitsu ni üva yöratapis rämapankitsu.
5 Shiwa winamuq trïgutapis ama shuntapäkunkitsu. Rämapäni üva wayushqantapis ama shuntapäkunkitsu. Tsay wataqa chakra jamakunqa.
6 Mana pirwaptikipis y mana churaptikipis shiwa winamuqkuna y rämapäni üvakunapis mikupäkunaykipaq aypanqa. Tsaynöpis aypanqami ashmayniki warmipis olqupis mikupäkunanpaq, minkaynikikuna mikupäkunanpaq y qamkunacho taq jäpa runakuna mikupäkunanpaq.
7 Uywaykikuna y jirka uywakuna mikunanpaqpis aypanqami.*
Jubileo wata imano kananpaq nishqan
8 “ ‘Yupapäkunki chusku chunka isqun (49) watata.
9 Tsay watakuna pasarkuptinmi qanchis kaq killa chunka junaqcho *cornëtata maytsaychöpis tukatsipäkunki. Tsay junaq kanqa Israel runakuna purificashqa kananpaq kaq junaqmi.*
10 Tsay junaqmi qalaykunqa *sagrädu *Jubileo wata. Jubileo wata kaptinmi lapanpis ashmay kashqanpita aylunman librina kutikärinqa. Pï runapis chakranta rantikushqa karqa chakranta shuntakunqanami. Tsayno kanqa cada pitsqa chunka (50) watacho.
11 “ ‘Tsay wataqa qamkunapaq Jubileo wata kaptin chakraykikunata ama murupäkunkitsu. Ni shiwa winamuq trïgutapis ama shuntapäkunkitsu. Rämapäni üva wayushqantapis ama shuntapäkunkitsu.
12 Tsay wataqa sagrädu kar qamkunapaq Jubileo watami kanqa. Mikuytapis mikupäkunki chakraykikunacho shiwa wayushqalanta y rämapäni üvakuna wayushqalanta.
13 “ ‘Tsay Jubileo watami rantikushqan chakrankunata lapanpis shuntakärinqa.
14 Tsayno kaptinqa manaraq Jubileo wata chayamuptin pipis chakrata rantir o rantikurqa aykacho rantikunanpaqpis shumaq yarpachakutsun. Paqta runa mayinta aläpa chanincho pipis rantikuykunman.
15 Jubileo watacho chakrata kutitsinanpaq ayka wata pishiykashqantapis yuparir rantiq runaqa preciunta päganqa. Rantikuq kaqpis preciunta churanqa ayka kuti chakrata murunanpaq kashqantapis yuparir.
16 Atska wata murunanpaq kaptinqa preciun mas chaninmi kanqa. Walka watala murunanpaq kaptinqa preciun mënusmi kanqa. Chakrataqa rantikunqa ayka wata murunanpaq kashqanpitami.
17 “ ‘TAYTA DIOSTA *mantsakur runa mayikita ama engañankitsu. Noqami qamkunapa TAYTA DIOSNIKI kaykä.
18 Leynïkunata cäsukur nishqäkunata cumplipäkunki. Cumplishpaykiqa nacionnikicho alimi kawapäkunkipaq.
19 Chakraykipis ali wayuptinmi saksaqpaq mikur jawkala kawapäkunkipaq.
20 “ ‘Qamkuna yarpachakur capazmi kayno ninkiman: “Qanchis kaq watacho mana mururqa y mikuyta mana shuntarqa ¿imataraq mikushun?”
21 Tsaypita ama yarpachakärinkitsu. Bendicionnïtami churamushaq soqta kaq watacho chakrayki ali wayunanpaq. Tsaymi cosechar tsaytsikata shuntankipaq kimsa wata cosechar shuntanaykipaq kaqtano.
22 Tsaymi soqta kaq watacho pirwashqayki aypanqa pusaq kaq watachöpis mikupäkunaykipaq. Tsaynölami murushqayki poqushqanyaq isqun kaq watacho mikupäkunaykipaqpis maran aypanqa’.
Rantikushqan chakranta y wayinta shuntakunanpaq nishqan
23 “Chakraqa noqapami kaykan. Qamkunaqa qorpanölami tarkaykanki. Tsaymi rantikushqayki chakraqa yupashqa watala rantiqpa makincho kanqa.
24 Rantishqayki chakrata rantikuyta munarqa punta kaq duëñunta munatsinki.
25 “Pipis pasaypa waktsa kar rantikushqan chakrata shuntayta mana kamäpakuptinqa legïtimu kaq aylun rantinqa.*
26 Chakranta rantinanpaq legïtimu aylun mana kaptinqa shuntakunanpaq punta kaq duëñunmi qellayta kamarinqa.
27 Nirkur rantikuyta munaq runata qellayninta kutitsinqa *Jubileo wataman chayananpaq ayka wata pishishqantapis cuentata jorqurir. Tsaynöpami chakranta shuntakunqa.
28 Chakranta shuntananpaq qellaynin mana aypaptinqa Jubileo wata chayamunanyaq rantiqpa makilancho kanqa. Tsay wata chayamuptinnami punta kaq duëñun shuntakunqa.
29 “Pipis murallashqa markacho wayinta rantikuykur shuntakuyta munarqa juk watalami tiempu kanqa shuntakunanpaq.
30 Watayaq wayinta mana shuntaptinqa rantiqpaq y paypita miraqkunapaqnami kanqa. Jubileo wata chayamuptinpis manami shuntanqanatsu.
31 Muralläni markakunacho kaq wayikunatami itsanqa chakrata shuntashqannöla Jubileo wata chayamuptin punta kaq duëñun shuntakunqa.
32 “*Levitakunaqa markancho rantikushqan wayinta imaypis shuntakunqa.
33 Shuntakuyta munaptinqa wayinta rantiq runa Jubileo wata chayamuptin kutitsinqa. Levitakunapa markancho wayilanmi herencian kaykan. Israel nacioncho paykunapaqqa manami mas ima herencianpis kantsu.
34 Levitakunapa markankunacho uysha mitsikunantaqa ama rantikunqatsu. Tsayqa paykunapami imaypis kanqa.
Waktsakunata yanapananpaq nishqan
35 “Mayqan Israel mayikipis pasaypa waktsayar manakushuptikiqa yanapanki. Jäpa runakunata ashmashqaykino paykunatapis ashmapäkunki.*
36 Imata rantikurpis aläpa chaninchöqa ama rantikunkitsu. Qellayta manarpis wawanta ama cobrapäkunkitsu. Tsaypa trukanqa *mantsakamar Israel mayikikunata yanapanki markaykicho jawka täkärinanpaq.
37 Yapaymi kayno nï: Qellayta manarqa wawanta ama cobrapäkunkitsu. Mikuyta rantikurpis aläpa chanintaqa ama cobrapäkunkitsu.*
38 Egiptupita jorqamuq TAYTA DIOSNIKIMI kaykä. Qamkunata jorqamushqä *Canaánta qoykunäpaq y Diosniki kanäpaqmi.
39 “Israel mayiki waktsayar ashmayniki kananpaq yaykamuptin ashmaytanöqa ama arutsipäkunkitsu.
40 Tsaypa trukanqa arupakuq runatanöla arutsipäkunki y qorpatanöla ali rikapäkunki. *Jubileo watayaqlami arupäshunkipaq.
41 Tsaypitaqa librina kar tsurinkunawan juntu chakranman y aylunkunaman kutikunqa.
42 Israel runakunaqa ashmaynïmi karkaykan. Noqata sirvimänanpaqmi Egiptupita jorqamushqä. Tsaymi Israel mayikikunata ashmay kananpaq ama rantikärinkitsu.
43 Tayta Diosniki kaykaptïqa mantsakamar Israel mayikita ama nakatsipäkunkitsu.
Ashmayniyuqkunapaq yätsikuy
44 “Warmipis o olqupis ashmayniki kananta munarqa nawpaykicho kaykaq nacionkunapita rantipäkunki.
45 Tsaynöpis ashmayniki kananpaq rantipäkunki qamkunacho taq jäpa runakunata y nacionnikicho yuriq tsurinkunata.
46 Wanushpaykiqa tsurikikunata sirvinanpaqpis kachapaykunki. Paykunami imaypis sirviqninkuna kanqa. Israel mayikitami itsanqa ama nakatsipäkunkitsu ni ashmaynikipaq ama tsararankitsu.*
47 “Qamkunacho taq jäpa runa rïcuyaptin y Israel mayiki waktsayar tsay rïcu runapa ashmaynin kananpaq rantikuptinqa
48 Israel mayikipa derëchun kaykanmi aylunkuna pägaykur jorqunanpaq. Tsayno jorqunqa wawqin,
49 tiyun, prïmun o mayqan legïtimu aylun karpis. Qellaynin kaptinqa kikin ashmaypis pägaykur libri yarqukunqa.
50 Libri kananpaq yarqukuyta munar patronninwan cuentata jorqunqa *Jubileo watapaq ayka wata pishiykashqantapis. Tsay pishiykaq watakunapita patronninta päganqa jornal ayka kashqantapis cuentata jorqurir.
51 Jubileo wata chayamunanpaq ayka wata pishishqanta cuentata jorqurir patronninta päganqa. Atska wataraq pishiptinqa mastami päganqa.
52 Mënus watalana pishiptinqa mënustami päganqa. Tsaynöpami mana arupashqan kaq watakunapita päganqa.
53 Patronqa tsay ashmayninta minkaytanöla mana nakatsiypa ali rikanqa.
54 “Ashmay kananpaq yaykuq runa patronninta imanöpapis pägayta mana kamäpakurqa shuyanqa Jubileo wata chayamunanyaq. Tsay wata chayamuptinnami mana pägaypa tsurinkunawan juntu libri yarqukunqa.
55 Manami pipapis ashmaynin kananpaqtsu Israel runakunata Egiptupita jorqamushqä, sinöqa noqata sirvimänanpaqmi. Noqaqa TAYTA DIOSNIKIMI kaykä.
Ichic wilacuycuna
^ 24.22 Núm. 15.16.
^ 25.1-7 Éxo. 23.10-11.
^ cornëta Cornëtaqa carnipa waqranpita rurashqami karqan. Cornëtata cüra tukashqanta rikanaykipaq rikanki Lev. 25.9 versïculucho kaykaq dibüjuta. Qellaypita rurashqa cornëtapis karqanmi (Núm. 10.1-10).
^ sagrädu Liyinki santupita tantiyatsikuyta.
^ Jubileo wata Jubileo wataqa cada pitsqa chunka (50) watachömi karqan. Tsay watachöqa rantikärishqan chakrakunata punta kaq duëñunkunami shuntaq. Waktsa kashpan ashmay kananpaq yaykuq runapis tsay wataqa librinami yarqukuq (Lev. 25.8-55).
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
^ Jubileo wata Jubileo wataqa cada pitsqa chunka (50) watachömi karqan. Tsay watachöqa rantikärishqan chakrakunata punta kaq duëñunkunami shuntaq. Waktsa kashpan ashmay kananpaq yaykuq runapis tsay wataqa librinami yarqukuq (Lev. 25.8-55).
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ 25.35 Deut. 15.7-8.
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
^ 25.37 Éxo. 22.25; Deut. 23.19-20.
^ Canaán Canaánchöqa atska markakunami karqan. Cada markachömi juk mandaq rey karqan. Tsaychömi tarqan ceneo runakuna, cenezeo runakuna, cadmoneo runakuna, heteo runakuna, ferezeo runakuna, refaíta runakuna, amorreo runakuna, cananeo runakuna, gergeseo runakuna y jebuseo runakunapis (Gén. 15.19-21). Abrahamtami Tayta Dios promitirqan paypita miraqkunata Canaánta qoykunanpaq (Gén. 17.8).
^ Jubileo wata Jubileo wataqa cada pitsqa chunka (50) watachömi karqan. Tsay watachöqa rantikärishqan chakrakunata punta kaq duëñunkunami shuntaq. Waktsa kashpan ashmay kananpaq yaykuq runapis tsay wataqa librinami yarqukuq (Lev. 25.8-55).
^ 25.39-46 Éxo. 21.2-6; Deut. 15.12-18.
