Levítico 4:1-35
4 Tsaypitanami Moisésta TAYTA DIOS kayno nirqan:
2 “Israel runakunata kayno niy: ‘Pipis mana musyayninpa TAYTA DIOS nishqankunata mana cumpliptinqa imata rurananpaqpis kanan yätsishayki.
3 “ ‘TAYTA DIOS nishqankunata mandaq cüra mana cumpliptinqa lapan Israel runakunapis jutsayuqmi kanqa. Tsaymi jutsayuq kashqanpita purificashqa kananpaq sänu turituta apamunqa.
4 Tsaytaqa Tinkuna Toldu patiumanmi chätsimunqa. Nirkur turitupa umanman makinta churaykur TAYTA DIOSPA nawpancho pishtanqa.
5 Tsawraqa mandaq cürana turitupa yawarninta walkalata Tinkuna Toldu rurinman apanqa.
6 Tsaychömi dëdunta yawarman jatirpur TAYTA DIOSPA nawpancho Lugar Santïsimuta tsaparaq cortïnata qanchis kuti tsaqtsupanqa.
7 Tsaynöpis inciensuwan qoshtatsikuna *altarpa waqranta yawarwan lushinqa. Tinkuna Toldu patiuman yarqurirnami putsuq yawarta talinqa sacrificiuta rupatsina altar chakinman.
8 “ ‘Nirkurmi pishtashqan turitupa pacha wiranta,
9 ishkan rurunninkunata wirantinta, washancho kaykaq wiranta y natinnincho kaykaq wiranta jorqunqa.
10 Jawka kawakuy sacrificiuta rupatsinanpaq jorqushqannölami wiranta jorqunqa. Tsaykunatami sacrificiuta rupatsina altarcho cüra rupatsinqa.
11 Turitupa qaranta, aytsanta, umanta, atakshunkunata, pachanta y ashashnintanami
12 campamentupita *püru sitiuman apanqa. Tsayqa kanqa uchpata jitanaykipaq akrashqayki sitiumi. Uchpa qoturaykaqman yantata shankaykur rupatsinqa.
13 “ ‘Lapan Israel runakuna mana musyayninpa TAYTA DIOS nishqankunata mana cumplirqa jutsayuqmi kapäkunqa.
14 Mana cumplishqanta tantiyakurqa jutsayuq kashqanpita purificashqa kananpaq juk turituta Tinkuna Toldu patiuman apapäkamunqa.
15 Tsay turitupa umanman makinta churaykurmi mayor runakuna TAYTA DIOSPA nawpancho pishtapäkunqa.
16 Mandaq cüranami turitupa yawarninta walkalata tsarirkur Tinkuna Toldu rurinman apamunqa.
17 Tsaychömi dëdunta yawarman jatirpur TAYTA DIOSPA nawpancho Lugar Santïsimuta tsaparaq cortïnata qanchis kuti tsaqtsupanqa.
18 TAYTA DIOSPA nawpancho kaykaq altarpa waqrantapis yawarwan lushinqa. Tinkuna Toldu patiuman yarqurir putsuq yawarta talinqa sacrificiuta rupatsina altar chakiman.
19 “ ‘Nirkurna turitupa lapan wiranta jorqurkur altarcho rupatsinqa.
20 Tsayno rupatsinqa mandaq cüra jutsayuq kashqanpita turitupa wiranta altarcho rupatsishqannöla.* Tsayno rupatsiptinmi Israel runakuna jutsayuq kashqanpita purificashqa kar perdonashqana kanqa.
21 Nirkurmi campamentupita juk läduman jorqurkur jukaq turituta rupatsishqanno rupatsinqa.* Tsay turituqa Israel runakuna jutsayuq kashqanpita purificashqa kananpaq sacrificiumi kanqa.
22 “ ‘Juk autoridä mana musyayninpa TAYTA DIOS nishqankunata mana cumplirqa jutsayuqmi kanqa.
23 Mana cumplishqanta tantiyakurqa sänu chïvuta sacrificiupaq apamunqa.
24 Tsay chïvupa umanman makinta churaykur rupatsina sacrificiupaq uywata imaypis pishtanan kaqcho pishtanqa. Tsayno ruranqa TAYTA DIOSPA nawpanchömi. Tsay uywaqa purificatsina sacrificiumi kanqa.
25 Cüranami pishtashqan uywapa yawarninman dëdunta jatirkur sacrificiuta rupatsina altarpa waqrankunata lushinqa. Putsuq yawartana altar chakinman talinqa.
26 Jawka kawakuy sacrificiuta rupatsir uywapa wiranta rupatsishqannöla lapan wiranta altarcho rupatsinqa. Cüra tsayno ruraptinmi tsay autoridä jutsayuq kashqanpita purificashqa kar perdonashqana kanqa.
27 “ ‘Mayqan runapis mana musyayninpa TAYTA DIOS nishqankunata mana cumplirqa jutsayuqmi kanqa.
28 Mana cumplishqanta tantiyakurqa sacrificiupaq apamunqa sänu cabrata.
29 Tsaychöna cabrapa umanman makinta churaykur rupatsina sacrificiupaq uywata imaypis pishtanan kaqcho pishtanqa.
30 Cüranami cabrapa yawarninman dëdunta jatirkur sacrificiuta rupatsina altarpa waqrankunata lushinqa. Putsuq yawartana altar chakinman talinqa.
31 Nirkurna jawka kawakuy sacrificiuta rupatsinanpaq uywata pishtar wiranta jorqushqanno tsay cabrapa lapan wiranta jorqunqa. Tsayta altarcho cüra rupatsiptin ali asyayninta* mayarmi TAYTA DIOS kushikunqa. Tsaynöpami tsay runa jutsayuq kashqanpita purificashqa kar perdonashqana kanqapaq.*
32 “ ‘Purificatsina sacrificiupaq uyshata apamurqa sänu china uyshata apamunqa.
33 Nirkur uyshapa umanman makinta churaykur rupatsina sacrificiupaq uywata imaypis pishtanan kaqcho purificashqa kananpaq pishtanqa.
34 Cüranami pishtashqan uywapa yawarninman dëdunta jatirkur sacrificiuta rupatsina altarpa waqrankunata lushinqa. Putsuq yawartana altar chakinman talinqa.
35 Jawka kawakuy sacrificiuta rupatsir uyshapa wiranta rupatsishqannöla lapan wiranta altarcho rupatsinqa. Tsayno rupatsinqa TAYTA DIOSTA adorar wakin sacrificiukunata rupaykätsishqan jananman. Cüra tsayno ruraptinraqmi uywata apamuq runa jutsayuq kashqanpita purificashqa kar perdonashqana kanqapaq.
Ichic wilacuycuna
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ püru, impüru Püru ninanqa ima qanrapis mana kashqan ninanmi. Tsaymi Tayta Dios munashqanno jutsaynaq kawaq runapis püru kashqanta Bibliacho nin (1Juan 3.3).
^ 4.20 Lev. 4.8-10.
^ 4.21 Lev. 4.11-12.
^ 4.31 Wakin runakunaqa mushkuyninta nipäkun.
^ 4.27-31 Núm. 15.27-28.
