Levítico 5:1-19
5 “ ‘Pitapis rikashqanta y mayashqanta careananpaq qayatsiptin mana carearqa paypis jutsayuqmi kanqa.
2 “ ‘Tsaynölami pipis mana musyayninpa *impüru kaqta yatarqa impüru rikakunqa. Tsaymi impüru uywa* wanushqata yatar impüru rikakunqa. Tsayno rikakunqa ashmana kaq wanushqa uywata yatarpis, mana ashmana kaq wanushqa uywata yatarpis y pachalanpa y lätaypa puriq wanushqa uywata yatarpis.
3 “ ‘Pipis mana musyayninpa impüru runata o impüru warmita o paykuna *impüruyätsishqanta yatarqa yatashqanta tantiyakur jutsayuqmi rikakunqa.
4 “ ‘Alita rurananpaqpis o mana alita rurananpaqpis manami pipis mana yarpachakuypa juranmantsu. Mana yarpachakuypa jurashqanta tantiyakurqa jutsayuqmi rikakunqa.
5 “ ‘Tsaykunata rurashqanta tantiyakurqa puntata perdonta manakunqa.
6 Nirkur jutsayuq kashqanpita purificashqa kananpaq TAYTA DIOSPA nawpanman apamunqa china uyshata karpis o china cabrata karpis. Tsayta *altarcho cüra rupatsiptinmi purificashqana kanqa.
7 “ ‘Uyshata rantinanpaq mana aypäpakurqa TAYTA DIOSPA nawpanman apamunqa ishkay kulkushta karpis o ishkay pushapa palumata karpis. Jukaq kanqa purificatsina sacrificiupaq y jukaqna kanqa rupatsina sacrificiupaq.
8 Tsaykunataqa cüraman apamunqa. Cüranami apamushqan kulkushpa o palumapa kunkanta tipirinqa.
9 Yawarnintana ichiklata altarpa lädunkunata tsaqtsupanqa y wakin yawartana altar chakinman jututsinqa. Tsayqa purificatsina sacrificiumi kanqa.
10 Jukaq palumata o kulkushtami itsanqa rupatsina sacrificiupaq Tayta Dios nishqanno cüra rupatsinqa. Tsaynöpami tsay runa impüru kashqanpita purificashqa kanqa.
11 “ ‘Ishkay kulkushta o ishkay pushapa palumata rantinanpaq mana aypäpakurqa purificashqa kananpaq apamunqa ishkay kïlu alinnin harinata. Purificatsina sacrificiu kaptin tsaykunamanqa ama takutsinqatsu aceitita ni inciensutapis.
12 Tsaykunataqa cüraman apapaptinmi TAYTA DIOS imaypis yarparänanpaq juk aptayta altarcho rupatsinqa. Tsayta rupatsinqa wakin ofrendakunata rupatsishqan jananchömi. Tsay ofrendaqa purificatsina sacrificiumi kanqa.
13 Cüra tsayno ruraptinmi tsay runa impüru kashqanpita purificashqa kanqa. Mana rupatsishqan tsaki mikuy ofrenda cürapaq kashqannömi putsuq kaq harinapis cürapaq kanqa’ ”.
Consagratsina sacrificiupita tantiyatsishqan
14 Mastapis Moisésta TAYTA DIOS kayno nirqan:
15 “Pipis mana musyayninpa TAYTA DIOSPAQ sagrädu kaqkunata* mana respitarqa jutsayuqmi kanqa. Tsawraqa sänu carnita TAYTA DIOSPAQ apamunqa. Tsay carniqa consagratsina sacrificiumi kanqa. Tinkuna *Sagrädu Tolducho kaq pësakunawan pësarkur tsay carnipa chaninta täsanqa.
16 Tsaynöpis TAYTA DIOSPAQ *sagrädu kaqta mana respitashqanpita preciunta päganqa. Tsay jananmanna quinta parti masta cürata päganqa. Apamushqan carnita consagratsina sacrificiupaq *altarcho cüra rupatsiptinmi perdonashqa kanqa.
17 “Pï runapis mana musyayninpa TAYTA DIOS nishqankunata mana cumplirqa jutsayuqmi kanqa.
18 Tsawraqa cüra nishqannölami ayka chanin kaptinpis uyshankunapita sänu carnita apamunqa. Tsay carniqa consagratsina sacrificiupaqmi kanqa. Tsayta altarcho cüra rupatsiptinmi jutsayuq runa perdonashqa kanqa.
19 TAYTA DIOS nishqanta mana cumplishqanpitami tsay runa jutsayuq kaykan. Tsaymi apamushqan carniqa consagratsina sacrificiu kanqa”.
Ichic wilacuycuna
^ püru, impüru Püru ninanqa ima qanrapis mana kashqan ninanmi. Tsaymi Tayta Dios munashqanno jutsaynaq kawaq runapis püru kashqanta Bibliacho nin (1Juan 3.3).
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ Sagrädu Toldu Liyinki Tinkuna Toldupita tantiyatsikuyta.
^ sagrädu Liyinki santupita tantiyatsikuyta.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
