Números 12:1-16
12 Hazerotcho cusita warmiwan tashqan jananmi Aarón y panin María Moiséspa wasanta rimar
2 kayno nipäkurqan: “Manami Moiséslawantsu TAYTA DIOS parlashqa, sinöqa noqantsiwanpis parlashqami”.
Tsayno rimapäkushqantami TAYTA DIOS mayarqan.
3 Paykuna tsayno rimaptinpis kay patsacho pïmaypitapis mas ali runa kar Moisés manami imatapis rimakurqantsu.
4 Tsaymi Moisésta, Aarónta y Maríata TAYTA DIOS kayno nirqan: “Tinkuna Tolduman kimsayki aywapäkuy”.
Tsayman kimsan aywapäkuptinmi
5 Tinkuna Toldu punkuman TAYTA DIOS ichiraykaq pukutaycho urämurqan. Tsaychönami Aarónta y Maríata qayaptin nawpanman aywapäkurqan.
6 Paykunatami TAYTA DIOS kayno nirqan: “Nishqäta shumaq mayapäkamay. Qamkunacho profëtakunataqa revelacioncho y sueñuyninchömi parlapä.
7 Wayïta* ali rikaq sirvimaqnï Moiséstaqa manami tsaynötsu parlapä.
8 Paytaqa mana tumatsipaylapami parlapä. Kikïtami rikaman. Tsayno kaykaptinqa ¿imanirtaq wasanta rimarkaykanki?”
9 Nirkushpanmi TAYTA DIOS fiyupa rabyashqa aywakurqan.
10 Tinkuna *Sagrädu Toldupita pukutay aywakuptinmi jinan höra Maríapa intëru cuerpun *leprawan yoraq rikakurqan. Tsayta rikaykurmi
11 Moisésta ruwakur Aarón kayno nirqan: “Jutsäkuna atipashqa upano rimapäkushqäpita ama castigaykamaytsu, tayta.
12 Mamanpa pachancho wanushqa wamrapa qaran ismushqanömi Maríapa qaranpis kaykan. Aliyänanpaq TAYTA DIOSTA manakuykulay, tayta”.
13 Tsawraqa TAYTA DIOSTA ruwakur Moisés kayno nirqan: “Tayta Dios, Maríata aliyaykatsilay”.
14 Tsaymi TAYTA DIOS kayno nirqan: “Qaqlancho papänin toqapaptin ¿manaku qanchis junaqyaq penqakushqa kanqa? Tsayno kaptinqa campamentupita qanchis junaqyaq Maríata qarquy.* Tsaypitaraqmi kutimunqa”.
15 Tsaymi campamentupita qanchis junaqyaq Maríata qarqurqan. Pay kutimushqanyaqmi Israel runakunaqa jinalancho karkaykarqan.
16 Tsaypitanami Israel runakuna Hazerotpita aywakur Parán chunyaq jirkaman chayapäkurqan. Tsaychömi toldunkunata ichitsir patsakärirqan.
Ichic wilacuycuna
^ 12.7 Wayinpaq parlarqa Israel runakunapaqmi parlaykan.
^ Sagrädu Toldu Liyinki Tinkuna Toldupita tantiyatsikuyta.
^ lepra Lepra qeshyaqa runapa qarancho tukuy casta qerikunami karqan. Israel nacioncho lepra qeshyawan qeshyaykaqkunaqa markapita juk läduchömi täkäriq (Lev. 13.45-46). Paykunataqa runakuna manami yataylapis yataqtsu (Lev. 22.5). Tsayno kaptinpis Jesucristo munayniyuq karmi leprawan qeshyaykaqkunata yataykur aliyätsirqan (Mar. 1.40-43).
^ 12.14 Núm. 5.2-3.
