Números 16:1-50
16 Leví trïbupitami juk runa karqan Coré* jutiyuq. Payqa Coat aylupita Izharpa tsurinmi karqan. Rubén trïbupitanami Datán, Abiram y On karqan. Datán y Abiramqa Eliabpa tsurinkunami karqan. Onnami Peletpa tsurin karqan.
2 Paykunami ishkay pachak pitsqa chunka (250) runakunawan Moiséspa contran sharkapäkurqan. Lapanpis yätsikuq y reqishqa runakunami karqan.
3 Paykunami juntakaykur Moisésta y Aarónta kayno nipäkurqan: “¡Aläpanami qamkunaqa makitsakarkaykämanki! Lapantsimi TAYTA DIOSPAQ *santu kantsi. Lapantsitami yanapaykämantsipis. Tsayno kaykaptinqa ¿imanirtaq qamkunala munayniyuq kashqaykita yarparkaykanki?”
4 Tsayno nipäkuptinmi Moisésqa ima ruraytapis mana kamäpakushpan lätakuykurqan.
5 Nirkurmi Coréta y wakin runakunatapis kayno nirqan: “Wara tutami TAYTA DIOS musyatsimäshun mayqantsipis santu kashqantsita.* Santu kaqmi paypa kaykan. Pay akrashqan kaqkunalami payta sirvinanpaq nawpanman yaykunqa.
6 Wara tuta shapäkamunki cada ünuyki inciensu qoshtatsikunaykikunata apakurkur.
7 Tsaykunaman shanshata winarkur inciensuwan qoshtatsipäkunki TAYTA DIOSPA nawpancho. TAYTA DIOS akrashqan kaqmi nawpancho sirvinanpaq santu kanqa. ¡*Levitakuna, qamkunaqa aläpami TAYTA DIOSTA rabyanaykätsinki!”
8 Nirkurnami Coréta Moisés kayno nirqan: “Levitakuna, shumaq mayapäkamay.
9 TAYTA DIOSMI Israel mayikikunapita akrapäkushushqanki payta sirvir lapan runakunapa trukan *Sagrädu Tolducho ruraykunata rurapäkunaykipaq. ¿Manaku tsaywan contentakärinki?
10 Qamta y levita mayikikunatapis TAYTA DIOSMI churapäkushushqanki nawpancho sirvipäkunaykipaq. ¿Kananqa cüra kaytanaku munarkaykanki?
11 ¿Tsayno yarparku Aarónpa contran sharkurkaykanki? Aarónpa contran sharkurqa TAYTA DIOSPA contranmi sharkurkaykanki”.
12 Tsaypitanami Moisés qayatsirqan Eliabpa tsurinkuna Datánta y Abiramta. Tsaymi paykuna kayno nipäkurqan: “Manami aywapäkushaqtsu.
13 Kutir Moisésta kayno wilanki: ‘Egiptucho lëchipis abëjapa mishkinpis yakunöraq atska kaykaptin kay chunyaq jirkacho wanupäkunäpaq pushamar ¿alita rurashqaykitaku yarpaykanki? Tsaynöpis ¿mandamaqnï kaytaku munaykanki?
14 Kananyaqpis manami chayatsimankiraqtsu yakunöraq atska lëchipis abëjapa mishkinpis kashqan nacionman. Manami chakratapis ni üva plantaraqkunatapis rikatsimashqankiraqtsu. ¿Imayyaqtaq tsaynöla engañamanki? Tsaymi shamuytapis munapäkütsu’ ”.
15 Tsayno nishqanta wilaptinmi Moisésqa fiyupa rabyashqa TAYTA DIOSTA kayno nirqan: “¡Paykuna inciensuwan qoshtatsiptin ama chaskiytsu, Tayta! Noqa manami ni juk bürrulantapis qechushqätsu ni imaypis paykunata achäquita ashipashqätsu”.
16 Tsaypita Coréta Moisés kayno nirqan: “Wara tuta mandayta munaq mayikikunawan TAYTA DIOSPA nawpanman shapäkamunki. Tsaychömi Aarónpis kaykanqa.
17 Cada ünuyki inciensu qoshtatsikunaykita inciensuntinta TAYTA DIOSPA nawpanman apapäkamuy. Tsaymi ishkay pachak pitsqa chunka (250) qoshtatsikuna kanqa. Tsaynölami Aarónpis inciensu qoshtatsikunanta apamunqa”.
18 Moisés nishqannölami cada ünun qoshtatsikunanman shanshata y inciensuta winarkur Tinkuna Toldu patiuman shapäkamurqan. Tsaychömi Moiséspis y Aarónpis kaykarqan.
19 Moiséspa y Aarónpa contran sharkuqkuna Coréwan tsaycho juntakashqa karkaykaptinmi TAYTA DIOSPA chipchipyaynin rikakämurqan.
20 Tsaypitanami Moisésta y Aarónta TAYTA DIOS kayno nirqan:
21 “¡Kanan hörami kay runakunata ushakätsishaq! ¡Paykunapita jukla witikäriy!”
22 Tsayno niptinmi Moisés y Aarón lakikushpan pampaman lätakuykur kayno nipäkurqan: “¡Tayta Dios! Qammi lapan runakunatapis kawayta qonki. ¿Juk runala jutsata rurashqanpitatsuraq lapan runakunata ushakaykatsinki?”
23 Tsayno niptinmi TAYTA DIOS kayno nirqan:
24 “Israel runakunata niy Corépa, Datánpa y Abirampa toldunkuna kaqpita juk läduman witikärinanpaq”.
25 Tsaymi lätaraykashqanpita sharkurkur Israel mayor runakunawan Moisés aywarqan Datán y Abiram kaykashqan kaqman.
26 Chayaykurmi runakunata Moisés kayno nirqan: “Kay mana cäsukuq runakunapa toldunkuna kaqpita witikäriy. Paykunapataqa imantapis ama yatapäkuytsu. Yatashpaykiqa paykunapa jutsankunapitami qamkunapis wanupäkunki”.
27 Tsawraqa lapan runakuna witikärirqan Corépa, Datánpa Abirampa toldunkuna kaqpita. Abiram y Datánqa toldunkunapa punkuncho warminwan y wamrankunawan karkaykarqan.
28 Tsaypitami runakunata Moisés kayno nirqan: “Kananmi tantiyapäkunki TAYTA DIOS kachamashqa kaptin imatapis pay nimashqalanta rurashqäta.
29 Kay runakuna wakin runakunanöpis ali wanuypa wanuptinqa musyapäkunki TAYTA DIOS mana kachamashqanta.
30 Patsata TAYTA DIOS kichakarkatsir lapan imaykantinta tsay runakunata kawaykaqta ultakurkuptinmi itsanqa musyapäkunkipaq TAYTA DIOSPA contran sharkapäkushqanta”.
31 Moisés parlayta usharkuptilanmi patsa kichakarqan tsay runakuna ichiraykashqan kaqpa.
32 Tsayno kichakarmi Coréta, Datánta, Abiramta, aylunkunata y imaykankunatapis ultakurkurqan.
33 Tsayno kawaykaqta ultakurkurnami patsa wichqakäkurqan. Tsaynöpami lapan imaykankunawan Israel runakunapita ushakarqan.
34 Patsa kichakaptin qaparpashqanta mayarmi nawpancho kaykaq Israel runakunapis qaparaykar qeshpir kayno nipäkurqan: “¡Noqantsitapis patsa ultakarkamashwantaq!”
35 Tsaynölami TAYTA DIOSPA nawpanpita nina shamur usharqan ishkay pachak pitsqa chunka (250) inciensuwan qoshtatsiq runakunatapis.
36 (17.1) Tsaypitanami Moisésta TAYTA DIOS kayno nirqan:
37 (17.2) “Tsay wanuq runakunapa cada qoshtatsikunan *sagrädumi kaykan. Tsayno kaykaptinqa Aarónpa tsurin Eleazarta kachay ninapita jorqunanpaq y qoshtatsikunancho shanshata shuntarkur campamentupita karuman jitananpaq.
38 (17.3) Noqapa nawpächo inciensuwan qoshtatsishqanpitami cada qoshtatsikunan sagrädu kaykan. Tsaymi cada wanuq runapa qoshtatsikunanta lapshalaman tsulurkatsir *altarman enchapatsinki. Tsayta rikarmi Israel runakuna conträ mana sharkunqatsu”.
39 (17.4) Tsawraqa wanuq runakunapa inciensu qoshtatsikunankunata cüra Eleazar shuntarqan. Nirkurmi lapshalaman tsulurkatsir altarman enchapatsirqan. Tsaykuna broncipita rurashqami karqan.
40 (17.5) Altarman tsayno enchapatsirqan pï runapis tsayta rikakur TAYTA DIOSPA nawpancho inciensuta lutala mana qoshtatsinanpaqmi. Tsaynöpami Aarónpita miraqkunala TAYTA DIOSPA nawpancho qoshtatsinanpaq karkaykan. Pipis lutala qoshtatsirqa Coré y munayniyuq kayta munaq mayinkuna wanushqannömi wanunqapaq. Coréta y yanaqinkunata tsayno pasarqan Moisésta TAYTA DIOS nishqannölami.
41 (17.6) Tsaypita jukaqnin junaqqa Israel runakuna yapaymi Moisésta y Aarónta qayapar kayno nipäkurqan: “¡Qamkunami TAYTA DIOS akrashqan runakunata wanuykätsinki!”
42 (17.7) Moiséspa y Aarónpa contran sharkunanpaq juntakarmi elaqpita rikapäkurqan Tinkuna Tolduta pukutay tsapakurkuqta y TAYTA DIOSPA chipchipyaynin atsikyämuqta.
43 (17.8) Tsawraqa Moisés y Aarón Tinkuna Toldu patiuman aywapäkurqan.
44 (17.9) Tsaychömi Moisésta TAYTA DIOS kayno nirqan:
45 (17.10) “¡Tsay runakunapita witikäriy! ¡Paykunata kanan jukla ushakätsishaq!”
Tsayno niptinmi Moisés y Aarón pasaypa lakikushpan pampaman lätakuykurqan.
46 (17.11) Tsaymi Aarónta Moisés kayno nirqan: “TAYTA DIOS fiyupa rabyarmi runakunata ushakaykätsin. Kananqa altarman jukla aywaykur inciensu qoshtatsikunaykiman shanshata y inciensuta winay. Tsayta apakurkur runakuna kaykashqanman aywaykur TAYTA DIOSTA manakunki paykunata perdonananpaq”.
47 (17.12) Moisés nishqannölami qoshtatsikunanta aptakurkur Aarónqa runakuna wanurkaykashqanman warakayla aywarqan. Tsaychömi inciensuwan qoshtatsishpan TAYTA DIOSTA manakurqan runakunata perdonananpaq.
48 (17.13) Wanushkunapa y kawaykaqkunapa chawpinman ichiykur TAYTA DIOSTA ruwakuptinmi pipis mana wanurqannatsu.
49 (17.14) Tsaychömi wanurqan chunka chusku waranqa qanchis pachak (14,700) runakuna. Tsayqa karqan Coréwan wanuqkunata mana yupaylapami.
50 (17.15) Runakuna mana wanuptinnami Aarón kutirqan Tinkuna Toldu patiucho Moisés kaykashqan kaqman.
Ichic wilacuycuna
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ 16.5 2Tim. 2.19.
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ Sagrädu Toldu Liyinki Tinkuna Toldupita tantiyatsikuyta.
^ sagrädu Liyinki santupita tantiyatsikuyta.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
