Números 21:1-35
21 *Neguevcho kaykaq Arad markapa mandaqnin reymi karqan cananeo runa. Paymi Israel runakuna Atarim nänipa aywarkaykashqanta musyaykur soldädunkunawan atacaq aywapäkurqan.* Tsaycho pelyarmi juk ishkay Israel runakunata prësu tsarirqan.
2 Tsawraqa Israel runakuna TAYTA DIOSTA manakur kayno nirqan: “Arad runakunata vincinäpaq yanapamaptikiqa lapan caseriunkunatapis chipyaq ushakätsishaq”.
3 Israel runakuna manakushqannöla TAYTA DIOS yanapaptinmi cananeo runakunata y markankunatapis chipyaq ushakätsirqan. Tsayno ushakätsishqanpitami tsay partipa jutinta churaparqan Horma* jutin kananpaq.
Broncipita culebrata Moisés rurashqan
4 Hor jirkapita Israel runakuna aywakurmi Edom nacionman mana yaykapäkunanpaq Puka Lamarpa aywaq nänipa* tumapäkurqan. Tsaypa nakar aywarkaykaptinmi pacienciankuna ushakarqan.
5 Tsaymi Tayta Diospa y Moiséspa contran kayno nipäkurqan: “Kay chunyaq jirkacho wanupäkunäpaq ¿imapaqtaq Egiptupita pushapäkamashqanki? Kaychöqa manami mikuypis ni yakupis kantsu. Waran waran tsay mikuylata mikur pasaypanami ajayashqä”.
6 Tsayno rimapäkuptinmi wanutsikuq culebrakunata TAYTA DIOS yuritsirqan. Culebrakuna picaptinmi atska runakuna wanupäkurqan.*
7 Tsaymi Moisés kaqman aywaykur kayno nipäkurqan: “TAYTA DIOSPA contran y qampa contrayki rimar jutsata rurapäkushqäpita TAYTA DIOSTA manakuykulay culebrakunata elqätsinanpaq”.
Tsaymi Moisés manakuptin
8 TAYTA DIOS kayno nirqan: “Juk culebrata broncipita ruray. Nirkur qerupa puntanman watarkur ichitsinki. Pitapis culebrakuna picaptinqa broncipita rurashqa culebrata jukla rikäritsun mana wanunanpaq”.
9 Tsayno niptinmi broncipita culebrata Moisés ruraykur qerupa puntanman watarkur ichitsirqan.* Tsaymi culebrakuna picaptin broncipita rurashqa culebrata pipis rikärirqa mana wanuqnatsu.
Israel runakuna Moabman aywapäkushqan
10 Tsaypita aywakärirnami Israel runakuna Obotcho patsakärirqan.
11 Obotpita pasarnami chunyaq Ije-abarimcho patsakärirqan. Tsay partiqa kaykan Moabpa tsimpan inti jeqamunan lädupami.
12 Tsaypita aywakärirnami Zered raqra nawpancho patsakärirqan.
13 Tsaypitanami Arnón mayu tsimpancho patsakärirqan. Arnón mayuqa chunyaq jirkapa pasarmi amorreo runakunapa y moabita runakunapa lindërun kaykan.
14 Israel Runakunata Guërracho TAYTA DIOS Yanapashqan jutiyuq libruchömi kayno nir qelqaraykan:“Sufá particho kaykaq Vaheb markapa pasapäkurqä.Raqrakunapa aywarmi Arnón mayupa pasapäkurqä.
15 Tsaypita juk raqrapa aywar chayapäkurqä Ar partiyaq.Tsay raqra chayaykan Moab nacionpa lindërunyaqmi”.
16 Arnón mayupita aywakur chayarqan Beer pözuyaq. Tsaychömi Moisésta TAYTA DIOS kayno nirqan: “Israel runakunata shuntay yakuta upupäkunanpaq”.
17 Tsaycho yakuta tarirmi Israel runakuna kayno cantapäkurqan:“¡Pukyucho yaku mana tsakiypa kaykulätsun!¡Yaku pashtamushqanpita cantaläshun!
18 Mandaqkunami pözuta uchkupäkurqan.Respitädu runakunami tukrunkunawan uchkupäkurqan”.
Tsay chunyaq tsaki jirkapita aywarmi Israel runakuna chayarqan Matana partiman.
19 Matanapita aywar chayarqan Nahalielman. Nahalielpita aywar chayarqan Bamotman.
20 Bamotpita aywar chayarqan Moab nacioncho kaykaq chunyaq pampaman. Tsaypitami rikakan Pisga nishqan punta.
Rey Sehónta Israel runakuna vincishqan
Deuteronomio 2.26-37
21 Tsay pampaman manaraq chayarmi Israel runakuna propiuta kacharqan amorreo runakunapa mandaqnin rey Sehónman kayno nipäkunanpaq:
22 “Nacionnikipa pasakuläshaq, tayta. Manami pasapäkushaqtsu mururaykaq chakraykikuna jananpa ni üva chakraykikuna jananpapis. Manami pözuykikunapita yakutapis upupäkushaqtsu. Jatun nänilapami pasapäkushaq”.
23 Tsayno ruwakuptinpis rey Sehónqa manami munarqantsu Israel runakuna nacionninpa pasananta. Tsaymi lapan soldädunkunata shuntarkur chunyaq jirkaman aywarqan Israel runakunawan pelyananpaq. Jahazacho tinkurmi paykunata atacarqan.
24 Jina kaqtami Israel runakunaqa tikrapar vincipäkurqan. Nirkurmi markankunata y chakrankunata qechupäkurqan Arnón mayupita patsa hasta Jaboc mayuyaq. Amonita runakunapa lindërun ali sigurashqa kaptinmi paykunapa lindërunyaqla qechupäkurqan.
25 Amorreo runakunapa markankunata qechushpanmi Hesbóncho y caseriunkunachöpis Israel runakuna tarqan.
26 Hesbónqa karqan amorreo runakunapa mandaqnin rey Sehón tashqan markami. Israel runakuna Hesbón markata manaraq qechuptinmi Sehónqa Moab nacionpa mandaqnin reywan guërrata rurarqan. Payta vincirmi moabita runakunapa chakrankunata qechupäkurqan Arnón mayuyaq.
27 Tsaypitami poesíata recitaqkunapis kayno nin:“¡Lapayki shamuy Hesbón markaman!Rey Sehónpa jatun markanta yapay sharkatsipäkuy.
28 Sehónpa markan Hesbónpitami mantsariypaq ninanöraq soldädukuna yarqupäkurqan.Paykunami Moabcho kaykaq Ar markayaq lapanta usharqan.Arnón mayu nawpancho kaq jalqakunayaqmi tsayno usharqan.
29 ¡Wawalaw, moabita runakuna!Quemos jutiyuq diosta* adoraqkuna, ushakashqami karkaykanki.Amorreo runakunapa mandaqnin rey Sehón shamuptinmi Quemos diosniki kacharishushpayki manana yanapashurqaykinatsu.Tsaymi olqu kaqkuna qeshpir aywakärirqan.Warmi kaqkunatapis prësu tsarirkurmi apakärirqan.*
30 Mandashqan markakunatami noqakuna ushakätsirqä.Tsaymi wanupäkurqan Hesbón markapita Dibón markayaq.Tsaynöpis Nofapita Medebayaq ushakätsirqä”.
Rey Ogta Israel runakuna vincishqan
Deuteronomio 3.1-11
31 Tsaynöpami Israel runakunaqa amorreo runakunapa markankunaman yaykuykur tarqan.
32 Tsaypitami runakunata Moisés kacharqan Jazer markata rikapakamunanpaq. Kutiykuptinnami Jazerman y nawpan markakunaman aywaykushpan amorreo runakunata qarqurkur Israel runakuna tsaycho tarqan.
33 Tsaypita Israel runakuna pasarqan Basán nacionman aywaq nänipana. Tsayta musyaykurmi Basán nacionpa mandaqnin rey Og soldädunkunawan Edreiman aywarqan Israel runakunawan pelyananpaq.
34 Tsaymi Moisésta TAYTA DIOS kayno nirqan: “Tsay runakunataqa ama mantsakuytsu. Noqami yanapashayki lapan soldäduntinta vincir nacionnintapis munaynikiman churapäkunaykipaq. Hesbóncho taq amorreo runakunapa mandaqnin rey Sehónta ushakätsishqaykinömi paykunatapis ushakätsinkipaq”.
35 TAYTA DIOS nishqannölami rey Ogta, tsurinkunata y lapan soldädunkunatapis wanutsir Israel runakuna ushakätsirqan. Manami pitapis kawaykaqtaqa kachaykurqantsu. Nirkurmi lapan chakrankunata tsarikarkärirqan.
Ichic wilacuycuna
^ Neguev Neguevqa Israel nacionpa sur kaq lädunchömi kaykan. Neguevcho kaykan Beerseba, Siclag, Gerar y Arad markakunami. Neguevcho shumaq mana tamyaptinmi aläpaqa mana murukärintsu. Tsaymi tsay partichöqa uyshata y cabrata ashmakular täkärin (Gén. 24.62; Núm. 13.17; Jos. 11.16).
^ 21.1 Núm. 33.40.
^ 21.3 Horma ninanqa ushakätsishqa ninanmi.
^ 21.5-6 1Cor. 10.9.
^ 21.9 2Rey. 18.4; Juan 3.14.
^ 21.29 Moabita runakunaqa yarparqan juk diospis Quemos jutiyuq kashqanta.
^ 21.28-29 Jer. 48.45-46.
