Números 23:1-30
23 Tsay jirkachömi Balaam kayno nirqan: “Qanchis *altarta rurarkatsir qanchis turituta y qanchis carnita pishtashqalata apatsimuy”.
2 Balaam nishqanta Balac rurarkatsiptinmi cada altarcho juk turituta y juk carnita ishkan rupatsipäkurqan.
3 Nirkur Balaamqa Balacta kayno nirqan: “Kaylacho shuyaykämay. Noqa mä aywashaq. Tayta Dios capazmi imatapis wilamanqa. Kutiykamurnami imata nimashqantapis wilashayki”.
Tsayno nirkushpanmi Balaam aywarqan chunyaq puntaman.
4 Tsay puntacho Tayta Dios yuripaptinmi Balaam kayno nirqan: “Qanchis altarta ruraykur cada ünuncho qampaq rupatsishqä juk turituta y juk carnita”.
5 Tsayno niptin Balaamta TAYTA DIOS tantiyatsirqan Balac kaqman kutiykur imata wilananpaqpis. Nirkurmi kayno nirqan: “Balac kaqman kutiykur wilanki nishqäkunata”.
6 Tsaymi kutiykur Balacta tarirqan sacrificiuta rupaykätsishqanpa nawpancho ichiraykaqta. Tsaychömi Moab nacionpa mandaqninkunapis kaykarqan.
7 Tsaymi Balaam kayno nirqan:“Moabpa mandaqnin rey Balacmi Arampita patsa qayatsimashqa.Inti jeqamunan lädupitami pushatsimashqa.Pushamänanpaq kachamushqan runakuna kayno nimashqa:‘Shamur Jacobpita miraq runakunata maldicionaykuy.Israel runakuna ushakänanpaq wilakuykuy’.
8 Tsayno nimaptinpis Tayta Dios mana munaykaptinqa ¿imanöpataq maldicionäman?Tayta Dios mana niykaptinqa ¿imanöpataq ushakänanpaq profetizäman?
9 Kay puntapitami Israel runakunata rikaykä.Kay jirkapitami imano kashqantapis tantiyakuykä.Paykunaqa wakin nación runakunapita rakikashqami tarkaykan.Paykunawanqa manami talukantsu.
10 Aquyshanöpis paykunaqa atskami karkaykan.¿Piraqshi yupaytapis atipanman?Ayka kashqantapis ¿piraqshi musyanman?Tayta Dios munashqanno kawaq runakuna kushishqa wanushqannömi noqapis wanuyta munä.Paykunano noqapis wanuküman itsanqa”.
11 Tsayno niptinmi Balaamta Balac kayno nirqan: “¿Imatataq niykanki? Qamtaqa qayatsimushqä conträ runakunata maldicionapämänaykipaqmi. Tsayno niykaptïpis qamqa bendicionta qoykanki”.
12 Tsawraqa Balaam kayno nirqan: “Noqaqa parlaykä TAYTA DIOS tantiyatsimashqalantami”.
Israel runakunata Balaam yapay bendicionta qoshqan
13 Tsayno niptinmi Balac kayno nirqan: “Juk läduman aku aywashun. Tsaypitapis Israel runakunapa campamentunta pulalantapis rikankipaq. Tsay rikashqalaykitapis maldicionapaykalämay”.
14 Tsaymi Balaamta Balac pusharqan Pisga nishqan puntacho kaykaq Zofim pampaman. Tsaychömi qanchis *altarta perqarkur cada altarcho sacrificiupaq rupatsirqan juk turituta y juk carnita.
15 Rupatsiptinmi Balacta Balaam kayno nirqan: “Kaylacho shuyaykämay. Noqaqa aywashaq Tayta Dios imata yarpashqantapis musyamunäpaq”.
16 Aywaptinmi Tayta Dios yuriparkur tantiyatsirqan imata rimananpaq kashqantapis. Nirkur kayno nirqan: “Balacman kutiykur tantiyatsishqaläta ninki”.
17 Tsaymi kutiykur Balacta tarirqan sacrificiuta rupaykätsishqanpa nawpancho Moab nacionpa mandaqninkunawan ichiraykaqta. Tsaymi Balac tapurqan kayno nir: “TAYTA DIOS ¿imatataq nishushqanki?”
18 Tsawraqa Balaam kayno nir wilakurqan:“Ziporpa tsurin Balac, nishqäta shumaq mayamay.
19 Tayta Diosqa manami runatsu kaykan lulakunanpaq.Pay awnirqa manami kutirikuntsu.Promitishqantaqa cumplinmi.
20 Tayta Diosmi nimashqa bendicionta qonäpaq.Tayta Dios bendicionta qoykaptinqa ¿imanöpataq maldicionäman?
21 Jacobpita miraqkunataqa Tayta Dios manami maldicionayta munantsu.Payqa manami munantsu Israel runakunata desgracia pasananta.TAYTA DIOSMI Israel runakunata yanapaykan.Paymi mandaqnin rey kaykan.
22 Tayta Diosmi paykunata Egiptupita jorqamurqan.Payqa poqushqa törunöpis kalpayuqmi kaykan.
23 Jacobpita miraq runakunata contran maldicionaptinpis manami imapis pasanqatsu.Israel runakunata brüjuta ruratsiptinpis manami chayanqatsu.Kananpitami Israel runakunata kayno nipäkunqa:‘¡Tayta Dios yanapashushpaykimi atska milagrukunata ruran!’
24 Israel runakunaqa leonno mantsakuypaqmi kaykan.León imatapis tsariykur yawarninta upurraq jamashqannömi Israel runakunapis contrankunata vincirkurraq jamaykärin”.
25 Tsayno niptinmi Balaamta Balac kayno nirqan: “¡Tsay runakunata maldicionayta mana kamäpakurqa Tayta Diospa bendicionnintapis ama qoytsu!”
26 Tsawraqa Balaam kayno nirqan: “¿Manaku qamta nirqä TAYTA DIOS tantiyatsimashqalanta ninäpaq kashqanta?”
Israel runakunata Balaam kimsa kutina bendicionta qoshqan
27 Nirkurnami rey Balac kayno nirqan: “Tsawraqa juk läduman aywaykuläshun. Tsaypita maldicionapämaptikiqa capazchari Dios mana rabyakunqatsu”.
28 Tsayno nir Balaamta pusharqan Peor puntaman. Tsaypitaqa intëru chunyaq jirkami rikakan.
29 Tsaychömi Balacta Balaam yapay kayno nirqan: “Kaycho qanchis *altarta rurarkatsir qanchis turituta y qanchis carnita apamuy”.
30 Tsayno niptinmi Balacqa lapanta rurarqan. Nirkurnami cada altarcho juk turituta juk carnita rupatsirqan.
Ichic wilacuycuna
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
