Números 27:1-23
27 Manasés trïbucho karqan tsay nanala pitsqa warmikuna. Paykunapa jutinkuna karqan Maala, Noa, Hogla, Milca y Tirsa. Paykuna karqan Zelofehadpa warmi tsurinkuna. Zelofehadna karqan Heferpa tsurin, Heferna karqan Galaadpa tsurin, Galaadna karqan Maquirpa tsurin, Maquirna karqan Manaséspa tsurin, Manasésna karqan Josépa tsurin.
2 Tsay pitsqan warmikunami Tinkuna Toldu patiuman aywarqan Moiséswan, cüra Eleazarwan y wakin mandaqkunawanpis parlananpaq. Chayaykurmi kayno nipäkurqan:
3 “Chunyaq jirkachömi papänï wanushqa. TAYTA DIOSPA contran Coré sharkuptin payqa manami mëtikurqantsu tsay runakunawan juntu wanunanpaq, sinöqa tsaypita qepataraqmi kikinpa jutsanpita wanurqan. Tsaynöpis papänïpaqa manami olqu tsurin kashqatsu.
4 Tsayno kaptinpis olqu tsurin mana kashqalanpitaqa papänïpa jutin manami elqanmantsu. Mana elqakänanpaq papänïpa wawqinkunata aypushqayki kaqlapa noqakunatapis chakrata aypuykalämay”.
5 Warmikuna tsayno manakuptinmi Moisésqa TAYTA DIOSTA tapukurqan.
6 Tsayno tapukuptinmi TAYTA DIOS kayno nirqan:
7 “Zelofehadpa warmi tsurinkuna alitami yarpaykan. Zelofehadpa wawqinkunata aypur nawpankunalapa tsay warmikunatapis chakrata aypunki. Tsaynöpami papäninpa trukan paykunana chakrata chaskinqa.*
8 Tsaynöpis Israel runakunata kayno niy: ‘Pipis olqu tsuriynaqla wanuptinqa warmi tsurinpaqnami chakran kanqa.
9 Juklaylapis tsurin mana kaptinmi itsanqa wawqinkunapaqna chakran kanqa.
10 Wawqinkuna mana kaptinqa tiyunkunapaqnami chakran kanqa.
11 Papäninpa wawqinkuna mana kaptinqa mayqanpis legïtimu aylunpaqmi chakran kanqa. Kay nishqäkunaqa leymi kanqa Israel runakuna imayyaqpis cumplinanpaq’ ”.
Moiséspa trukan kananpaq Josuéta churashqan
Deuteronomio 31.1-8
12 Tsaypitanami Moisésta TAYTA DIOS kayno nirqan: “Israel runakunata qoykunäpaq kaq nacionta rikanaykipaq Abarim jirkakunaman witsämuy.
13 Tsaypita lapanta rikaykurnami wawqiki Aarónnöpis wanur unay ayluykikunawan tinkuq aywakunkipaq.
14 Tsayno wanunkipaq Zin nishqan chunyaq jirkacho Israel runakuna yakunar conträ rimaptin mana cäsukamashqaykipitami. Qaqapita yakuta pashtatsimushqayki höra runakunata manami musyatsirqaykitsu *santu kashqäta”.
(Tsayno pasarqan Cades particho kaykaq Meriba pukyuchömi. Cadesqa Zin chunyaq jirkachömi kaykan.)*
15 Tsayno niptinmi TAYTA DIOSTA Moisés kayno nirqan:
16 “TAYTA DIOS, qammi pïmaytapis kawayta qonki. Kananqa noqapa trukä juk mandaqta churaykulay
17 Israel runakunata maypa aywaptinpis pusharänanpaq. Tsaymi mitsiqniynaq uyshano mana puripäkunqatsu”.*
18 Tsayno niptinmi TAYTA DIOS kayno nirqan: “Nunpa tsurin Josuémi* noqa munashqäno kawaykan. Qampa trukayki Israel runakunapa mandaqnin kananpaq paypa umanman makikita churay.
19 Nirkurna cüra Eleazarman pushaykur lapan runakunapa nawpancho mandaq kananpaq churay.
20 Israel runakunata wilay payta cäsukärinanpaq.*
21 Josué imatapis tapukamayta munarqa cüra Eleazarman aywanqa. Eleazarnami Josuépa jutincho *Urim rumiwan* tapukamanqa. Imata rurananpaqpis musyaykurna Israel runakunata Josué mandanqa”.
22 TAYTA DIOS nishqannöla lapantapis Moisés rurarmi cüra Eleazarpa y lapan runakunapa nawpanman Josuéta pusharqan.
23 TAYTA DIOS nishqannölami Moisésqa Josuépa umanman makinta churarqan trukan mandaq kananpaq.
Ichic wilacuycuna
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ 27.12-14 Núm. 20.1-13; Deut. 3.23-27; 32.48-52.
^ 27.17 1Rey. 22.17; Eze. 34.5; Mat. 9.36; Mar. 6.34.
^ 27.18 Éxo. 24.13.
^ 27.18-20 Deut. 34.9; Jos. 1.16-18.
^ Urim y Tumim Urim y Tumimqa rumikunami karqan. Tsay rumikunaqa mandaq cürapa pechëran rurinchömi winararqan. Tsay rumikunawanmi mandaq cüra suertita rikaq Tayta Dios imata munashqantapis musyananpaq (Éxo. 28.30; Esd. 2.63; Neh. 7.65).
^ 27.21 Éxo. 28.30; 1Sam. 28.6.
