Números 3:1-51
3 Sinaí jirkacho Moisésta TAYTA DIOS parlapänan witsanqa Moiséspa y Aarónpa tsurinkuna karqannami.
2 Aarónpa tsurinkuna karqan Nadab, Abiú, Eleazar y Itamar.* Nadabqa karqan qechpa tsurinmi.
3 Paykunatami cüra kananpaq Moisés churarqan.
4 Sinaí chunyaq jirkacho yarpaynilanpita inciensuwan qoshtatsishqanpitami Nadab y Abiú tsuriynaqla TAYTA DIOSPA nawpancho wanupäkurqan.* Eleazar y Itamarnami taytan Aarón yätsishqannöla cüra kapäkurqan.
5 Tsaypitanami Moisésta TAYTA DIOS kayno nirqan:
6 “*Levitakunata qayaykatsir wilay Aarónta imaypis yanapananpaq.
7 Paykunami Aarónta y Israel mayinkunata yanapar Tinkunantsi Tolducho rurananpaq kaqkunata rurapäkunqa.
8 Tsaynölami Tolducho lapan manëjukunatapis shumaq rikanqa. Paykunami Israel mayinkunapa trukan Tinkunantsi *Sagrädu Tolducho rurananpaq kaqkunata rurapäkunqa.
9 Tsayno kaptinqa levitakunata churay Aarónpa y paypita miraqkunapa makincho kar imaypis yanapananpaq.
10 Aarón y paypita miraqkunalami cüra kanqa. Pipis cüra mana kaykar cüra rurananpaq kaqkunata rurarqa wanunqami”.
Levitakunata Tayta Dios akrashqan
11 Nirkurnami Moisésta TAYTA DIOS kayno nirqan:
12 “Egiptucho lapan qechpa kaqkunata wanutsirmi noqa nirqä Israel runakunapa qechpa tsurinkuna y uywakunapa punta yuriq wawankunapis noqapa kananpaq.* Israel runakunapa qechpa olqu tsurinkunapa trukanmi levitakunatana akrashqä noqapa kananpaq. Tsaymi paykunaqa noqapa kaykan. Noqaqa TAYTA DIOSMI kaykä”.
13 -
Levitakunata censapäkushqan
14 Sinaí chunyaq jirkachömi Moisésta TAYTA DIOS kayno nirqan:
15 “Leví trïbuta aylunpa aylunpa y castanpa castanpa olqu kaqkunata juk killayuqpita janaman censanki”.
16 TAYTA DIOS nishqannölami Moisés censarqan.
17 Levípa tsurinkunami karqan Gersón, Coat y Merari.
18 Gersónpa tsurinkunami karqan Libni y Simei. Paykunapita miraqkunami kaykan Libni aylu y Simei aylu runakuna.
19 Coatpa tsurinkuna karqan Amram, Izhar, Hebrón y Uziel. Paykunapita miraqkunami kaykan Amram aylu, Izhar aylu, Hebrón aylu y Uziel aylu runakuna.
20 Meraripa tsurinkuna karqan Mahli y Musi. Paykunapita miraqkunami kaykan Mahli aylu y Musi aylu runakuna. Tsaynömi *levitakunapa aylunkuna qechpapita shulkayaq karkaykan.
21 Gersónpita miraqkunami kaykan Libni aylu y Simei aylu runakuna.
22 Juk killayuqpita janaman lapan olqukunata yupaptin tsay ishkay aylu runakuna karqan qanchis waranqa pitsqa pachak (7,500) runakunami.
23 Gersónpita miraqkunami *Sagrädu Toldupita inti jeqanan kaq lädupa toldunkunata sharkatsipäkurqan.
24 Paykunapa mandaqninmi karqan Laelpa tsurin Eliasaf.
25 Tsay ishkay aylu runakunami täpapäkuq Tinkuna Tolduta, qataraq toldukunata y yaykuna cortïnatapis.
26 Tsaynöpis täpapäkuq patiupa cortïnankunata, patiuman yaykuna cortïnata y watunkunatapis. Tsay patiuqa Tinkuna Sagrädu Toldupa y *altarpa intëru waqtankunapami karqan.
27 Coatpita miraqkunaqa kaykan Amram aylu, Izhar aylu, Hebrón aylu y Uziel aylu runakunami.
28 Juk killayuqpita janaman lapan olqukunata yupaptin tsay chusku aylu karqan pusaq waranqa kimsa pachak (8,300) runakuna. Paykunami Tinkuna Sagrädu Toldu rurincho kaqkunata cuidapäkuq.
29 Coatpita miraqkunami Sagrädu Toldupa sur kaq lädunpa toldunkunata sharkatsipäkurqan.
30 Paykunapa mandaqninmi karqan Uzielpa tsurin Elizafán.
31 Tsay chusku aylu runakunami täpapäkuq *Pactu Babulta, mësata, candelabruta, altarkunata, Tinkuna Sagrädu Toldu ruricho cortïnata y sagrädu manëjunkunatapis.
32 Levitakunapa mandaqninmi karqan cüra Aarónpa tsurin Eleazar. Paymi levitakunata mandarqan Tinkuna Sagrädu Tolduta täpananpaq.
33 Meraripita miraqkunami kaykan Mahli aylu y Musi aylu runakuna.
34 Juk killayuqpita janaman lapan olqukunata yupaptin tsay ishkay aylu runakuna karqan soqta waranqa ishkay pachak (6,200).
35 Meraripita miraqkunapa mandaqninmi karqan Abihailpa tsurin Zuriel. Paykunami Sagrädu Toldupita norti kaq lädupa toldunkunata sharkatsipäkurqan.
36 Tsay ishkay aylu runakunami täpapäkuq Sagrädu Toldupa marcunkunata, travisninkunata, tushankunata, jawiräkunankunata y lapan manëjunkunatapis.
37 Tsaynölami täpapäkuq Tinkuna Sagrädu Toldu patiupa jiruruypa tumaraq tushakunata, estäcankunata y waskankunata.
38 Tinkuna Toldupita inti jeqamunan kaq lädupanami Moisés y Aarón toldunkunata sharkatsipäkurqan. Tsaynölami paykunapa nawpancho Aarónpa tsurinkunapis toldunkunata sharkatsipäkurqan. Paykunami karqan Israel mayinkunapa trukan Sagrädu Tolduta shumaq täpapäkunanpaq. Pipis cüra mana kaykar cüra rurananpaq kaqkunata rurarqa wanunqami.
39 TAYTA DIOS nishqannöla Moisés y Aarón levitakunata aylunpa aylunpa juk killayuqpita janaman censaptinmi ishkay chunka ishkay waranqa (22,000) olqukuna karqan.
Israel runakuna wakin qechpa tsurinkunapita pägapäkushqan
40 Moiséstami TAYTA DIOS kayno nirqan: “Juk killayuqpita janaman Israel runakunapa qechpa tsurinkunata censay.
41 Israel runakunapa qechpa tsurinkunapa trukan *levitakunami noqapaq kaykan. Tsaynöpis Israel runakunapa uywankunapa punta yuriq wawankunapa trukan levitakunapa uywankunami noqapaq kaykan. Noqaqa TAYTA DIOSMI kaykä”.
42 TAYTA DIOS nishqannölami Israel runakunapa qechpa tsurinkunata Moisés censarqan.
43 Juk killayuqpita janaman olqu kaqkunata censaptinmi karqan ishkay chunka ishkay waranqa ishkay pachak qanchis chunka kimsa (22,273) qechpakuna.
44 Tsaymi Moisésta TAYTA DIOS kayno nirqan:
45 “Israel runakunapa qechpa olqu tsurinkunapa trukan levitakunami noqapa kaykan. Tsaynöpis Israel runakunapa punta yuriq uywankunapa trukan levitakunapa uywankuna noqapa kaykan. Noqaqa TAYTA DIOSMI kaykä.
46 Levitakunapitaqa Israel runakunapa qechpa tsurinkuna kaykan ishkay pachak qanchis chunka kimsa (273) masmi. Tsay putsuq runakunapa trukanta
47 mananki cada ünunpita pitsqa siclo qellayta* pägashunaykipaq. Juk siclo qellayqa Tinkuna *Sagrädu Tolducho kaykaq pësakunawan pësaptinmi kaykan chunka juk grämu qellay.
48 Tsay qellayta Aarónta y tsurinkunata entreganki”.
49 Tsayno niptinmi Israel runakunapa qechpa tsurinkunapita pägapäkushqanta ishkay pachak qanchis chunka kimsa (273) qellayta Moisés shuntarqan.
50 Tsayno shuntarqan juk waranqa kimsa pachak soqta chunka pitsqa (1,365) siclo qellayta. Tsay siclukunata pësarqan Tinkuna Sagrädu Tolducho qellay pësakunawanmi.
51 TAYTA DIOS nishqannölami Aarónta y tsurinkunata tsay qellayta Moisés entregarqan.
Ichic wilacuycuna
^ 3.2 Núm. 26.60.
^ 3.4 Lev. 10.1-2; Núm. 26.61.
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ Sagrädu Toldu Liyinki Tinkuna Toldupita tantiyatsikuyta.
^ 3.12-13 Éxo. 13.2, 11-16.
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ Sagrädu Toldu Liyinki Tinkuna Toldupita tantiyatsikuyta.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ Pactu Babul Pactu Babulqa jananpa y rurinpa qoriwan enchapashqa cajonmi karqan. Tsay babulpa jananchönami qoripita rurashqa ishkay angilkuna kaykarqan. Tsay babulchömi churaraykarqan ishkay läjaman Tayta Dios qelqashqan chunka mandamientukuna, Aarónpa tukrun y Tayta Dios kamaripashqan maná mikuypis. Pactu Babultami Tayta Dioswan Tinkuna Toldu ruriman churarqan. Castellänuchöqa Pactu Babultami “arca del pacto” nipäkuq (Éxo. 25.10-22; 37.1-9).
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ 3.47 Juk siclo qellayqa killa arur gänashqannömi karqan.
^ Sagrädu Toldu Liyinki Tinkuna Toldupita tantiyatsikuyta.
