Zacarías 1:1-21
1 Rey Darío juk wata pusaq killana mandaq kaykänan witsanmi* noqa profëta Zacaríasta* TAYTA DIOS parlapämarqan. Noqa kaykä Berequíaspa tsurin y Iddupa wilkanmi.
2 Tayta Diosmi kayno nimarqan: “Unay Israel runakuna fiyupami rabyanätsimarqan.
3 Kananqa Israel mayikikunata kayno ninki: ‘Lapanta mandaq TAYTA DIOSMI kayno nin: ¡Noqaman kutipäkamuy! Kutipäkamuptikiqa yapaymi yanapashaykipaq.*
4 Unay ayluykikunano chukru shonqu ama kapäkuytsu. Paykunataqa unay profëtakunawanmi wilakatsirqä jutsa rurayta kacharir noqaman kutipäkamunanpaq. Tsayno niykaptïpis manami wiyakärimashqatsu. Noqa TAYTA DIOSMI tsayno nï.
5 “ ‘Tsay ayluykikunapis y profëtakunapis ushakashqanami.
6 Sirvimaqnï profëtakunawan wilakatsishqänölami lapanpis pasashqa. Wilakatsishqäno castigaptïmi jutsankunata kacharir kayno nipäkurqan: “Castigamänantsipaq nishqannölami lapanta mandaq TAYTA DIOSQA mana wiyakushqantsipita castigamashqantsi” ’ ”.
7 Rey Darío mandaq kashqan kimsa watata cumplinanpaq juk killa pishiykaptinmi ishkay chunka chusku (24) junaqcho noqa profëta Zacaríasta TAYTA DIOS yapay parlapämarqan. Tsayqa karqan Sebat killami.*
8 Juk tsakaymi revelacioncho rikarqä puka cawallun muntashqa runata. Tsay runaqa atska arrayán yörakuna kashqan raqrachömi kaykarqan. Qepanchömi karkaykarqan puka, bäyu y yoraq cawallun muntashqa runakuna.*
9 Tsay hörami juk *ángel noqawan parlaykarqan. Paytami kayno tapurqä: “Tayta, ¿pï runakunataq cawallun muntashqa runakuna karkaykan?”
Tapuptïmi kayno nimarqan: “Kanan wilashayki pï kashqantapis”.
10 Tsaymi arrayán kashqancho kaykaq runa kayno nimarqan: “Paykunaqa karkaykan intëru kay patsata rikapakunanpaq TAYTA DIOS kachamushqanmi”.
11 Arrayán yörakunacho kaykaq runaqa TAYTA DIOSPA angilninmi karqan. Tsaymi cawallun muntashqa kaykaqkuna tsay angilta kayno nipäkurqan: “Maytsaypapis purirmi rikapäkushqä runakuna jawka kawarkaykaqta”.
12 Tsawraqa TAYTA DIOSPA angilnin kayno nirqan: “Lapanta mandaq TAYTA DIOS, qanchis chunka (70) watana pasaykaptinpis* ¿jinalaku rabyashqa kaykanki Jerusalén y Judá runakunapita?”
13 Tsayno niptinmi noqawan parlaykaq angilta TAYTA DIOS ali shimilanpa parlaparqan.
14 Tsawraqa tsay ángel kayno wilakunäpaq nimarqan: “Lapanta mandaq TAYTA DIOS kaynömi nin: ‘Jerusalénta y *Sión jirkanta pasaypami kuyä.
15 Tsaymi atacaq nación runakuna jawka kawaykaqta rikar pasaypa rabyaykä. Israel runakunata castigananpaq kachapaykuptïmi paykunaqa aläpana nakatsipäkushqa.
16 Tsaymi noqa TAYTA DIOS kayno nï: Kananqa Jerusalénta kuyapäshaqnami. Yapaymi wayïta y Jerusalén markatapis sharkatsipäkunqa. Noqa lapanta mandaq TAYTA DIOSMI tsayno nï’ ”.
17 Tsaynöpis tsay ángel kayno nimarqan: “Mastapis kayno wilakuy: ‘Lapanta mandaq TAYTA DIOS kaynömi nin: Noqami bendicionnïta churashaq Judá markakunacho imaykapis atska kananpaq. Sión jirkancho taq runakunatapis kuyapäshaqmi. Noqapa kananpaqmi Jerusalén markata yapay shuntashaq’ ”.
Chusku waqrakunata y chusku herrërukunata revelacioncho rikashqan
18 (2.1) Tsaypitanami revelacioncho rikarqä chusku waqrakunata.
19 (2.2) Tsawraqa noqawan parlaykaq *angilta kayno tapurqä: “Tsay waqrakuna ¿imataq kaykan?”
Tsawraqa kayno nimarqan: “Tsay waqrakunaqa kaykan Judá runakunata, Israel runakunata y Jerusalén runakunata maytsaypapis qarquq nacionkunami”.
20 (2.3) Tsaypitanami TAYTA DIOS rikatsimarqan chusku herrërukunata.
21 (2.4) Tsawraqa angilta tapurqä: “¿Imapaqtaq kay herrërukuna shamushqa?”
Tsawraqa kayno nimarqan: “Paykuna shamushqa waqrakunata ushakätsinanpaqmi. Tsay waqrakunaqa karkaykan Judá nación runakunata wakpa kaypa matsipa matsir qarquq nación runakunami. Qarquptinmi Judá runakunaqa pasaypa penqaytukushqa rikakärirqan”.
Ichic wilacuycuna
^ 1.1 Daríuqa Persia nacionpa mandaqninmi karqan. Israel runakunapaq pusaq kaq killa karqan pulan octubripita pulan noviembriyaqmi. Calendariuntsichöqa tsay wata karqan 520 a. C.
^ 1.1 Esd. 4.24—5.1; 6.14; Neh. 12.16.
^ 1.2-3 Isa. 55.7; Mal. 3.7.
^ 1.7 Calendariuntsichöqa tsay junaq karqan 15 de febreru, wata 519 a. C.
^ 1.8 Zac. 6.2-3; Apoc. 6.2-4.
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ 1.12 Jer. 25.11; 29.10; Zac. 7.5.
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
