Apocalipsis 12:1-17
12 Tsaypitanami jana patsacho rikakämurqan intino chipchipyaykaq warmi. Tsay warmipa chakin ura lädunchömi killa kaykarqan. Jatirashqan corönachömi chunka ishkay qoylarkuna karqan.
2 Tsay warmimi wachay nanaywan fiyupa qaparaykarqan.
3 Tsaypitanami jana patsacho rikakämurqan qanchis umayuq y chunka waqrayuq jatunkaray puka dragón.* Cada umanchömi corönata jatirarqan.
4 Chupanwan qaracharmi cäsi pulan qoylarkunata kay patsaman jitarpamurqan.* Warmi wachakunanpaqna kaykaptinmi nawpanman ichikuykurqan wamra yuriptin mikunanpaq.
5 Tsaypitanami tsay warmi wacharqan olqu wamrata. Paymi yurirqan lapan nacionkunata fiërru värawan mandananpaq.* Tsaypitami tsay wamrata Tayta Dios nawpanman pushakurqan.
6 Mamannami qeshpirqan Tayta Dios kamarishqan chunyaq jirkaman. Tsaychömi Tayta Dios mikuyta kamariparqan juk waranqa ishkay pachak soqta chunka (1,260) junaq.*
Jana patsapita Satanásta qarqamushqan
7 Jana patsachönami guërrata rurarqan Miguel jutiyuq *angilwan* tsay puka dragón. Miguelta yanaparqan angilninkuna y dragontanami yanaparqan qatiraqnin angilkuna.
8 Dragonta y qatiraqnin angilkunatapis guërracho vincirkurmi jana patsapita jitarpamurqan.
9 Tsay jatunkaray dragonqa diablu nishqan *Satanásmi. Paymi maytsaychöpis runakunata engañaq unay culebra kaykan.* Payta y qatiraqnin angilkunata vincipäkuptinnami Tayta Dios kay patsaman jitarpamurqan.*
10 Tsaypitami mayarqä jana patsapita kayno qayakamuqta:“¡Kananqa yärakuqkunata Tayta Diosnintsi salvananpaq kaq höra chayamushqanami!¡Tayta Diosnintsi munayninwan *mandaykashqanqa chämushqanami!¡Kananpitaqa Jesucristunami lapantapis makincho tsararanqa!¡Satanásqa jana patsapita qarqushqanami kaykan!¡Tayta Diosman yärakuqkunata paqasta junaqta tumpaq Satanás* vincishqanami kaykan!
11 Tayta Diosman yärakuqkuna payta vincipäkurqan yawarninta Carnish jichar wanushqanpita y Tayta Diospa wilakuynincho nishqanno kawapäkurmi.Manami wanuytapis mantsakärirqantsu.Tsaypa trukanqa listumi karkaykarqan Carnishman yärakushqanpita wanupäkunanpaqpis.
12 ¡Jana patsacho taqkuna, kushikäriy!¡Wawalaw, kay patsacho y lamarcho kaqkuna!Jana patsapita jitarpamushqa karmi diablu fiyupa rabyashqa puriykan.Pay musyanmi walka tiempulana runakunata engañananpaq kashqanta”.
Jesucristuman yärakuqkunata Satanás nakatsishqan
13 Kay patsaman jitarpamuptinmi dragonqa olqu wamrata wachaq warmita qatikacharqan.
14 Tsaymi tsay warmita Tayta Dios kamariparqan ankapa älantano qeshpir chunyaq jirkaman aywakunanpaq. Tsaychömi kimsa wata soqta killa imaykatapis Tayta Dios kamariparqan.*
15 Tsaymi dragonqa mayutanöraq yakuta aqtumurqan warmita apananpaq.*
16 Warmita mana apananpaqmi patsapa shimin kichakar tsay yakuta ultakurpurqan.
17 Tsaymi dragonqa fiyupa rabyashqa warmipa wakin wawankunata ushakätsinanpaq aywarqan. Warmipa wawankunaqa Jesucristo wilakushqanta chaskikur Tayta Diospa mandamientunkunata cumpliq runakunami kaykan. (18)Nirkurnami dragonqa lamar kuchunman aywaykur ichikuykurqan.*
Ichic wilacuycuna
^ 12.6 Waranqa ishkay pachak soqta chunka (1,260) junaqqa kimsa wata soqta killami kaykan. Tsaynöpis chusku chunka ishkay (42) killami kaykan. Tsaynölami niykan Apoc. 11.2; 12.14; 13.6.
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ 12.7 Dan. 10.13, 21; 12.1; Jud. 9.
^ Satanás Satanásqa supaykunapa mandaqninmi kaykan. Payqa manami Diosnötsu maytsaychöpis kaykan. Satanáspa wakin jutinkunami kaykan diablu y Beelzebú (Mar. 1.13; Hech. 13.10).
^ 12.9b Luc. 10.18.
^ mandaykashqan, Tayta Dios mandaykashqan Tayta Dios mandaykashqan nishqanqa Tayta Dios shamur fiyu runakunata ushakätsinanpaq y ali kawayta apamunanpaq kashqantami niykan (Isa. 13.9-10; 65.17-25; Joel 1.14-16; Zac. 14.9). Tayta Dios mandaykashqantami Israel runakuna atska wata shuyarqan (Mar. 15.43).
^ 12.10 Job 1.6-12; Zac. 3.1.
^ 12.14 Dan. 7.25; 12.7.
^ 12.18 Wakin qepa kaq griego copiakunachöqa kaynömi nin: Nirkurmi lamar kuchunman aywaykur ichikuykurqä.
