Apocalipsis 20:1-15
20 Tsaynöpis rikarqä jana patsapita juk *ángel uraykämuqta. Tsay *angilmi wanwanyaykaq patsapa shiminpa llävin aptashqa y jatunkaray cadinan aptashqa urämurqan.
2 Dragonta tsariykur waranqa (1,000) wata wataränanpaqmi watarqan. Tsay dragonmi diablu nishqan *Satanás y unay culebra karqan.*
3 Wanwanyaykaq patsapa shiminpa qarpurirmi pitapis manana engañananpaq punkuta wichqarkur sëllarkurqan. Waranqa wata cumplirkuptinnami pöcu tiempula libri kananpaq kacharinqa.
4 Tsaypitanami trönukunata rikarqä. Tsay trönukunamanmi juzgaqkuna jamakärirqan.* Tsaynölami tsaytsika almakunatapis rikarqä. Tsay almakuna karqan Jesucristuman yärakur Tayta Diospa wilakuyninta wilakushqanpita kunkan kutsuypa wanutsishqan runakunapa almankunami.* Paykuna manami *anticristuta ni ïduluntapis adorapäkurqantsu. Tsaynöpis manami anticristupa señalninwan urkunman ni makinman señalatsikurqantsu.*
Tsay runakunami kawarirkamur waranqa (1,000) wata Jesucristuwan mandanqa.
5 Paykunaqa puntatami kawarimunqa. Wakin wanuqkunami itsanqa waranqa wata cumplirkuptinraq kawarimunqa.
6 Puntata kawarimuqkunaqa kushishqami kanqa. Paykunaqa Tayta Dios kuyashqan *santu runakunami kanqa. Tsaymi qepa kaq wanuyman mana chayanqatsu.* Tsaypa trukanqa Tayta Diosta y Jesucristuta sirviq cürakuna kashpanmi* Jesucristuwan waranqa wata mandanqa.
Satanásta infiernuman qaykunanpaq nishqan
7 Waranqa (1,000) wata cumplirkuptinnami prësuraykaq *Satanásta kacharinqa.
8 Tsaymi lapan nación runakunata engañananpaq maytsaypapis purir Gog nacionpa y Magog nacionpa* soldädunkunatapis shuntanqa guërrata rurananpaq. Lamar kuchuncho aquyshanömi tsay soldädukunapis tsaytsika kanqa.
9 Tsay soldädukuna maytsaypitapis shamurmi Dios kuyashqan markacho kaykaq yärakuq runakunapa campamentunta tumaypa juntapanqa. Tsayno juntaparaykaptinmi Tayta Dios jana patsapita ninata ratatsimur tsay soldädukunata ushakätsinqa.
10 Nirkurnami runakunata engañaq diabluta qaykunqa azufriwan talushqa nina rupaykaq qochaman. Tsaychömi *anticristo y lula profëtapis mayna qaykuraykanqa. Tsaychömi diablupis paqasta junaqta imayyaqpis paykunawan nakanqa.
Lapan runakunata Tayta Dios juzgananpaq nishqan
11 Tsaypitanami rikarqä jatunkaray yoraq trönuncho Tayta Dios jamaraykaqta. Paypa nawpanpitami kay patsapis y jana patsapis elqakäkurqan. Tsaypitaqa manami mas rikakarqannatsu.
12 Tsaynöpis rikarqä lapan wanuq runakuna, yachaqpis mana yachaqpis, Tayta Diospa nawpancho ichirpaykaqta. Tsaypitanami librukunata Tayta Dios kichar Libru de la Vïdatapis kicharqan.* Tsay librukunata rikaykurmi runakunata juzgarqan alita o mana alitapis rurashqanman tupu.*
13 Tsay runakunami karqan lamarcho wanuqkuna, pamparaqkuna y maytsaycho wanuqkunapis. Lapantami Tayta Dios juzgarqan rurashqanman tupu.
14 Tsaypitanami wanuyta y *Hadestapis nina qochaman qaykurqan. Tsay nina qochaqa qepa kaq wanuymi kaykan.*
15 Tsaymanmi Libru de la Vïdacho jutinkuna mana qelqaraq kaq runakunatapis qaykurqan.
Ichic wilacuycuna
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ Satanás Satanásqa supaykunapa mandaqninmi kaykan. Payqa manami Diosnötsu maytsaychöpis kaykan. Satanáspa wakin jutinkunami kaykan diablu y Beelzebú (Mar. 1.13; Hech. 13.10).
^ 20.4a Dan. 7.22, 27; Mat. 19.28; Luc. 22.30.
^ anticristo Anticristuqa Jesucristupa contran runami kaykan. Tsay runami Señor Jesucristo kutimunanpaqna kaptin yurimunqa. Nirkurmi runakunata lulapar kayno ninqa: “Noqami Cristo kaykä”. Milagrukunatapis rurarmi Jesucristuman yärakuqkunata engañanqa. Jesucristo kutimurnami azufriwan talushqa nina rupaykaq qochaman anticristuta qaykunqa (Mat. 24.4-5; Mar. 13.5-6; Luc. 21.8; 2Tes. 2.8-10; Apoc. 13.2; 13.13-14; 16.13; 19.20).
^ 20.4c Apoc. 13.16-17; 14.9-10.
^ 20.6b Apoc. 1.6; 5.10.
^ 20.6a Mat. 25.41; Apoc. 2.11; 20.14; 21.8.
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ Satanás Satanásqa supaykunapa mandaqninmi kaykan. Payqa manami Diosnötsu maytsaychöpis kaykan. Satanáspa wakin jutinkunami kaykan diablu y Beelzebú (Mar. 1.13; Hech. 13.10).
^ 20.8 Eze. 38.2-3, 14-16.
^ anticristo Anticristuqa Jesucristupa contran runami kaykan. Tsay runami Señor Jesucristo kutimunanpaqna kaptin yurimunqa. Nirkurmi runakunata lulapar kayno ninqa: “Noqami Cristo kaykä”. Milagrukunatapis rurarmi Jesucristuman yärakuqkunata engañanqa. Jesucristo kutimurnami azufriwan talushqa nina rupaykaq qochaman anticristuta qaykunqa (Mat. 24.4-5; Mar. 13.5-6; Luc. 21.8; 2Tes. 2.8-10; Apoc. 13.2; 13.13-14; 16.13; 19.20).
^ 20.12 Sal. 69.28; Apoc. 3.5.
^ 20.11-12 Dan. 7.9-10.
^ Hades Hadesqa jutsalancho wanuq runakunapa alman nakarkaykashqan sitiumi kaykan. Jesucristo kutimurmi wanuqkunata kawarirkatsimur (Juan 5.28-29; Hech. 24.15) Hadescho kaqkunata juzgar nina qochaman qaykunqapaq (Mat. 11.23; Luc. 16.23; Apoc. 20.14).
^ 20.14 Mat. 25.41; Apoc. 2.11; 20.6; 21.8.
