Colosenses 4:1-18
4 Patronkuna, qamkunapapis patronniki jana patsachömi kaykan. Tsaymi ashmaynikikunata kuyar imalawanpis yanapanki.*
2 Wawqi panikuna, Tayta Diosta agradëcikushpayki imaypis manakäriy.*
3 Noqakunapaqpis Tayta Diosta manakuykulay Jesucristupa ali wilakuyninta wilakäriptï shumaq chaskikärinanpaq. Tsay wilakuyninta wilakushqäpitami carcilcho wataraykä.
4 Tsaynöpis manakuykulay ali wilakuyninta pïmaytapis shumaq tantiyatsinäpaq.
5 Jesucristuta mana chaskikuq runakunawan ali kawapäkuy.* Alilata imaypis rurapäkuy.
6 Pitapis parlaparqa ali shimilaykipa shakya shakyala parlapanki.
Carta ushanan
7 Kuyay wawqintsi Tíquico* chayamurmi imano kaykashqätapis wilapäkushunki. Paypis Señor Jesucristupa wilakuqninmi kaykan.
8 Tsaymi payta kachaykämü imano kaykashqätapis wilashunaykipaq. Paymi shakyätsishunki Tayta Diosman shumaq yärakärinaykipaq.*
9 Tíquicuwanmi Tayta Diosman yärakuq marka mayiki kuyay wawqintsi Onésimutapis kachaykämü. Paykunami wilapäkushunki kaycho ima pasashqankunatapis.
10 Noqawan prësu kaykaq wawqintsi Aristarcumi* salüdunta apatsikamun. Tsaynömi Bernabépa prïmun* Marcuspis* salüdunta apatsikamun. Marcos chayamuptin yätsishqänöla shumaq chaskikärinki.
11 Tsaynölami Justo nishqan Jesúspis salüdunta qamkunapaq apatsikamun. Aristarco, Marcos y Justumi Tayta Dios *mandaykashqancho ali yanapamar shumaq shakyätsiman. Paykunalami Israel mayïkunapitaqa yanapaykäman.
12 Jesucristupa sirviqnin marka mayiki Epafraspis* salüduntami apatsikamun. Paymi lapan shonqunwan qamkunapaq imaypis manakuykan Tayta Dios munashqanno ali kawapäkunaykipaq.
13 Payqa pasaypami qamkunapaq lakikuykan. Tsaynölami lakikuykan Laodiceacho y Hierápolischo kaykaq wawqi panikunapaqpis.
14 Kuyanakushqä doctor Lucaswan* Demaspis* salüduntami qamkunapaq apatsikamun.
15 Laodiceacho kaykaq wawqi panikunatapis salüdüta qoykulanki. Tsaynöpis salüdüta qoykulanki Ninfasta y wayincho juntakaq wawqi panikunatapis.
16 Kay cartata liyirkurna apatsipäkunki Laodiceacho* kaykaq wawqi panikunaman paykunapis liyinanpaq. Tsaynömi Laodiceaman apatsishqä cartata liyirkur paykunapis apatsimunqa qamkunapis liyinaykipaq.
17 Wawqintsi Arquiputa kayno nipäkunki: “Señor Jesucristo churashushqaykino mana qelanaypa payta sirviy”.
18 Kay salüdütaqa kikïmi qelqarkamü.* Mana qonqaylapa Tayta Diosta manakäriy prësu kaykashqäpita yarqamunäpaq.
Tayta Dios lapaykita kuyapaykuläshunki. [Amén.]
Ichic wilacuycuna
^ 4.2-4 Efe. 6.18-20; Fil. 4.6.
^ 4.7 Hech. 20.4; 2Tim. 4.12.
^ 4.7-8 Efe. 6.21-22.
^ 4.10a Hech. 19.29; 27.2; Film. 24.
^ 4.10 Reina Valera nishqan castellänu traduccionchöqa sobrinun nin.
^ 4.10b Hech. 12.12, 25; 13.13; 15.37-39.
^ mandaykashqan, Tayta Dios mandaykashqan Tayta Dios mandaykashqan nishqanqa Tayta Dios shamur fiyu runakunata ushakätsinanpaq y ali kawayta apamunanpaq kashqantami niykan (Isa. 13.9-10; 65.17-25; Joel 1.14-16; Zac. 14.9). Tayta Dios mandaykashqantami Israel runakuna atska wata shuyarqan (Mar. 15.43).
^ 4.14a 2Tim. 4.11; Film. 24.
^ 4.14b 2Tim. 4.10; Film. 24.
^ 4.16 Apoc. 3.14-22.
^ 4.18 Pablo tsayno nirqan kay cartata juk qelqapashqa kaptinmi.
