Daniel 3:1-30
3 Tsaypitanami rey Nabucodonosor qoripita juk monumentuta ruratsirqan. Tsay monumentutami ruratsirqan kimsa chunka (30) metru altuta y kimsa metru anchuta. Nirkurmi tsay monumentuta ichitsirqan Babilonia provinciacho kaykaq Dura nishqan pampaman.
2 Tsaypitanami qayatsirqan nacionta mandäshiqninkunata, prefectukunata, gobernadorkunata, yätsikuqkunata, tesorërukunata, juezkunata, autoridäkunata y provinciakunacho kaykaq wakin autoridäkunatapis. Paykunata qayatsirqan monumentuta ichitsishqanpita kushikur fiestata rurapäkunanpaqmi.
3 Tsayno qayatsiptinmi nacionta mandäshiqninkuna, prefectukuna, gobernadorkuna, yätsikuqkuna, tesorërukuna, juezkuna, autoridäkuna y provinciakunacho kaykaq wakin autoridäkunapis monumentu ichitsishqan kaqman lapan juntakarqan.
4 Tsaychömi wilakuq runa qayakurqan kayno nir: “Intëru markakunapita y nacionkunapita shamuqkuna, tukuy niraq idiömata rimaq karpis, shumaq mayapäkamay.
5 Imay hörapis *cornëta, këna, taksha arpa, guitärra, jatun arpa, zampöña y mas wakin instrumentukuna waqamushqanta mayaykur juk yarpayla lapayki rey Nabucodonosor ichitsishqan monumentuta adoranaykipaq qonqurpakärinki.
6 Mayqaykipis tsay monumentuta qonqurpakuykur mana adoraptikiqa jinan hörami fiyupa waylashqa hornuman qaykushunkipaq”.
7 Órden mantsariypaq kaptinmi instrumentukunata tukamushqanta mayaykur intëru markakunapita y nacionkunapita shamuq runakuna ima idiömata rimaq karpis qonqurpakuykur rey Nabucodonosor ichitsishqan qori monumentuta adorapäkurqan.
8 Tsaypitami juk ishkay Babilonia* runakuna aywapäkurqan rey kaqman. Chayaykurmi Israel runakunapa contran
9 Nabucodonosorta wilapäkurqan kayno nir: “¡Qamla imayyaqpis rey kaykulay!
10 Qammi ordenashqanki cornëtata, kënata, taksha arpata, guitärrata, arpata, zampöñata y mas wakin instrumentukunata tukamuqta mayashpan qoripita ruratsishqayki monumentupa nawpanman qonqurpaykur lapanpis adorapäkunanpaq.
11 Tsaynöpis ordenashqanki qonqurpakuykur monumentuta mana adoraq kaqtaqa waylashqa hornuman qaykatsinaykipaqmi.
12 Tsayno ordenaykaptikipis kanmi Babilonia provinciacho mandäshishunaykipaq churashqayki juk ishkay Israel runakuna nishqaykita mana cäsukuq. Tayta rey, qam adorashqayki dioskunata paykunaqa manami adorapäkuntsu. Ruratsishqayki qori monumentuta adorananpaq ordenaykaptikipis manami adorarkaykantsu. Tsay runakunaqa Sadrac, Mesac y Abed-negumi karkaykan”.
13 Tsayno wilaptinmi Nabucodonosorqa pasaypa rabyashqa qayatsirqan Sadracta, Mesacta y Abed-neguta. Tsay mözukuna reypa nawpanman chayaykuptinmi
14 Nabucodonosor kayno nirqan: “¿Rasunpaku qamkuna diosnïkunatapis y qoripita ruratsishqä monumentutapis mana adorapäkunkitsu?
15 Kananqa cornëtata, kënata, taksha arpata, guitärrata, arpata, zampöñata y wakin instrumentukunatapis tukamuqta mayashpayki jukla qonqurpakuykur ruratsishqä monumentuta adorapäkunki. Mana adoraptikiqa fiyupa waylaykaq hornumanmi qaykatsishayki. Tsayno ruraptï ima diospis manami salvashunkipaqtsu”.
16 Tsayno niptinmi Sadrac, Mesac y Abed-nego Nabucodonosorta kayno nirqan: “Tayta rey, tsaypitaqa imatapis ama rimakushuntsu.
17 Waylashqa hornuman qaykamaptikipis sirvishqä Tayta Diosnïmi tsay hornupita y qampa makikipitapis salvamanqa.
18 Mana salvamaptinpis noqakunaqa manami diosnikikunata sirvipäkushaqtsu ni tsay ruratsishqayki monumentutapis adorapäkushaqtsu”.
Waylaykaq hornupita Tayta Dios salvashqan
19 Sadrac, Mesac y Abed-nego tsayno niptinmi Nabucodonosor pukayayparaq rabyashpan hornu waylatsiqkunata ordenarqan qanchis kuti mas waylatsinanpaq.
20 Nirkurmi ali chölunnin soldädukunata mandarqan Sadracta, Mesacta y Abed-neguta matwarkur waylashqa hornuman qaykapäkunanpaq.
21 Tsayno rurarkurmi tsay hornuman qaykapäkurqan cäpantinta, lanqintinta, uman wankukunantinta y lapan jatirashqan röpantinta.
22 Qaykuptinmi tsay mözukunaqa makipita y chakipita pankashqa hornu rurinman chayapäkurqan. Apurädu qaykunanpaq rey ordenaptin y pasaypa waylashqa hornu karmi qaykuq soldädukunata rupariykurqan. Tsaymi Sadracta, Mesacta y Abed-neguta qaykuq soldädukuna jukla wanupäkurqan.
23 -
24 Tsayta rikaykurmi jamaraykashqanpita sharkurkur Nabucodonosor fiyupa espantashqa yätsiqninkunata kayno nirqan: “¿Manaku kimsan mözukunata matwarkur hornuman qaykatsishqantsi?”
Tsayno niptin paykuna nirqan: “Aw, tayta rey”.
25 Tsaymi kayno nirqan: “¡Hornu rurincho chusku runakuna kachayla mana rupakuypa puriykaqtami rikaykä! ¡Paykunawan kaykaq runaqa juk dios niraqmi kaykan!”
26 Tsaymi Nabucodonosor hornu kaqman aywaykur qayakurqan kayno nir: “¡Munayniyuq Diosta adoraq Sadrac, Mesac y Abed-nego! ¡Yarqapäkamuy!”
Tsawraqa kimsan mözukuna hornupita yarqapäkamurqan.
27 Yarqamuptinmi paykuna kaqman nación mandäshiqninkuna, prefectukuna, gobernadorkuna y yätsikuqkuna rikananpaq juntakarqan. Tsaychömi rikapäkurqan tsay mözukunata ichiklatapis nina mana rupashqanta. Ni aqtsalanpis ni röpanpis manami rupashqatsu karqan. Manami ni rupa rupalapis asyarqantsu.
28 Tsaymi Nabucodonosor kayno nirqan: “Sadrac, Mesac y Abed-nego adorashqan Dios alabashqa kaykulätsun. Paymi *angilninta kachamushqa salvananpaq. Diosninman yärakurmi noqa ordenashqätapis mana cäsukärishqatsu. Paykunaqa juk dioskunata adorananpa trukan wanunanpaqpis listumi kashqa.
29 Manami ima diospis tsaynöqa salvantsu. Pï runatapis Sadrac, Mesac y Abed-nego adorashqan Diospa contran rimaq kaqtaqa ichik ichikla kutsupäkutsun. Wayinkunatapis rupatsipäkutsun. Tsayno katsun may nacionpita kaptinpis y ima idiömata rimaptinpis”.
30 Tsaypita Sadracta, Mesacta y Abed-neguta Nabucodonosor churarqan Babilonia provinciacho munayniyuq autoridä kapäkunanpaqmi.
Ichic wilacuycuna
^ cornëta Cornëtaqa carnipa waqranpita rurashqami karqan. Cornëtata cüra tukashqanta rikanaykipaq rikanki Lev. 25.9 versïculucho kaykaq dibüjuta. Qellaypita rurashqa cornëtapis karqanmi (Núm. 10.1-10).
^ 3.8 Hebreo idiömachöqa Caldea ninmi. Caldeaqa Babiloniapa jukaq jutinmi kaykan.
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
