Deuteronomio 8:1-20
8 Tsaypita mastapis Moisés kayno nirqan: “Kanan tantiyatsishqä mandamientukunata cumplipäkunki. Tsayno cumplirmi Abrahamta, Isaacta y Jacobta TAYTA DIOS promitishqan nacionman yaykapäkunki. Tsaychömi atskaman mirar ali kawapäkunkipaq.
2 “Chusku chunka (40) wata chunyaq jirkapa TAYTA DIOS puritsishushqaykita ama qonqapäkuytsu. Tsaychömi nakatsishushpayki probashurqayki. Tsayno rurarqan shonquykicho imata yarpapäkushqaykita musyananpaq y mandamientunkunata cäsukuq o mana cäsukuq kashqaykita musyananpaqmi.
3 “Pasaypa muchuycho kawanaykipaq churarkushushpaykipis *manátami kamaripäshurqayki mikupäkunaykipaq. Tsay mikuytaqa manami unay ayluntsikuna ni qamkunapis reqipäkurqaykitsu. Tsaynöpami TAYTA DIOS tantiyatsishurqayki kayno nishqanta: ‘Manami tantata mikulartsu runa kawan, sinöqa TAYTA DIOS lapan nishqankunata cäsukurmi kawan’.*
4 “Chusku chunka wata purirkaykaptikipis röpaykikuna manami ushakarqantsu, ni chakikikunapis manami shuplurqantsu.
5 Shumaq tantiyakäriy. Tsurinta papänin corrigishqannömi TAYTA DIOS qamkunatapis corrigiykäshunki.*
6 Tsayno kaykaptinqa TAYTA DIOSPA mandamientunkunata cumplir y pay munashqanno kawar payta *mantsakäriy.
7 “TAYTA DIOS pushaykäshunki raqrakunacho y jalqakunacho atska yakuyuq y atska pukyuyuq nacionmanmi.
8 Tsaychöqa trïgupis, cebädapis, üvapis, hïguspis, granädapis, olïvupis alimi wayun. Tsaynölami olïvupita rurashqa aceitipis y abëjapa mishkinpis atska kaykan.
9 Mikuy tsaytsika kaptinmi muchuypis mana kanqatsu. Qaqakunachöpis fiërrumi kaykan. Puntakunapitapis cobritami jorqapäkunkipaq.
10 Promitishqan nacionta qoshushqaykicho pacha junta kawarmi TAYTA DIOSTA imaypis alabapäkunki”.
Tayta Diosta mana qonqananpaq yätsishqan
11 Tsaypita mastapis Moisés kayno nirqan: “TAYTA DIOSTA ama qonqapäkunkitsu. Kanan junaq wilapashqä mandamientunkunata, leyninkunata y estatütunkunata imaypis mana qonqaypa cumplipäkunki.
12 Imaykipis mana pishiptin kushishqa kawashpayki, ali wayicho tashpayki,
13 wäkaykikuna, uyshaykikuna, cabraykikuna atskaman miraptin y qoriki, qellayniki y imaykaykikunapis atska kaptin
14 TAYTA DIOSTA ama qonqapäkunkitsu. Paymi Egiptucho ashmay karkaykaptiki jorqamushushqanki.
15 Tsaynöpis pushamushurqayki pasaypa mantsakuypaq chunyaq jirkapami. Tsaychömi wanutsikuq culebrakuna y alacrankunapis atska karqan. Upupäkunaykipaq yaku mana kaptinpis qaqapitami pashtatsimurqan.
16 Mikupäkunaykipaqpis *manáta kamaripäshurqayki. Tsay mikuytaqa manami unay ayluntsikunapis reqipäkurqantsu. Nakatsishushpaykimi probashurqayki tantiyakur ali kawapäkunaykipaq.*
17 Tsayno kaykaptinqa ama yarpapäkuytsu imaykatapis kikikikunapa kalpaykiwan taripäkushqaykita.
18 Tsaypa trukanqa tantiyakäriy lapan imaykatapis taripäkunaykipaq TAYTA DIOS yanapashushqaykita. Tsayno yanapaykäshunki unay ayluntsikunawan *pactu rurashqanta cumplirmi.
19 “TAYTA DIOSTA qonqaykur juk dioskunata adoraptikiqa lapaykitami ushakätsishunkipaq.
20 Mana cäsukuptikiqa wakin nación runakunata ushakätsinanpaq kashqannömi qamkunatapis TAYTA DIOSNINTSI ushakätsishunkipaq”.
Ichic wilacuycuna
^ maná Manáqa karqan culandrupa murunno y jachapa weqin niraq qarwashlami. Tsay mikuytami Israel runakunata Tayta Dios kamariparqan chunyaq tsaki jirkacho. Tsaytami ankaypapis machkaypapis y tantata ruraykurpis mikupäkurqan. Israel runakunaqa chusku chunka (40) watami tsay mikuyta mikupäkurqan (Éxo. 16; Núm. 11.4-9; Juan 6.31).
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
^ maná Manáqa karqan culandrupa murunno y jachapa weqin niraq qarwashlami. Tsay mikuytami Israel runakunata Tayta Dios kamariparqan chunyaq tsaki jirkacho. Tsaytami ankaypapis machkaypapis y tantata ruraykurpis mikupäkurqan. Israel runakunaqa chusku chunka (40) watami tsay mikuyta mikupäkurqan (Éxo. 16; Núm. 11.4-9; Juan 6.31).
^ 8.11-16 Ose. 13.5-6.
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
