Hebreos 9:1-28
9 Nawpa kaq *pactu kashqan witsanmi runakunata Tayta Dios tantiyatsirqan *Sagrädu Tolduta imano rurananpaq kashqanta y tsaycho payta imano adorananpaq kashqantapis.
2 Tsaymi Sagrädu Tolduta* rurarqan ishkay cuartuyuqta. Punta kaq cuartuchömi karqan candelabru,* Tayta Diospaq churashqan tanta y tanta churakuna mësapis.* Tsay cuartupa jutinmi karqan Lugar Santu.
3 Ruri kaq cuartupa jutinmi karqan Lugar Santïsimu. Tsay ishkay cuartukunaqa rakta cortïnawanmi rakirarqan.*
4 Lugar Santïsimuchömi karqan inciensuwan qoshtatsinanpaq qoripita rurashqa *altar.* Tsaynöpis tsaychömi karqan *PactuBabul.* Tsay babulmi jananpa rurinpa qoriwan enchapashqa karqan. Tsaychömi winararqan qoripita rurashqa tazón. Tsay tazonchömi *maná nishqan mikuy* churararqan. Tsaynöpis tsay babulchömi winararqan Aarónpa tsintsimuq tukrun* y läja rumikunacho qelqaraykaq pactupis.*
5 Tsay *babul tsapanan jananchönami kaykarqan qoripita rurashqa chipchipyaykaq *querubinkuna. Tsay querubinkunami babul janancho älankuna mashtashqa kaykarqan.* Maspis kaykanraqmi tsaykunapita tantiyatsinäpaq.
6 Sagrädu Toldu kamarishqana kaptinnami leykuna nishqanno lapanta rurananpaq punta kaq cuartuman cürakuna waran waran yaykapäkuq.*
7 Lugar Santïsimumanmi itsanqa mandaq cürala watacho juk kuti yaykuq. Uywapa yawarninta apakurkurmi yaykuq kikinpa jutsanpita y runakunapis mana tantiyakuypa jutsata rurashqanpita perdonta manakunanpaq.*
8 Lugar Santïsimuman mandaq cürala yaykuptinmi Espíritu Santu tantiyatsimantsi Sagrädu Toldu kashqanyaqqa* Tayta Diospa nawpanman mana chayanantsipaq kashqanta.
9 Tsayno kaptinqa shumaq tantiyakushun: Tsaki mikuy ofrendakunata y uywakunata altarcho cürakuna rupatsiptinpis manami tsaykunawanqa runakuna perdonashqatsu kaykan.
10 Nawpa kaq pactuchömi qelqaraykan imata mikunantsipaq imata mana mikunantsipaqpis,* imata upunantsipaq imata mana upunantsipaqpis* y jukno jukno purificakunantsipaq.* Tsaykunataqa runakuna cumplinan karqan Tayta Dios mushuq pactuta rurashqanyaqlami.
Mushuq pactu imano kashqanpis
11 Mushuq *pactuchöqa Jesucristunami mandaq cüra kaykan. Payqa manami kay patsacho templumantsu yaykurqan, sinöqa kikin Tayta Dios rurashqan jana patsacho kaykaq templumanmi.
12 Jana patsacho kaykaq Lugar Santïsimuman yaykunanpaqqa manami kay patsacho cürakuna rurashqanno chïvupa y becërrupa yawarninta aparkur cada watatsu yaykurqan, sinöqa kikinpa yawarninta jicharmi juk kutila yaykurqan. Tsaynöpami rantimashqantsi imayyaqpis salvashqa kanantsipaq.
13 Törukunapa y chïvukunapa yawarninwan runakunata tsaqtsupaptin y ternërata rupatsishqan uchpata yakuman winarkur tsaqtsupaptinmi janalanpa runakuna purificashqa karqan.*
14 Jesucristo yawarninta cruzcho jichashqa kaykaptinqa manami janalantsipatsu purificashqa kaykantsi, sinöqa manakaqkunata rurashqantsipita shonquntsipis purificashqanami kaykan. Tsayno purificashqa karmi imayyaqpis kawaq Tayta Diosta sirvintsi. Jesucristuqa Espíritu Santupa munayninwan Tayta Dios munashqan sacrificiuno kar noqantsi rayku wanuptinmi tsayno purificashqa kaykantsi.
15 Tsaymi Jesucristo garantiantsi kaykan Tayta Dios mushuq pactuta cumplinanpaq. Paymi wanurqan nawpa kaq pactuta mana cumplishqantsipita perdonashqa kanantsipaq. Tsaynöpami lapanpis Tayta Dios qayashqan kaqkunaqa promitishqan herenciata chaskipäkunqa.
16 Tayta Dios rurashqan pactuqa testamentunömi kaykan. Testamentupis välin testamentu ruratsiq runa wanuptinraqmi.
17 Testamentu ruratsiq manaraq wanuptinqa testamentu manami välinraqtsu. Wanurkuptinnami itsanqa välin.
18 Tsaynölami punta kaq pactupis välinanpaqqa uywakunapa yawarninta jichatsipäkurqan.
19 Tsaymi runakuna juntakaptin leykunacho lapan mandamientukunata Moisés liyiparkur becërrukunapa y chïvukunapa yawarninta shuntarqan. Tsay yawarman yakuta yaparkurmi *hisöpu jachapa rämankunata puka hïluwan juk qeruman watarqan. Tsaypitanami yawarman jatirkur qelqaraykaq leykunata y lapan runakunatapis tsaqtsuparqan.
20 Nirkurmi kayno nirqan: “Kay yawarqa noqantsiwan Tayta Dios pactuta rurashqan yawarmi kaykan”.*
21 Tsaynölami *Sagrädu Toldutapis y lapan manëjunkunatapis tsay yawarlawan Moisés tsaqtsuparqan.
22 *Moisés qelqashqan leykunachöqa niykan purificashqa kananpaqqa yawarwanraq imapis tsaqtsupashqa kananpaqmi. Yawarta mana jichaptinqa manami runakunata jutsankunapita Tayta Dios perdonantsu.*
23 Tsaymi jana patsacho kaykaq templu niraq Sagrädu Toldutapis y lapan manëjunkunatapis uywapa yawarninwanraq purificarqan. Jana patsacho kaq templutami itsanqa mas väliq yawarwan purificarqan.
Jesucristo wanushqanpita Tayta Dios perdonamashqantsi
24 Jana patsacho kaq templu niraq kaptinpis Jesucristo manami runa rurashqan templumantsu yaykurqan, sinöqa jana patsacho kaykaq templumanmi. Kananqa Tayta Diospa nawpanchömi noqantsipaq manakuykan.
25 Tsayman yaykunanpaq juk kutilami kikinpa yawarninta jichar wanurqan. Kay patsacho mandaq cüraqa uywakunapa yawarninta apakurkur cada watami Lugar Santïsimuman yaykun.
26 Paykunanöla rurarqa kay patsata kamashqanpita kananyaqqa Jesucristo ayka kutishi wanunman karqan. Itsanqa atska kuti wanunanpa trukan juk kutilami wanurqan. Jutsantsipita perdonashqa kanantsipaqmi kay ultimu tiempucho sacrificiuno kikin wanurqan.
27 Tsaynölami lapan runakunapis juk kutila wanupäkun y tsaypitaqa juzgashqanami kanqa.*
28 Jesucristupis juk kutilami atska runakunapa jutsankunapita wanurqan. Kay patsaman kutimurqa manami runakunapa jutsankunapita yapay wanunanpaqtsu kutimunqa, sinöqa payta shuyaqkunata salvananpaqmi.
Ichic wilacuycuna
^ Sagrädu Toldu Liyinki Tinkuna Toldupita tantiyatsikuyta.
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ 9.2 Jerusaléncho kaq templupis Sagrädu Toldu rurashqanömi karqan. Tsaymi kay capïtulucho Sagrädu Toldupaq parlarqa Jerusaléncho kaq templupaqpis parlaykan.
^ 9.2a Éxo. 25.31-40.
^ 9.2b Éxo. 25.23-30.
^ 9.3 Éxo. 26.31-33.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 9.4a Éxo. 30.1-6.
^ Pactu Babul Pactu Babulqa jananpa y rurinpa qoriwan enchapashqa cajonmi karqan. Tsay babulpa jananchönami qoripita rurashqa ishkay angilkuna kaykarqan. Tsay babulchömi churaraykarqan ishkay läjaman Tayta Dios qelqashqan chunka mandamientukuna, Aarónpa tukrun y Tayta Dios kamaripashqan maná mikuypis. Pactu Babultami Tayta Dioswan Tinkuna Toldu ruriman churarqan. Castellänuchöqa Pactu Babultami “arca del pacto” nipäkuq (Éxo. 25.10-22; 37.1-9).
^ 9.4b Éxo. 25.10-16.
^ maná Manáqa karqan culandrupa murunno y jachapa weqin niraq qarwashlami. Tsay mikuytami Israel runakunata Tayta Dios kamariparqan chunyaq tsaki jirkacho. Tsaytami ankaypapis machkaypapis y tantata ruraykurpis mikupäkurqan. Israel runakunaqa chusku chunka (40) watami tsay mikuyta mikupäkurqan (Éxo. 16; Núm. 11.4-9; Juan 6.31).
^ 9.4c Éxo. 16.33.
^ 9.4d Núm. 17.8-10.
^ 9.4e Éxo. 25.16; Deut. 10.3-5.
^ 9.5 Éxo. 25.18-22.
^ babulpa tsapanan Babulpa tsapananpa jutinmi hebreucho karqan kapporet. Kapporet ninanqa tsapanan ninanmi y jutsata perdonashqan ninanmi. Wakin castellänu traduccionkunaqa propiciatoriu nirmi tsay palabrata traducin. Babulpa tsapanan jananpitami Moisésta Tayta Dios parlaparqan (Éxo. 25.22). Tsaynöpis babulpa tsapanan jananman pukutaycho Tayta Dios yurimurqan (Lev. 16.2). Israel runakuna purificashqa kananpaq kaq junaqchömi mandaq cüra babul kashqanman yaykur turitupa yawarninman dëdunta jatirkur babulpa tsapananta tsaqtsuparqan (Lev. 16.14).
^ querubín Querubinqa älayuq angilkunami karkaykan. Querubinkunatami Tayta Dios churarqan Edén huertata täpananpaq (Gén. 3.24). Tsaynölami Pactu Babulpa tsapanan jananchöpis qoripita rurashqa ishkay querubinkuna ichiraykarqan (Éxo. 25.18-22; Heb. 9.5). Salomón ruratsishqan templuchöpis ishkay querubinkunami qoriwan enchapashqa karqan. Tsay querubinkunapa altunmi karqan chusku metru pulan (1Rey. 6.23-29). Profëta Ezequielpis revelacionchömi querubinkunata rikarqan (Eze. 10.1-22; 41.18-19).
^ 9.6 Éxo. 27.20-21; Lev. 24.8.
^ 9.7 Lev. 16.2-34.
^ 9.8 Sagrädu Toldu kashqanyaq ninanqa nawpa kaq pactu kashqanyaq ninanmi.
^ 9.10a Lev. 11.2-25.
^ 9.10b Núm. 6.2-3.
^ 9.10c Lev. 15.8; Núm. 19.13.
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ 9.13 Núm. 19.1-22.
^ hisöpu Hisöpuqa muñä jachanömi kaykan. Israel runakuna impüru kashqanpita püru kananpaqmi hisöpu jachata yawarman ushmarkatsir tsaqtsupaq (Éxo. 12.22; Núm. 19.18; Sal. 51.7; Heb. 9.19).
^ 9.19-20 Éxo. 24.3-8; Zac. 9.11; Mat. 26.28.
^ Sagrädu Toldu Liyinki Tinkuna Toldupita tantiyatsikuyta.
^ Moisés qelqashqan leykuna Moisés qelqashqan leykunaqa kaykan Sinaí jirkacho Tayta Dios tantiyatsishqan mandamientukuna y leykunami. Tsay leykunatami Moisés qelqarqan Éxodo, Levítico, Números y Deuteronomio librukunacho.
^ 9.22 Lev. 17.11.
^ 9.27 Apoc. 20.11-13.
