Hechos 27:1-44
27 Autoridäkuna wilanakurkurmi Pabluta Italiaman* apatsinanpaq wakin prësukunatawan capitán Juliuman entregarqan. Juliuqa kaykarqan Augusto nishqan tröpapa capitanninmi.
2 Tsaymi witsäpäkurqä* Adramitiupita shamuq *büquiman. Tsay büqui Asia provinciacho kaq puertukunaman aywananpaqmi yarquykarqan. Pabluta yanaqänäpaqmi Aristarcuwan aywapäkurqä. Aristarcuqa karqan Macedonia provinciacho kaykaq Tesalónica markapitami.
3 Jukaqnin junaqnami Sidónman chayar capitán Juliuqa Pabluta kuyapashpan kayno nirqan: “Imalawanpis yanapashunaykipaq reqinakushqaykiman ayway”.
4 Sidónpita yarqupäkuptïnami fiyupa wayrämuptin Chipre isla kuchulanpa aywapäkurqä.
5 Tsaypita Cilicia y Panfilia tsimpanpa pasarmi chayapäkurqä Liciacho kaq Mira markaman.
6 Tsaychömi capitán Julio tarirqan Alejandríapita Italiaman aywaykaq büquita. Tsaymi tsay büquimanna witsätsipäkamarqan.
7 Tsaypita yarqur atska junaq pasaypa nakarmi Gnido markapa nawpalanpa pasapäkurqä. Tsaypa aywarkaykaptï fiyupa wayrämuptinmi Creta islapa tumar Salmón nishqan nawpanpa pasapäkurqä.
8 Creta isla kuchunpa aywayta nakarmi Buenos Puertos markaman sasataraq chayapäkurqä. Tsay markaqa kaykan Lasea markapa cercanchömi.
9 Atska junaq pasashqana kaptinmi tamya witsan qalaykunanpaqna karqan. Tsaymi pasapäkunäpaq mana alina kaptin büquicho aruq runakunata Pablo kayno nirqan:
10 “Taytakuna, amana aywashunnatsu. Jinapa aywaptintsiqa büquipis cargapis ushakanqami. Noqantsipis capazchari ushakäshun”.
11 Pablo tsayno niptinpis capitanqa manami wiyaq tukurqantsu, sinöqa büquipa duëñunta y büqui manijaqtami cäsukurqan.
12 Tamya witsan Buenos Puertuscho qoyäpäkunäpaq mana ali kaptinmi lapanïpis yarpapäkurqä Cretacho kaykaq Fenice markaman aywayta. Fenicichömi itsanqa tamya witsanpis büqui ichinanpaq ali karqan.
Wayrapis y tamyapis fiyupa kashqan
13 Aywapäkunäpaq wayra ali kaptinnami *büquicho aruqkuna yarparqan Feniciman chayanäpaqna kashqanta. Tsaymi büquipa anclankunata* shuntarkur Creta isla kuchulanpa aywapäkurqä.
14 Yarqupäkushqäpita rätulantami Euroclidón nishqan shukukuy wayra Cretapita fiyupa wayrämurqan.
15 Tsaymi wayra shamushqanpa aywayta mana atipar *büqui manijaqkuna kachapariykurqan wayra apashqalanpana büqui aywakunanpaq.
16 Tsaypita Clauda nishqan taksha islapa aywarmi qarachaypa apashqan taksha büquita pasaypa nakarraq büqui jananman witsarkatsir watarqä.
17 Tsaypitanami aywarkaykashqä jatun büquitapis mana latkikänanpaq* waskakunawan watapäkurqan. Nirkurmi lamar rurincho Sirte nishqan aquyshaman chayananta mantsakur büquipa juk anclanta kacharpurqan despaciu aywapäkunäpaq. Nirkurmi wayra apashqalanpa aywapäkurqä.
18 Tsaypita jukaqnin junaqpis tsaynöla fiyupa wayrämuptinmi büquipita cargankunata lamarman jitapäkurqan.
19 Büquipa anclanta kacharpushqanpita kimsa kaq junaqnami büquicho aläpa mana nistakashqan kaqkunatapis jitapäkurqan.
20 Pukutay tsaparaptinmi intipis ni qoylarpis atska junaq mana rikakarqantsu. Fiyupa wayrämuptinmi ushakänäpaq kashqantana yarpapäkurqä.
21 Atska junaqna miküni qoyäpäkuptïmi Pablo ichiykur lapäkunata kayno nipäkamarqan: “Taytakuna, Creta islapita mana yarqamunantsipaq nishqäta cäsukamaptikiqa manami kayjinanpa nakashwantsu karqan ni imakunatapis lamarman jitashwantsu karqan.
22 Tsayno kaptinpis ama lakikäriytsu. Manami mayqantsipis wanushuntsu. Büquimi itsanqa ushakanqa.
23 Qanyan tsakaymi sirvishqä Tayta Dios kachamushqan ángel yuriparkamar
24 kayno nimashqa: ‘Pablo, ama mantsakuytsu. Romacho mandaq *César juzgashunaykipaq chayankiraqmi. Büquicho kaykaq runakunatapis qam raykumi Tayta Dios salvanqa’.
25 Taytakuna, ángel tsayno niykämaptinqa ama mantsakushuntsu. Tayta Diosmanmi noqa yärakü. Ángel nimashqannölami kanqa.
26 Büqui ushakaptinpis isla kuchunmanmi lamar jitarimäshun”.
27 Adriático nishqan lamarcho ishkay semänana wayra puriykätsimaptinmi büqui manijaqkuna pulan paqasno tantiyapäkurqan tsaki patsaman chayarkaykashqäta.
28 Yakupa hondunta tupuptinmi kimsa chunka soqta (36) metru karqan. Yapay tupuptinmi ishkay chunka qanchis (27) metrulana kaykarqan.
29 Tsaymi rumikunacho büqui takakänanta mantsakur büqui ichinanpaq chusku anclankunata watarkur büqui qepanpa kacharpurqan. Nirkurmi patsa warashqanyaq tsaycho shuyarparqä.
30 Büqui manijaqkuna qeshpikuyta munarmi büqui puntanpapis anclata urätsiq tumpala taksha büquita urätsipäkurqan.
31 Qeshpiyta munashqanta tantiyarmi capitanta y soldädukunata Pablo wilarqan kayno nir: “Büqui manijaqkuna aywakuptinqa manami salvakärinkitsu”.
32 Tsayno niptinmi taksha büqui wataraq waskakunata soldädukuna kutsurirqan lamarman shikwananpaq.
33 Patsa wararkuptinnami runakunata Pablo kayno nirqan: “Mikushunna, taytakuna. ‘Imaraq pasamäshun’ nir lakikushpantsimi ishkay semäna mana mikushqantsitsu.
34 Kananqa kaway tsaraqlantsipaqpis mikurkushunraq. Manami mayqantsipis wanushuntsu”.
35 Nirkurmi tantata aptarkur lapanpa nawpancho Tayta Diosta agradëcikurqan. Nirkurmi tantata pakirishpan mikuyta qalaykurqan.
36 Pablo mikuykaqta rikarmi lapan mikupäkurqan.
37 Büquicho aywaqkuna karqä ishkay pachak qanchis chunka soqta (276) runakunami.
38 Saksashqa mikurkurnami büqui ankashyänanpaq apashqan trïguta lamarman jitapäkurqan.
Büqui takakar ushakashqan
39 Patsa wararkuptinnami chayarkaykashqä tsaki patsata rikarpis *büqui manijaqkuna mana reqipäkurqantsu maycho kaykashqantapis. Pläyata rikaykurnami büquita tsayman chayatsiyta munarqan.
40 Tsaymi wataraq waskakunata kutsurir anclakunata lamarcho kacharirqan. Nirkurmi timonnin wataraqta paskarir büquita wayra apananpaq kaq jatun rakta tëlata witsätsipäkurqan. Tsaymi lamar kuchunman büqui aywayta qalaykurqan.
41 Aywaykashqanchömi büquipa puntan aquyshaman jatikäkurqan. Tsaymi yaku jaytaykälar büquipa qepan kaqta pakir usharqan.
42 Tsawraqa prësukuna mana qeshpinanpaq soldädukuna wanutsiyta munapäkurqan.
43 Tsayno yarpaptinpis Pabluta salvayta munarmi capitán kayno nirqan: “Ama pitapis wanutsipäkuytsu. Nadyayta yachaqkunaqa yaku kuchunman yarqupäkutsun.
44 Wakinkunana tablakunata o büqui pakipankunata tsarikurkur yaku kuchunman imanöpapis yarqupäkutsun”.
Tsaynöpami lapanï yakupita yarqupäkurqä.
Ichic wilacuycuna
^ 27.1 Italia nacionchömi Roma kaykan. Tsaychömi mandaq César tarqan.
^ 27.2 Kay libruta qelqaq Lucaspis Pabluwanmi Romaman aywarqan.
^ büqui Büquiqa yaku jananpa purinanpaq tablapita rurashqa jatunkaray artësanömi kaykan. Tsay büquikunawanmi lamarcho y jatun qochakunacho pescäduta tsaripäkun y juk lädu markakunapapis aywapäkun. Bibliata qelqashqan witsanqa qeruta cruztano ruraykurmi büquicho ichitsipäkurqan. Tsay cruzmanmi rakta tëlata ishkan jana kaq kuchunkunapita watarqan. Ura kaq kuchunkunatanami büquiman watapäkurqan wayraptin aywananpaq (Luc. 8.22-25; Hech. 27.17).
^ büqui Büquiqa yaku jananpa purinanpaq tablapita rurashqa jatunkaray artësanömi kaykan. Tsay büquikunawanmi lamarcho y jatun qochakunacho pescäduta tsaripäkun y juk lädu markakunapapis aywapäkun. Bibliata qelqashqan witsanqa qeruta cruztano ruraykurmi büquicho ichitsipäkurqan. Tsay cruzmanmi rakta tëlata ishkan jana kaq kuchunkunapita watarqan. Ura kaq kuchunkunatanami büquiman watapäkurqan wayraptin aywananpaq (Luc. 8.22-25; Hech. 27.17).
^ 27.13 Anclaqa jatunkaray shimpinayuq fiërrukunami kaykan.
^ büqui Büquiqa yaku jananpa purinanpaq tablapita rurashqa jatunkaray artësanömi kaykan. Tsay büquikunawanmi lamarcho y jatun qochakunacho pescäduta tsaripäkun y juk lädu markakunapapis aywapäkun. Bibliata qelqashqan witsanqa qeruta cruztano ruraykurmi büquicho ichitsipäkurqan. Tsay cruzmanmi rakta tëlata ishkan jana kaq kuchunkunapita watarqan. Ura kaq kuchunkunatanami büquiman watapäkurqan wayraptin aywananpaq (Luc. 8.22-25; Hech. 27.17).
^ 27.17 Wakin runakunaqa laktsikänanpaq nipäkun.
^ César Césarqa manami runapa jutintsu karqan, sinöqa Roma nacioncho mandaq rey ninanmi. Césarqa Romapita patsami atska nacionkunata mandarqan. Jesucristo yurishqan witsan mandaq kaykarqan Augusto Césarmi (Luc. 2.1). Paymi Herodesta churarqan Israel nacioncho rey kananpaq. Augusto Césartami trukarqan Tiberio César. Tiberio César mandaq karqan Bautizaq Juan wilakunan witsanmi (Luc. 3.1). Tiberio Césartanami trukarqan Calígula César. Paytanami trukarqan Claudio César. Claudio César mandaq kaykaptinmi apóstol Pablo wilakur purirqan (Hech. 11.28; 18.1). Claudio Césartanami trukarqan Nerón César. Nerón César mandaq kaykaptinmi apóstol Pablo Romacho wanurqan (Juan 19.12).
^ büqui Büquiqa yaku jananpa purinanpaq tablapita rurashqa jatunkaray artësanömi kaykan. Tsay büquikunawanmi lamarcho y jatun qochakunacho pescäduta tsaripäkun y juk lädu markakunapapis aywapäkun. Bibliata qelqashqan witsanqa qeruta cruztano ruraykurmi büquicho ichitsipäkurqan. Tsay cruzmanmi rakta tëlata ishkan jana kaq kuchunkunapita watarqan. Ura kaq kuchunkunatanami büquiman watapäkurqan wayraptin aywananpaq (Luc. 8.22-25; Hech. 27.17).
