Hechos 9:1-43
9 Saulunami Señor Jesúspa discïpulunkunata wanutsiyta munashpan mas mandaq cüraman aywaykur
2 kayno nirqan: “Ordinta qoykalämay Damascucho kaykaq *sinagögakunaman yaykur Diospa Nänin qatiraqkunata* warmitapis olqutapis Jerusalénman prësu apamunäpaq”.
3 Ordinta jorqurir aywaykaptinmi Damasco markaman chayaykaptin ciëlupita atski elaqpita chipchipyar fiyupa atsikyaparqan.
4 Tsaymi Sauluqa pampaman tunir kayno nimuqta mayarqan: “Saulo, Saulo, ¿imanirtaq qatikachaykämanki?”
5 Tsawraqa Saulo kayno nirqan: “¿Pitaq kanki, Tayta?”
Niptinmi kayno nirqan: “Noqaqa qatikachaykashqayki Jesúsmi kaykä. [Picata töru jaytar däñakushqannömi kikilayki mana alita rurakuykanki”.
6 Tsayta mayaykurmi mantsakuywan siksikyashpan Saulo kayno nirqan: “¿Imatataq rurashaq, Tayta?”
Tsaynami Señor Jesús kayno nirqan:] “Sharkur Damascuman ayway. Tsaychönami imata ruranaykipaqpis wilashunki”.
7 Parlamushqanta mayar pitapis mana rikashpanmi Sauluwan aywaykaqkuna pasaypa mantsakarqan.
8 Saulunami tunishqanpita sharkurkur rikachakurpis imatapis mana rikarqannatsu. Tsawraqa paywan aywaq runakuna janchaylapa Damascuman yaykatsirqan.
9 Tsaychömi mikuytapis mana mikuypa ni yakutapis mana upuypa kimsa junaq qaprayashqala qoyarqan.
10 Damascuchömi juk discïpulu tarqan Ananías jutiyuq. Paytami Señornintsi yuriparkur kayno nirqan: “¡Ananías!”
Niptinmi kayno nirqan: “¿Imataq, Tayta?”
11 Tsawraqa Señornintsi kayno nirqan: “Jukla ayway Derëcha nishqan cälliman. Judaspa wayinman chayaykur tapukunki Tarso markapita Saulo runapaq. Tsay wayichömi Tayta Diosta pay manakuykan.
12 Paymi revelacioncho rikashushqanki yapay rikananpaq makikita umanman churaykur manakuykashqaykita”.
13 Niptinmi Ananías kayno nirqan: “Tayta, tsay runapaqqa atskaqmi parlapäkun qamman yärakuqkunata Jerusaléncho pasaypa nakatsishqanta.
14 Kananpis mandaq cürakunapita ordinninta jorqurkurshi kayman shamushqa qamman yärakuqkunata prësu apananpaq”.
15 Tsawraqa Señornintsi kayno nirqan: “Ayway. Wilakuynïta wilakunanpaqmi tsay runata akrashqä. Paymi wilapanqa juk lädu nación runakunata, reykunata y Israel mayinkunatapis.
16 Paytami musyatsishaq noqa rayku fiyupa nakananpaq kashqanta”.
17 Tsayno niptinmi Ananías Saulo kaykashqan wayiman aywarqan. Chayaykurmi Saulupa umanman makinta churaykur kayno nirqan: “Wawqi Saulo, nänicho yuripäshuqniki Señor Jesúsmi kachamashqa qaprayashqaykipita aliyänaykipaq y Espíritu Santupa munaynincho kanaykipaq”.
18 Ananías parlayta usharkuptinmi jinan höra Saulupa nawinpita pescädupa escämanno shikwarqan. Tsayno shikwaptinmi Saulo rikarqanna. Nirkurnami *bautizakurir
19 mikuyta mikurkuptin kalpan yurikurqan. Damascuchömi discïpulukunawan* ishkay kimsa junaq qoyarqan.
Jesúspita Damascucho Saulo wilakushqan
20 Tsaypitanami Tayta Diospa Tsurin Jesús kashqanta *sinagögakunacho Saulo wilakuyta qalaykurqan.
21 Wilakushqanta mayarmi runakuna mantsakashqa kayno nipäkurqan: “¿Manaku kay runaqa Jesúsman yärakuqkunata Jerusaléncho qatikacharqan? ¿Manaku kaymanpis shamushqa prësu tsarir mandaq cürakunaman apananpaq?”
22 Waralan waralanmi Saulo mas tantiyar wilakurqan Jesús salvamaqnintsi Cristo kashqanta. Tsayno wilakuptinmi Damascucho taq Israel runakuna ima niytapis mana kamäpakurqantsu.
Israel runakunapita Saulo qeshpishqan
23 Tsaypita atska junaq pasarkuptinnami Israel runakuna wilanakurqan Sauluta wanutsipäkunanpaq.
24 Wanutsiyta munar paqasta junaqta marka yarquna punkucho shuyarpashqantami Saulo musyarqan.
25 Tsawraqa discïpulukuna tsakaypa jatun canastaman winarkur marka murälla jananpa Sauluta urätsirqan.*
Jerusaléncho Saulo wilakushqan
26 Jerusalénman Saulo chayaykurmi Jesúspa discïpulunkunawan juntakayta munarqan. Munaptinpis Jesústa chaskikushqanta mana criyirmi discïpulukunaqa paywan juntakayta mantsakärirqan.
27 Tsawraqa *apostolkunawan reqinakatsinanpaq Sauluta Bernabé pusharqan. Reqinakarkatsirnami wilaparqan Señornintsi nänicho yuriparkur Sauluta parlapashqanta. Tsaynölami wilaparqan Damascucho mana mantsakuypa Jesúspa jutincho wilakushqanta.
28 Tsaynöpami apostolkunawan Jerusaléncho Saulo purir Jesúspa jutincho mana mantsakuypa wilakurqan.
29 Tsayno wilakurmi griego idiömata parlaq Israel runakunawan rimanakurqan. Tsay runakuna Sauluta wanutsiyta munashqanta
30 musyarmi wawqi panikuna pusharqan Cesarea markaman. Tsaypitanami markan Tarsuman despacharkurqan.
31 Tsaypitaqa Judeacho, Galileacho y Samariachöpis Jesúsman yärakuqkuna jawkanami kawapäkurqan. Tayta Diosta *mantsakur pay munashqanno kawananpaq Espíritu Santu yanapaptinmi mas atskayarqan.
Eneasta Pedro aliyätsishqan
32 Pedrunami yärakuq mayinkunata maytsaypa watukur purishpan Lida markamanpis chayarqan.
33 Tsaychömi Eneasta tarirqan paralïticu kar pusaq watana cämalancho jitaraykaqta.
34 Tsaymi Pedro kayno nirqan: “Eneas, Jesucristumi aliyätsishunki. ¡Sharkuy! ¡Cämaykita shuntay!”
Tsayno niptinmi Eneas jinan höra aliyashqana sharkurkurqan.
35 Tsayta rikarmi Lidacho y Saróncho taq runakuna Señor Jesucristuman yärakärirqan.
Tabita kawarimushqan
36 Jope markachömi juk discïpulu tarqan Tabita jutiyuq warmi. Tabita ninanqa griego idiömacho Dorcas ninanmi. Tsay warmimi imaypis alilata ruraq y waktsakunatapis yanapaq.
37 Qeshyawan wanuykuptinmi armarkatsir wayi janancho kaykaq cuartuman tsutarqan.
38 Jopipita Lida markamanqa cercalami kaykan. Tsawraqa Lidacho Pedro kaykashqanta mayaykurmi ishkay runakunata discïpulukuna kacharqan kayno nir ruwakamunanpaq: “Jopimanshi jukla aywaykuläshun”.
39 Tsawraqa paykunawan Pedro aywar chayaykuptinmi yaykatsirqan aya tsutaraykashqan cuartuman. Tsaychömi Tabita yanapashqan viüdakuna waqar Pedruta rikatsipäkurqan paykunapaq rurapashqan röpankunata.
40 Tsawraqa tsaycho kaykaqkunata waqtaman qarqurir qonqurpakuykur Tayta Diosta Pedro manakurqan. Nirkurmi ayata kayno nirqan: “¡Tabita, sharkuy!”
Tsayno niptinmi wanushqa tsutaraykashqanpita jinan höra kawarimur Pedruta rikärir jamarkurqan.
41 Tsaymi makipita tsarirkur Pedro sharkatsirqan. Tabita kawarimushqanta rikananpaqnami waqtacho kaykaq viüdakunata y wawqi panikunata qayarqan.
42 Tabita kawarimushqanta intëru Jope markacho mayapäkurmi Señor Jesucristuta atskaq chaskikärirqan.
43 Tsay markachömi suëla ruraq Simónpa wayincho atska junaq Pedro patsararqan.
Ichic wilacuycuna
^ sinagöga Sinagögaqa Israel runakuna juntakänan wayimi karqan. Tsaymanmi juntakäriq Tayta Diosta manakärinanpaq, Moisés qelqashqan leykunata yachakärinanpaq, sesionkunata rurapäkunanpaq y wamrakuna liyiyta yachakärinanpaq (Mar. 1.21; Juan 9.34; Hech. 15.21).
^ 9.2 Diospa Nänin qatiraqkunapaq parlarqa Jesucristuman yärakuqkunapaqmi parlaykan.
^ bautizay Jesucristuta chaskikuqkuna bautizakurqa runakunata musyatsipäkun jutsankunata kacharishqanta, Jesucristuman yärakärishqanta y Jesucristuta cäsukärinanpaq kashqantami. Discïpulunkunatami Jesucristo nirqan payta chaskikuqkunata bautizananpaq (Mat. 28.19; Mar. 16.16).
^ 9.19 Discïpulukunapaq parlarqa Jesucristuman yärakuqkunapaqmi parlaykan.
^ sinagöga Sinagögaqa Israel runakuna juntakänan wayimi karqan. Tsaymanmi juntakäriq Tayta Diosta manakärinanpaq, Moisés qelqashqan leykunata yachakärinanpaq, sesionkunata rurapäkunanpaq y wamrakuna liyiyta yachakärinanpaq (Mar. 1.21; Juan 9.34; Hech. 15.21).
^ 9.23-25 2Cor. 11.32-33.
^ apóstol Apóstol ninanqa “wilakunanpaq kachashqan runa” ninanmi. Apostolkunataqa Jesucristumi kacharqan maytsaymanpis aywar wilakuyninta wilakunanpaq. Tsay apostolkunaqa karqan chunka ishkaymi. Jesucristo wanushqanpita kawarirkamurmi Pablutapis yuriparkur churarqan apóstol kananpaq (Mar. 3.14; Luc. 6.13-16; 1Cor. 9.1-2). Apostolkunatami Jesucristo nirqan Espíritu Santu shamur lapanta yachatsinanpaq kashqanta y Jesucristo yachatsishqanta yarpätsinanpaq kashqanta (Juan 14.25-26; 16.12-15). Tsaynöpami Jesucristupa apostolninkuna y paykuna autorizashqan runakuna Mushuq Testamentuta qelqapäkurqan.
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
