Job 10:1-22
10 “¡Kawaytapis pasaypanami ajayashqä!Tsaymi lapan yarpashqäkunata nishaq.Imapita lakikushqätapis lapantami nishaq.
2 Tayta Diosta kayno nishaq:‘Amana castigaykamaynatsu.Mana rabyanätsinäpaq ima jutsa rurashqätapis wilaykalämay.
3 Kikiki kamaykämarqa ¿imanirtaq kayjinanpa nakatsimanki?Fiyu runakunataqa ¿imanirtaq yanapanki?
4 “ ‘Qamqa manami runakuna rikashqannötsu rikanki.Manami tantiyashqannötsu imatapis tantiyanki.
5 Tsaynöpis manami yupashqa watala kawapäkushqannötsu kawanki.
6 Tsayno kaykarqa ¿imanirtaq jutsa rurashqäkunata ashiykanki?
7 Tsayno ashiykanki jutsaynaq kashqäta musyaykarmi.Qampa makikipita manami pipis salvamanqatsu.
8 “ ‘Kikikimi makikiwan kamamashqanki.¿Tsayno kaykarku kananqa ushakätsimayta munaykanki?
9 Mitulapita kamamashqaykita yarpaykulay.¿Tsayno kamarkamarku polvuman tikratsimayta munaykanki?
10 “ ‘Lëchita cuwäjuwan quësuyätsiqnömi cuerpüta rurashqanki.
11 Tulükunata y anku ankükunatapis shumaqmi kamakätsishqanki.Nirkurmi aytsäta y qarätapis yuritsishqanki.
12 Kuyamashpaykimi kawayta qomashqanki.Ali kawanäpaqmi waran waran yanapamashqanki.
13 “ ‘Tsayno kaptinpis tsayraqmi tantiyakü imanir tsayno yanapamashqaykitapis.
14 Qamqa rikaykämashqankimi jutsata ruraptï castigamänaykipaq.
15 Jutsata ruraptï castigamankimi.Jutsaynaq kaptïpis tsaynölami nakatsimanki.Noqapaqqa kawaypis kawaynatsu.
16 Runa tukuptïmi leonno atacamar munaynikiwan mantsariypaq castïguwan castigaykämanki.
17 Acusamänayki kashqami achäquitapis ashiykanki.Imaypis tsaynölami noqapita rabyashqa kaykanki.Soldädukunawan atacaqnömi yaparir yaparir atacaykämanki.
18 “ ‘¿Imapaqtaq yurinätapis munarqayki?Pipis manaraq rikamaptin wanuküman karqan.
19 Mamäpa pachalanpitana pampaykamaptinqa imaypis mana yurishqanömi käman karqan.
20 “ ‘Ushakänäpaqna kaykaptinqa ichiklatapis kushishqa kawarkunäpaq kachaykalämay.*
21 Wanukurnaqa imaypis mana kutimuqmi yanawyaykaq tsakayman aywakushaq.
22 Tsay patsaqa fiyupa yanawyaykaqmi kaykan.Tsaynöpis pasaypa mantsakuypaqmi kaykan.Tsaychöqa manami atskipis kantsu’ ”.
Ichic wilacuycuna
^ 10.20 Sal. 39.13.
