Job 16:1-22
16 Tsayno niptinmi Job kayno nirqan:
2 “Qamkuna nishqaykitaqa pïmay upa runalapis parlanmi.Kushitsimänaykipa trukanqa masmi lakikatsimanki.
3 ¡Imayyaqraq manakaqkunalata rimarkaykanki!¿Imachötaq achäquita ashipashqä tsayno nimänaykipaq?
4 “Noqapis sänu karqa qamkunanölami nïman.Asikushpämi shimï tarishqanta imaykatapis rimäman.
5 Tsayno kaptinpis rimashqäkunaqa manami alitsu kanman.Parlaparqa qamkunata shumaqmi shakyätsïman.Mana lakikunaykipaqmi ali shimilapa tantiyatsïman.
6 “Kay nanämashqanqa imata rimaptïpis ni upälakuptïpis manami chawantsu.
7 Tayta Diosmi kalpäta ushakätsishqa.Lapan amïgükunatami wakpa kaypa qarqushqa.
8 Qaqlä shintikashqanta y pasaypa uyutashqätami pïmaypis rikaykäman.Kayno nakaykaqta rikamarmi yarpapäkun jutsata rurashqäpita nakaykashqäta.
9 “Fiyu uywa atacaqnömi noqatapis Tayta Dios atacaykäman.Rabyashqa karmi mana kuyapaypa nakaykätsiman.Kachkachyayparaqmi rabyaykun.Chikimaq runanömi nanaq nawinpa rikapäman.
10 Tsaymi runakuna juntakaykur conträ rimapäkun.Tsaynöpis asipämashpanmi laqyapäkaman.Lapanpis conträmi rikakushqa.
11 Fiyu runakunapa munayninmanmi Tayta Dios churamashqa.Jutsa ruraq runakunapa makinmanmi kachaykamashqa.
12 “Nawpataqa alimi kawarqä.Tsayno kaykaptïmi Tayta Dios elaqpita nakayman churamashqa.Kunkapita lapiraqnömi tsararaykäman.Flëchawan flëchamaqnömi atacaykäman.
13 Flëchaqninkunawanpis wakpita kaypitami flëchatsiman.Mana kuyapaypami rurunnïkunatapis tuksimashqa.Tsaynölami ayaq chiwinnïtapis pashtashqa.
14 Yaparir yaparirmi Tayta Dios pasaypa nakatsimashqa.Contranta atacaq soldädunömi mana kuyapaypa atacamashqa.
15 “Tsaymi fiyupa lakikur qachqa röpata jatikushqä.Nanaywan qochpaptïmi umämanpis alpa juntashqa.
16 Pasaypa waqaptïmi nawïpis pukayar jakashqa.
17 Lapan tsaykunami pasaykäman pitapis mana nakaykätsiptï y lapan shonqüwan Tayta Diosta manakuykaptï.
18 “¡Ay patsala patsa!¡Yawarnïtaqa ama upukuytsu!¡Kayno nakashqäta pïmaypis musyaykulätsun!
19 “Ima kaptinpis jana patsacho favornï parlananpaq kaykanmi.Paymi itsanqa yanapamanqa.
20 Amïgükuna conträ sharkuptinpis Tayta Diosta waqapar paymanmi yärakü.
21 Favornin rimaqta juk runa munashqannömi noqapis favornï rimaqta munaykä.
22 Noqaqa walka watalanami kawashaq.Wanukurqa manami imaypis kutimushaqnatsu.
