Job 24:1-25
24 “Lapanpaq munayniyuq Tayta Dios lapantapis rikaykarqa ¿imanirtaq fiyu runakunata mana castigantsu?
2 Fiyu runakunaqa chakrapa mujunninpaq jawishqan wankatapis wititsipäkunmi.*Suwakuy uyshakunalatami mitsirkaykanpis.
3 Waktsakunapa bürruntapis qechupäkunmi.Viüdapa juklayla töruntapis prendami tsarikuykun.
4 Waktsakunataqa nänipa puriptinpis michäpäkunmi.
“Tsayno kapäkuptinmi maytsaychöpis waktsakunaqa mantsakur pakakärin.
5 Chunyaq jirkacho qewata chucaru bürru ashishqannömi waktsakunaqa mikuyta ashipäkun.Tsurinkunapaqpis chunyaq jirkalachömi mikuyta ashipäkun.
6 Imanpis mana kaptinmi trïgutapis üvatapis fiyu runapa chakralancho palapakärin.
7 Punur qatakunanpaq cämanpis mana kaptinmi qasaylacho wararkärin.
8 Jirkakunacho taptin tamya pasaypa shututuylami ushman.Tsaymi lantukunanpaq qaqakunalaman aywapäkun.
9 “Fiyu runakunaqa viüda wachaykuptin itinta juklami apakärin.Waktsakunapa imantapis prendami tsarikarkärin.
10 “Waktsakunaqa röpaynaqlami puripäkun.Trïguta ashtapakurpis pasaypa yarqaykarmi qoyarkärin.
11 Yakunaypita wanuykarmi aceitita rurananpaq aceitünasta aqapäkun.Vïnuta rurananpaqmi üvatapis jarupäkun.
12 Markachöpis pasaypa nakatsiptin wanunar manakuptinpis Tayta Dios manami cäsuntsu.
13 “Wakin runakunaqa Tayta Diosta mana cäsukurmi imayka jutsatapis rurapäkun.
14 Wanutsikuq runakunaqa patsa wararkuptinmi waktsakunata wanutsipäkun.Patsa tsakarpuptinqa suwakuqnami aywapäkun.
15 “Warminta jarukuq runakunaqa patsa tsakarpunalantami shuyarpaykan.Patsa tsakarpuptinqa pipis mana reqinanpaqmi qaqlanta tsapakurkur aywapäkun.
16 “Suwa runakunaqa tsakaypami wayikunaman suwakuq yaykapäkun.Pipis mana reqinanpaqmi junaqpa pakarpäkun.
17 Patsa waränantapis manami munapäkuntsu.Tsakaypaqa manami pitapis mantsakärintsu.
18 “Fiyu runakunaqa yakuno pasaqlami karkaykan.Chakrankunapis maldicionädu kaptinmi üva chakrankunacho pipis mana arunnatsu.
19 Fiyupa usyaptin raju tsulur ushakashqannömi jutsa ruraq runapis wanur ushakanqa.
20 Paykunataqa mamanpis qonqaykunmi.Kurukunami mikur ushanqa.Yörata mutur ushashqannömi ushapäkunqa.Tsaymi pipis paykunata mana yarpanqanatsu.
21 “Tsay fiyu runakunaqa qoluq warmikunata manakaqmanmi churapäkun.Viüdakunatapis manami yanapantsu.
22 Munayniyuq kaptinpis tsay runakunataqa Tayta Diosmi ushakätsinqa.Paykunaqa manami imanöpapis salvakunqatsu.
23 Shonqun yarpashqanno kawananpaq kachaparpis Tayta Diosqa imata rurashqantapis rikaykanmi.
24 Fiyu runakunaqa rätulami ali kawapäkun.Nirkurqa manaraqpis aykälatami elqakäkun.Achushqa qewanömi wanupäkun.Achushqa trïgunömi ushakäkun.
25 “¿Tsaynöku o manaku?Nishqäkunaqa rasunpami kaykan.Tsawraqa parlashqäta pipis ama manakaqman churatsuntsu”.
Ichic wilacuycuna
^ 24.2 Deut. 19.14; 27.17; Prov. 22.28; 23.10.
