Job 5:1-27
5 “¡Job, pilapis yanapashunaykipaq fuerti qayakuy!Mä pilapis mayashunkikush.Yanapashunaykipaq manami angilpis kantsu.
2 Rabyashqa y jaqayashqa karqa manaraqpis aykälatami wanunkipaq.Mana tantiyakuq runakunalami tsayno kawapäkun.
3 “Rikashqämi mana tantiyakuq runa imaykayuqpis kashqanta.Itsanqa maldicionädu kaptinmi imaykanpis chipyaq ushakan.
4 Tsay runapa tsurinkunata pipis manami yanapantsu.Autoridäkunapis paykuna quejakushqanta manami arreglantsu.Pipis manami paypa favornin sharkuntsu.
5 Kashawan chakran qenchashqa kaykaptinpis murukushqankunata waktsakunami apakärin.Lapan imaykantapis muchuqkunami chipyaq ushakurkun.
6 “Runaqa nakan mana alita rurashqanpitami.Alita rurarqa manami nakantsu.
7 Chispa saltaptin wayra imaypis apashqannömi runa imaypis nakan.
8 “Qamno nakarqa Tayta Diostami manaküman perdonamänanpaq.Aliyätsimänanpaqmi payta ruwaküman.
9 Milagrukunata rurashqantaqa manami yupaytapis atipantsitsu.Mantsariypaq rurashqantaqa manami tantiyayta kamäpakuntsitsu.*
10 Paymi tamyata tamyatsimun chakrakunata ushmananpaq.
11 Humildikunata yanaparmi lakikuykaqkunatapis shakyätsin.
12 Astütu runa yarpashqantaqa manakaqmanmi churan.
13 Yachaq kashqanta runa yarpaptinpis manami rasunpatsu yachaq kashqanta musyatsin.Yachaq runa mana alita rurananpaq yarpaptinpis kikin nakananpaqmi kamakätsin.*
14 Tsay runaqa junaqpa purirpis yanawyaykaq tsakaycho puriqno karmi imayka problëmamanpis jatikaykan.
15 Waktsa runataqa fiyu runapa makinpita Tayta Diosmi salvan.
16 Tsayno salvashqantami nakaqkuna kushikärin.Fiyu runakunami itsanqa ima niytapis mana kamäpakur lakikärin.
17 “Kushishqami kawan Tayta Dios corrigishqan runaqa.Tsayno kaykaptinqa lapanpaq munayniyuq Tayta Dios corrigishuptiki chaskikuy.*
18 Qeshyawan castigashushpaykipis aliyätsishunkimi.*Corrigishushqaykipita nakaptikipis yanapashunkimi.
19 Yaparir yaparir ima desgracia pasashuptikipis Tayta Diosmi salvashunki.Imapis mana pasashunaykipaqmi tsapäshunki.
20 Muchuy chayamuptinpis yarqaypita mana wanunaykipaqmi yanapashunki.Guërra kaptinpis espädawan mana wanutsishunaykipaqmi tsapäshunki.
21 Runa maldicionashuptikipis manami imapis pasashunkipaqtsu.Desgracia pasashuptikipis manami mantsakunkipaqtsu.
22 Muchuy shamuptinpis manami yarqankipaqtsu.Desgracia kaptinpis manami nakankipaqtsu.Chucaru uywakunapis manami mantsakätsishunkipaqtsu.
23 Chakraykipis manami shala nitishqa kanqapaqtsu.Fiyu uywakunapis manami atacashunkipaqtsu.
24 Wayikichöpis kushishqami kawankipaq.Uywaykikunapis manami ushakanqatsu.
25 Qampita miraqkuna atskaq karmi jachakunanöraq tsaytsika kanqa.
26 Awkinyarpis hörayki manaraq chayamuptinqa manami wanunkipaqtsu.
27 Tsayno kashqantaqa musyantsimi.Tsayqa rasunpa kaqmi kaykan.Shumaq tantiyakuy”.
Ichic wilacuycuna
^ 5.13 1Cor. 3.19.
