Job 8:1-22
8 Tsaypitanami Súa partipita shamuq Bildad kayno nirqan:
2 “¡Imayyaqraq tsayno lutanta parlaykanki!Parlashqaykikunaqa shukukuy wayranömi kaykan.
3 Lapanpaq munayniyuq Tayta Diosqa manami nishqaykinötsu lutanta ruran.Payqa imaypis ali kaqlatami ruran.
4 Tsurikikunaqa capazchari jutsa rurashqanpita ushakashqa.
5 “Lapanpaq munayniyuq Tayta Diosman yärakuptiki,kuyapäshunaykipaq manakuptiki
6 y jutsata mana ruraypa ali kaqlata ruraptikiqaTayta Dios yapaymi yanapashunki kushishqa kawanaykipaq.
7 Tsaymi nawpata rïcu kashqaykipitapis mas rïcu kankipaq.
8 “Unay runakuna imano kawashqantapis tapukuy.Paykuna tantiyakushqanno qampis tantiyakuy.
9 Noqantsiqa qepa runami kantsi.Paykunanöqa manami yachantsitsu.Kay patsachöqa lantuy pasaqnölami kaykantsi.*
10 Tsayno kaykaptinqa unay runakuna yätsishqankunata tantiyakuy.
11 “Yaku mana kashqanchöqa ututu manami winantsu.Qocha mana kashqanchöqa totörapis manami winantsu.
12 Winarpis yaku mana kaptinqa wakin qewapita mas puntatami tsakikäkun.
13 Tsaynölami Tayta Diosta mana cäsukuqkunapis kikilanpaq yarpachakuykashqancho ushakan.
14 “Tsay runakuna rïcu kashqanman atiënikushqanqa pachkapa likannölami kaykan.
15 Pachkapa likan yatarkuptilantsi rachishqanömi paykuna atiënikushqanpis manakaqlapaq kaykan.
16 Tsay runakunaqa kaykan mana ali jachakuna loqluypa loqlur winashpan intëru huertaman juntaqnömi.
17 Tsaynöpis jachapa sapinkuna shalaman sapitsashqannömi paykunaqa karkaykan.
18 Tsayno kaptinpis sapinpita lukiptin jacha ushakashqannömi paykunapis ushakanqa.Tsaycho jacha kashqanta pipis mana yarpashqannömi tsay runakuna kawashqantapis pipis mana yarpanqanatsu.
19 Ali kaykashqanchömi tsayno ushakan.Paykuna ushakaptinpis Diosta mana cäsukuqkuna maspis yurimunqami.
20 “Jutsa ruraqkunataqa Tayta Dios manami yanapantsu.Ali runatami itsanqa imaypis yanapan.
21 Ali runa kaptikiqa qamtapis kushishqa kawanaykipaqmi yanapashunkiman.
22 Chikishuqnikikunatami itsanqa penqayman churanqa.Paykunapa wayinkunatapis y tsurinkunatapis ushakätsinqami”.
