Joel 3:1-21
3 (4.1) TAYTA DIOSMI kayno nin:“Tsay junaqkuna chayamuptin Judá runakunata y Jerusalén runakunatapis alina kawapäkunanpaqmi yanapashaq.
2 (4.2) Lapan nación runakunata shuntarkurmi Josafat Pampaman* apashaq.Tsaychömi paykunata juzgashaqpaq kuyashqä Israel runakunapa contran sharkushqanpita.Qoykushqä nacionninpitami Israel runakunata tsay contrankuna maytsay nacionmanpis qarqapäkushqa.Israel nación kikïpa kaptinpis kikinkunapaqmi aypunakärishqa.
3 (4.3) Suertita jitaypami kuyashqä runakunata rakipänakushqa.Wamrakunata olqutapis warmitapis rantikurmi ushashqa.Tsay qellaywanmi upyapäkushqa y *wayrapakuq warmikunawan kakushqa.
4 (4.4) “¡Tiro y Sidón markacho taq runakuna!*¡Filistea nacioncho taq runakuna!*¿Imanirtaq rabyanätsimanki?¿Imanirtaq conträ sharkurkaykanki?Ichiklanami pishiykan qamkunata castiganäpaq.
5 (4.5) Qamkunaqa suwaparkamarmi qellaynïtapis, qorïtapis y tesörükunatapis templuykikunaman apakärishqanki.
6 (4.6) Qamkunaqa Judá runakunatapis y Jerusalén runakunatapis karuman apaykurmi griego runakunapa ashmayninkuna kananpaq rantikärishqanki.
7 (4.7) Karuman rantikuptikipis kikïmi shuntamushaq.Paykunata rantikushqaykinölami qamkunatapis rantikushayki.
8 (4.8) Olqutapis y warmitapis tsurikikunata Judá runakunamanmi rantikushaq.Paykunami karucho taq sabeo runakunaman rantikärinqapaq.Noqa TAYTA DIOSMI tsayno nï”.
9 (4.9) Maytsay nacionkunachöpis wilakäriy kayno nir:“¡Guërraman aywapäkunaykipaq kamarikäriy!¡Ali chölunnin soldädukunata shuntapäkuy!¡Geniuyuq kaqkunaqa lapayki guërraman aywapäkuy!
10 (4.10) Lampaykipita espädaykita rurapäkuy.Ösikipita lanzaykita rurapäkuy.*Jaka shonqu karpis ‘¡ali chölumi kä!’ nipäkuy.
11 (4.11) Israelpa nawpancho kaq nacionkuna, lapayki jukla juntakämuy”.
Soldäduykikunata pushaykalämuy, TAYTA DIOS.
12 (4.12) “Lapan nación runakuna kamarikurkur Josafat Pampaman aywapäkutsun.Tsaychömi Israelpa nawpancho kaq nacionkunata juzgashaqpaq.
13 (4.13) Paykunapa jutsankunaqa aypämushqanami kaykan.Poquraykaq trïguta ösiwan achushqanno wanutsipäkuy.*Vïnuta ruraqkuna üvata jarushqanno ushakätsiy.Juzgar castiganäpaq kaq tiempu chayamushqana kaptinqa tsayno rurapäkuy”.*
14 (4.14) Juzgana Pampachöqa waranqanpa waranqanpami runakuna juntakashqa karkaykan.Paykunata TAYTA DIOS juzganan junaq chayamunqapaqnami.
15 (4.15) Tsay junaqqa intipis killapis tsakakäkunqami.Qoylarkunapis manami atsikyanqanatsu.
16 (4.16) TAYTA DIOSMI *Sión jirkanpita patsa leonnöpis qaparämunqa.Jerusalénpita patsa qayakamushqanmi räyu bunruruqnöraq mayakämunqa.*Tsaymi jana patsapis y kay patsapis siksikyanqa.Kuyashqan Israel runakunatami itsanqa castïgupita tsapanqa.
Judá runakunaman bendicionta churananpaq kashqan
17 (4.17) Tayta Dios kaynömi nin:“Tsay junaq chayamuptinmi musyapäkunkipaq TAYTA DIOSNIKI kashqäta.Noqaqa *santu *Sión jirkanchömi taykä.Jerusalénqa santu markämi kanqa.Tsaymi jäpa nación runakuna imaypis mana vincinqanatsu.
18 (4.18) Tsay witsanmi jirkakunacho y jirkankunacho vïnupis y lëchipis yakunöraq tsaytsika kanqa.Judá nacioncho raqrakunapapis mana tsakiypami yaku aywanqa.*Templü rurinpita yaku pashtamurmi Sitim Pampatapis* ushmanqa.*
19 (4.19) “Egipto nación raqälami rikakunqa.Edom nacionpis pasaypa chunyaqmi rikakunqa.Tsayno ushakanqa Judá nacionta atacashpan jutsaynaqkunata wanutsir ushashqanpitami.
20 (4.20) Judácho y Jerusalénchömi itsanqa imaypis runakuna tanqapaq.
21 (4.21) Kikïpis Sión jirkanchömi täshaq.Runakunata tsaycho wanutsipäkushqanpitami mana perdonaypa lapanta juzgashaqpaq”.
Ichic wilacuycuna
^ 3.2 Josafat ninanqa Tayta Diosmi juzgan ninanmi. Tsaymi Josafat Pampaman apashaq ninanqa juzganäpaq apashaq ninan. Tsaynölami kaykan 3.12 versïculuchöpis.
^ wayrapakuq warmi Wayrapakuq warmiqa pägupaq rayku jukwan jukwan kakuq warmimi kaykan. Tsayno warmikunata Tayta Dios imaypis mana perdonananpaq kashqanta runakuna yarpaptinpis Jesucristuqa nirqan jutsankunata kacharir Tayta Dios munashqanno kawarqa perdonashqa kananpaq kashqantami (Mat. 21.31-32; Heb. 11.31).
^ 3.13a Apoc. 14.14-16.
^ 3.13b Isa. 63.3; Lam. 1.15; Apoc. 14.19-20; 19.15.
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
^ 3.16 Jer. 25.30; Amós 1.2.
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
^ 3.18a Eze. 47.1-5.
^ 3.18b Núm. 25.1; Jos. 2.1.
^ 3.18 Tsayno niykan templupita bendición shamunanpaq kashqantami.
