Jueces 21:1-25
21 Mizpacho kaykarmi Tayta Diospa jutincho jurashpan Israel runakuna nipäkurqan Benjamín trïbu runakunawanqa mayqanpis warmi tsurinkunata mana tätsinanpaq.
2 Tsaypitanami Bet-elman aywaykur Tayta Diospa nawpancho* lakikur qoyayta waqashpan kayno nipäkurqan:
3 “Ay TAYTA DIOS, ¿imataq pasaykamashqa? Kananqa Israel runakunacho juk trïbu mananachaq kannatsu”.
4 Tsaypita jukaqnin tutana *altarta rurarkur rupatsina sacrificiukunata y jawka kawakuy sacrificiukunata rupatsipäkurqan.
5 Nirkurmi kayno nipäkurqan: “Benjamín trïbu runakunawan manaraq pelyar Mizpacho juntakaptintsi ¿mayqan marka runakunataq noqantsiwan mana juntakashqatsu?”
(Mizpachömi Israel runakunaqa Tayta Diospa jutincho jurar nipäkurqan mayqanpis tsayman mana juntakaq runakunataqa wanutsipäkunanpaq.)
6 Benjamín trïbu runakuna ushakashqanpita lakikurmi Israel runakuna kayno nipäkurqan: “Kanan junaqmi Israelpita juk trïbu ushakashqa.
7 Wanuypita qeshpiq Benjamín trïbu runakuna warmiyuq kananpaq ¿imatataq rurashun? Noqantsiqa TAYTA DIOSPA jutinchömi jurashqantsi warmi tsurintsikunawan paykunata mana tätsinantsipaq”.
8 Tsayno nirkushpanmi kayno nipäkurqan: “Mizpacho sesionta ruraptintsi ¿mayqan marka runakunataq TAYTA DIOSPA nawpancho noqantsiwan mana juntakashqatsu?”
Tsaymi yarparkurqan Jabes-galaadpita mayqanpis mana aywashqanta.
9 Tsay sesioncho listata qayaptinmi Jabes-galaadpita pipis mana karqantsu.
10 Tsaymi Israel runakunaqa chunka ishkay waranqa (12,000) alinnin soldädukunata Jabes-galaadman kachar kayno nipäkurqan: “Jabes-galaadman aywar tsaycho kaq runakunata, warmikunata y wamrakunatapis espädawan lapanta wanutsimunki.
11 Virgen jipashkunata itsanqa ama wanutsinkitsu”.
12 Tsayno niptinmi Jabes-galaadman aywaykur lapanta wanutsir chusku pachak (400) virgen jipashkunata tarir Silo markacho kaykaq campamentuman apapäkurqan. Siluqa *Canaánchömi kaykan.
13 Nirkurmi Rimón qaqacho kaykaq Benjamín trïbu runakunaman aywaykur Israel runakuna ali shimilanpa shakyätsirqan markankunaman kutikärinanpaq.
14 Tsaymi markankunaman kutiptin Jabes-galaadpita apashqan jipashkunata warminpaq entregarqan. Tsaypis manami lapan runakunapaq ayparqantsu.
15 Benjamín trïbu runakunata wanutsipäkunanpaq TAYTA DIOS yanapaptin cäsi lapanta ushakarkatsir Israel runakuna fiyupa lakikurqan.
16 Tsaymi mayor runakuna kayno nipäkurqan: “¿Imatataq rurashun wakin kaq Benjamín trïbu runakunapaq warmita ashipänantsipaq? Paykuna trïbuqa warmikunapis chipyaqmi ushakashqa.
17 Wakin quëdaq Benjamín trïbu runakunapa tsurinkuna mana kaptinqa Israel runakunapita chipyaqmi ushakanqapaq.
18 Tsayno kaptinpis lapantsimi Tayta Diospa jutincho jurapäkushqantsi Benjamín trïbu runakunata warmi tsurintsiwan tätsirqa maldicionashqa kanantsipaq. Tsaymi warmi tsurintsikunata mana entregashwantsu paykunapa warmin kananpaq”.
19 Tsayno nirkaykashqancho yarparkärirqan Silucho* TAYTA DIOSTA adorapäkunanpaq jatun fiesta chayaykämushqanta. Siluqa karqan Bet-elpita norti kaq lädupa, Lebonapita sur kaq lädupa y Bet-elpita Siquemman näni aywaqpa inti jeqamunan kaq lädupami.
20 Tsaymi warmiynaq kaq Benjamín trïbu runakunata mayor runakuna kayno nipäkurqan: “Siluman aywaykur üva chakrakunaman pakakuykur
21 rikaq rikaqla shuyarpanki. Silo marka jipashkuna qatswayta qalaykuptin cada ünuyki jukta apakurkur aywakäriy chaskishqayki posisionman.
22 Jipashpa maman o taytan o turinkuna noqakunaman quejakamuptinqa kaynömi nipäkushaq: ‘Paykunata perdonaykulay. Jabes-galaadcho pelyapäkushpä warmita manami lapanpaq taripäkushqätsu. Tsaynöpis paykunapa warminpaq kikikikuna mana entregaykarqa jurashqa karpis manami jutsayuqtsu kankipaq’ ”.
23 Israel mayor runakuna yätsishqannölami Benjamín trïbu runakunaqa rurapäkurqan. Tsaymi qatswaykashqanman aywaykur cada ünun juk jipashta suwaypa warminpaq apakurqan. Nirkurmi chakrankunaman kutishpan juchutsishqa kaykaq markankunata altsarkur tsaychöna tarqan.
24 Tsaypitaqa Israel runakunapis trïbunkunaman, aylunkunaman y chakrankunamannami kutikärirqan.
25 Tsay witsanqa Israel runakunapa mandaqnin rey manami karqanraqtsu. Tsaymi paykunaqa imatapis yarpashqanta rurapäkurqan.*
Ichic wilacuycuna
^ 21.2 Tayta Diospa nawpancho nirqa Tinkuna Tolducho kaykaq altarpa nawpanchömi niykan.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ Canaán Canaánchöqa atska markakunami karqan. Cada markachömi juk mandaq rey karqan. Tsaychömi tarqan ceneo runakuna, cenezeo runakuna, cadmoneo runakuna, heteo runakuna, ferezeo runakuna, refaíta runakuna, amorreo runakuna, cananeo runakuna, gergeseo runakuna y jebuseo runakunapis (Gén. 15.19-21). Abrahamtami Tayta Dios promitirqan paypita miraqkunata Canaánta qoykunanpaq (Gén. 17.8).
^ 21.19 1Sam. 1.3, 21.
