Jueces 8:1-35
8 Efraín trïbu runakunami Gedeónta rabyashqa kayno nipäkurqan: “Madianita runakunawan pelyaq aywar ¿imanirtaq noqakunataqa qayatsimarqaykitsu?”
2 Tsayno niptinmi Gedeón kayno nirqan: “Mana qayatsiptïpis qamkunaqa madianita runakunapa mandaqnin reykunata wanutsir noqapita mas alitami rurapäkushqanki. Walkalata rurashqaykita yarparpis noqakunapita masmi qamkuna rurapäkushqanki.
3 Madianita runakunapa mandaqnin rey Orebta y rey Zeebta wanutsinaykipaqqa Tayta Diosmi qamkunapa makikiman churamushqa. Paykunata wanutsir noqakunapita masmi qamkuna rurapäkushqanki”.
Gedeón tsayno niptinmi Efraín trïbu runakuna rabyashqa kaykashqanpita kushikärirqan.
4 Tsaypitanami pasaypa utikashqa karpis pelyaq aywäshiq kimsa pachak (300) runakunawan Jordán mayuta Gedeón tsimparqan madianita runakunata qatipashpan.
5 Sucotman chayaykurmi tsaycho taq runakunata Gedeón ruwakur kayno nirqan: “Madianita runakunapa mandaqnin rey Zebata y rey Zalmunata qatiparmi aywarkaykä. Yanaqämaq runakuna pasaypa utikashqami karkaykan. Valornin yurinanpaq imalatapis qaraykulay”.
6 Tsayno nir ruwakuptinmi Sucot markacho taq mayor runakuna kayno nirqan: “Qamkunata qarapäkunäpaqqa ¿maynaku Zebata y Zalmunata prësu tsarararkaykanki?”
7 Tsayno niptinmi Gedeón kayno nirqan: “Zebata y Zalmunata prësu tsarimunäpaq TAYTA DIOS makïman churamuptinqa kutiykamur qaraykitapis kashawanmi pishtaypa pishtar astashayki”.
8 Tsaypita pasar Penielman chayaykurpis Sucotcho manakushqannömi Gedeón manakurqan. Peniel runakunapis Sucot runakuna nishqannölami nipäkurqan.
9 Tsawraqa rabyakushpan Peniel runakunata Gedeón kayno nirqan: “Lapanta vinciykur kutimushpämi kay törrita juchuratsishaq”.
10 Tsayyaqmi inti jeqamunan kaq lädupita shamuq soldädunkunawan Zeba y Zalmuna chayapäkurqan Carcorman. Paykunapa soldädunkunata Gedeónpa yanapaqnin runakuna pachak ishkay chunka waranqatami (120,000) wanutsipäkurqan. Tsaymi chunka pitsqa waranqalana (15,000) soldädunkuna karqan.
11 Gedeónqa yanaqaqnin runakunawan chunyaq jirkapa aywaq nänipa qatiparmi madianita runakunata elaqpita atacapäkurqan. Tsay näniqa Noba y Jogbeha lädupami pasararqan. Tsay läduqa inti jeqamunan kaqpami karqan.
12 Zeba y Zalmuna qeshpirkaykaptinmi taripaykur Gedeónqa prësu tsarirqan. Ishkan reykunata prësu tsariptinmi soldädunkunapis mantsakushpan maytsaypapis qeshpir aywakärirqan.
13 Gedeónqa pelyashqanpita kutiykurmi Heresta pasaykashqancho
14 Sucotcho taq mözuta prësu tsariykur tapurqan tsaycho taq mayor runakunapa jutinkunata. Tsaymi qanchis chunka qanchis (77) mayor runakunapa jutinkunata qelqarkur mözu aptaparqan.
15 Tsawraqa Sucotman chayaykur runakunata Gedeón kayno nirqan: “Zebata y Zalmunata qatipaptï qamkunaqa manakaqmanmi churamarqayki kayno nir: ‘Zebata y Zalmunata manaraq wanutsiptikiqa manami pachaykita qarashaykitsu’. Kanan rikapäkuy Zebata y Zalmunata prësu aparkaykashqäta”.
16 Tsayno nirkushpanmi Gedeónqa Sucotcho taq mayor runakunata kashawan y shirakawan astarqan.
17 Tsaypita pasar Penielman chayaykurnami törrita juchuratsir tsay markacho taq runakunata wanutsirqan.
18 Nirkurmi Zebata y Zalmunata Gedeón kayno nir tapurqan: “Taborcho wanutsishqayki runakuna ¿pï runanötaq karqan?”
Tsawraqa kayno nirqan: “Qam niraqlami lapanpis karqan. Paykunaqa reypa tsurinkunanölami karqan”.
19 Tsayno niptinmi Gedeón qaparaypa kayno nirqan: “¡Paykunaqa wawqïkunami kashqa! Mamäpa wawankunatami wanutsipäkushqanki. Tsaymi kikikikunata kanan wanutsishayki. Wawqïkunata mana wanutsiptikiqa qamkunatapis manami wanutsïmantsu”.
20 Tsayno nirmi qechpa tsurin Jeterta kayno nirqan: “Kay runakunata jukla wanutsiy”.
Tsayno niptinmi wamralaraq kar wanutsiyta mantsakurqan.
21 Tsawraqa Gedeónta Zeba y Zalmuna kayno nirqan: “Ali chölu karqa kikiki wanutsimay”.
Tsayno niptinmi Gedeónqa paykunata wanuratsirqan. Nirkurna Zebapa y Zalmunapa *camëllunkunapa kuyaylapaq walqankunata apakurqan.
22 Tsaypitanami Israel runakuna Gedeónta kayno nirqan: “Madianita runakunapa munayninpitami salvapäkamashqanki. Kananqa mandamaqnï rey kaykulay. Qam wanuptiki tsurikina rey kanqa y tsuriki wanuptin wilkaykina rey kanqa”.
23 Tsayno niptinmi Gedeón kayno nirqan: “Noqapis ni tsurïkunapis manami mandaqniki kashaqtsu. Mandamaqnintsi reyqa TAYTA DIOSMI kaykan.
24 Itsanqa ruwakushayki guërracho shuntamushqaykipita lapayki juk sortëjata qoykamänaykipaq”.
Tsayno manakurqan Ismael runakuna qori sortëjata jatiraptinmi.*
25 Tsayno niptinmi Israel runakuna “alichari kanqa, tayta” nir jakuta mashtaykur juknin jukninpis juk sortëjata churarqan.
26 Tsay chaskishqan qori sortëjakunata pësaptin lasarqan chunka isqun kïluno. Tsay jananmanmi Gedeón shuntarqan walqakunata, alhäjakunata, reykuna jatirashqan granäti röpakunata y camëllukunapa kunkancho adornukunata.
27 Tsay qorikunapita juk *efodta rurarkurmi markan Oframan Gedeón churarqan. Tsaypitanami Israel runakuna TAYTA DIOSTA mana wiyakur tsay efodta adorapäkurqan. Tsaymi tsay efodqa trampano karqan Gedeónpaq y aylunkunapaqpis.
28 Tsayno vincipäkuptinmi madianita runakunaqa Israel runakunata achäquita mana ashiparqannatsu. Gedeón kawashqanyaqqa chusku chunka (40) watami Israel runakuna jawka kawapäkurqan.
Gedeón wanushqan
29 Tsaypitanami Joáspa tsurin Jerobaal nipäkushqan Gedeónqa wayinpa kutikurqan.
30 Warminkuna atska kaptinmi olqu tsurinkuna karqan qanchis chunka (70).
31 Siquemcho *concubïna warminpis Gedeónpa tsurinta wachaptin jutinta churaparqan Abimelec jutin kananpaq.
32 Gedeónqa pasaypa awkinyashqanyaqmi kawarqan. Wanuykuptinmi papänin Joás pamparaykashqanman pampapäkurqan. Tsay karqan Abiezer aylu tashqan Ofra markachömi.
33 Gedeón wanuykuptinnami Israel runakuna yapay *Baal dioskunata adorapäkurqan. Tsaymi Baal-berit ïdulutana akrapäkurqan diosnin kananpaq.
34 TAYTA DIOS lapan contrankunapita salvaykaptinpis payta manami adorapäkurqannatsu.
35 Tsaynölami Jerobaal nipäkushqan Gedeón tsayjinanpa yanapashqa kaykaptinpis paypa tsurinkunata Israel runakuna mana cäsuparqantsu.
Ichic wilacuycuna
^ camëllu Camëlluqa jatunkaray uywami kaykan. Camëllukunataqa ashmapäkun maypapis aywar cargakunanpaq y muntakunanpaqmi. Tsaynöpis camëllupa milwanta putskarkurmi awapäkuq. Camëllupa milwanpitami Bautizaq Juanpa röpanpis karqan (Mat. 3.4; Mar. 10.25).
^ 8.24 Madianita runakunataqa Ismael runakuna kashqantami nipäkuq (Gén. 37.28)
^ efod Efodqa cüra jatikunan mandilmi karqan. Tsaytaqa Israelcho mas mandaq cürami röpan jananman jatikuq (Éxo. 28.6-14). Tsay efodchömi laqararqan chunka ishkay rumikuna. Cada rumichömi kaykarqan Israel trïbupa juk jutin. Wakin runakunapis mas jukniraq efodta jatikuqmi. Tsay runakuna karqan Samuel (1Sam. 2.18), David (2Sam. 6.14), Nobpita kaq cürakuna (1Sam. 22.18) y Micaía (Jue. 17.5).
^ concubïna Concubïnaqa manami runapa legïtimu warmintsu karqan. Concubïnanwanqa manami pakaylapatsu purikurqan, sinöqa warminwannömi tarqan (Jue. 8.31; 19.1-4; 2Sam. 5.13; 15.16; 16.21-22; 20.3; Est. 2.9).
^ Baal Baalqa cananeo runakuna adorashqan diosmi karqan. Juk dios kashqanta yarpaptinpis manami rasunpatsu dios karqan. Cananeo runakuna yarpapäkurqan tsay diosta adoraptin uywankuna mirananpaq kashqanta y chakrankuna ali wayunanpaq kashqantami. Tsaynöpis yarpapäkurqan löcu tamyata y ali tamyatapis kachamushqantami.
