Marcos 11:1-33
11 Jerusalénman Jesús aywarmi Olivos jirkancho Betfagé y Betania markakunaman chayarqan. Tsaypitami ishkay discïpulunkunata kachar
2 kayno nirqan: “Taqay markaman aywapäkuy. Chayashpaykimi pipis manaraq muntakushqan manta bürru wataraykaqta taripäkunkipaq. Tsay bürruta paskarir apapäkamuy.
3 Tsaycho pipis ‘¿imanirtaq bürruta paskarkaykanki?’ nishuptikiqa: ‘Señor Jesúsmi munaykan. Rätulatami kutiratsimushaq’ nipäkunki”.
4 Tsawraqa discïpulunkuna aywar taripäkurqan wayi punkucho manta bürru wataraykaqta. Tsay wayiqa näni kuchunchömi karqan. Paskarkaykaptinmi
5 tsaycho kaykaq runakuna tapurqan kayno nir: “¿Imapaqtaq bürruta paskarkaykanki?”
6 Tsayno niptinmi Jesús yachatsishqannöla nipäkurqan. Tsawraqa “apapäkuy ari” nipäkurqan.
7 Bürruta chayaykatsir punchunkunata karunaparkuptinmi Jesús muntakurqan.
8 Muntashqa aywaptinmi tsaytsika runakuna punchunkunata jakunkunata näniman mashtar Jesústa kushishqa chaskikärirqan. Wakinnami palmakunapa rämankunata pakirir pakirir näniman mashtapäkurqan.
9 Tsawraqa puntanta aywaqkuna y qepanta aywaqkunapis kushikushpan kayno nipäkurqan: “¡Hosana!* ¡Tayta Diospa jutincho shamuq runa alabashqa kaykulätsun!
10 ¡Paymi unay ayluntsi Davidno mandamaqnintsi rey kananpaq aywaykämun! ¡Jana patsachöpis alabashqa kaykulätsun!”
11 Jerusalénman yaykurnami Jesús aywarqan templu patiuman. Tsaycho rikapakurirmi tardina kaptin chunka ishkay discïpulunkunawan Betania markaman kutirqan.
Hïgus yörata Jesús tsakitsishqan
Mateo 21.18-19
12 Tsaypita jukaqnin junaqnami Betaniapita Jerusalénman kutiykashqancho Jesús mikanarqan.
13 Tsaymi hïgus yörata raprayuqtana karupita rikaykur wayuyninta ashiq aywarqan. Ashirpis wayunanpaq tiempun manaraq kaptinmi rapralanta tarirqan.
14 Tsaymi kayno nirqan: “¡Kananpitaqa manami imaypis wayunkipaqnatsu!”
Tsayno nishqantami discïpulunkuna mayapäkurqan.
Templucho rantikuqkunata Jesús qarqushqan
Mateo 21.12-17; Lucas 19.45-48; Juan 2.13-22
15 Tsaypita Jerusalénman chayashpanmi templu patiuman yaykuykur rantikuqkunata y rantipakuqkunatapis Jesús qarqurqan. Tsaynölami qellay rantikuqkunapa mësankunatapis* y paluma rantikuqkunapa cajonninkunatapis jitar usharqan.
16 Tsaynöpis runakunata micharqan templu patiupa imatapis mana pasatsinanpaq.
17 Nirkurnami kayno nirqan: “¿Manaku kayno qelqaraykan: ‘Wayïqa kanqa maytsay nación runakuna manakamänanpaqmi’?* Tsayno niykaptinpis qamkunaqa suwakunapa machayninmanmi tikratsipäkushqanki”.*
18 Tsayno nishqanta mayarmi mandaq cürakuna y ley yachatsiqkuna wilanakurqan Jesústa imanöpapis wanutsipäkunanpaq. Itsanqa Jesús yachatsishqanta runakuna kushishqa chaskikuptinmi paykunata mantsakur prësu mana tsaritsirqantsu.
19 Patsa tsakaptinnami Jerusalénpita yarqur Jesús aywakurqan.
Hïgus yörata tsakishqatana tarishqan
Mateo 21.20-22
20 Tutanninnami Jerusalénman discïpulunkunawan Jesús kutir rikapäkurqan hïgus yöra pasaypa tsakishqana kaykaqta.
21 Jesús nishqanta yarparkurmi Pedro kayno nirqan: “ ‘Manami wayunkinatsu’ nishqayki hïgus yörata rikäriy, *rabí. Pasaypa tsakishqanami kaykan”.
22 Tsawraqa Jesús kayno nirqan: “Tayta Diosman yärakäriy.
23 Rasunpami kayno nï: Pipis lapan shonqunwan Tayta Diosman yärakur y nishqanno kananpaq kashqanta criyirqa taqay jirkata ‘kaypita lamarman ayway’ niptinpis aywanqami.*
24 Tayta Diosta manakurqa chaskinaykipaq kashqanta criyipäkunki. Tsayno criyirqa manakushqaykita chaskipäkunkimi.
25 “Tsaynöpis Tayta Diosta manakushqayki höra rabyatsishuqnikita manaraq perdonashqa karqa jukla perdonanki. Tsayno perdonaptikiqa qamkunatapis jana patsacho kaykaq Taytayki perdonashunkimi.*
26 [Runa mayikita mana perdonaptikiqa qamkunatapis jutsa rurashqaykita manami perdonashunkipaqtsu]”.
Jesústa cürakuna tapushqan
Mateo 21.23-27; Lucas 20.1-8
27 Tsaypitami discïpulunkunawan Jesús chayarqan Jerusalénman. Templu patiucho Jesús puriykaptinmi mandaq cürakuna, ley yachatsiqkuna y Israel mayor runakunapis
28 tapupäkurqan kayno nir: “Qamqa ¿pipa munayninwantaq rantikuqkunata qarqushqanki? ¿Pitaq nishushqanki tsayno qarqunaykipaq?”
29 Tsawraqa Jesús kayno nirqan: “Qamkunatapis mä tapushayki. Tapushqäta nimaptikiqa noqapis wilashaykimi pipa munayninwan qarqushqätapis.
30 ¿Pitaq Juanta kachamushqa *bautizananpaq? ¿Tayta Diosku o runakunalaku? Mä nipäkamay”.
31 Tsayno tapuptinmi kikinpura kayno parlapäkurqan: “Tayta Dios kachamushqanta niptintsiqa: ‘¿Imanirtaq mana chaskikärishqankitsu?’ nimäshunmi.
32 Tsaynöpis manami nishwantsu runakuna kachamushqanta”.
Tsayno nipäkurqan runakunata mantsakushpanmi. Juan profëta kashqanta lapan runakunami yarpapäkurqan.
33 Tsawraqa Jesústa kayno nipäkurqan: “Manami musyapäkütsu pï kachamushqantapis”.
Tsayno niptinmi Jesús kayno nirqan: “Noqapis manami wilashaykitsu pipa munayninwan rantikuqkunata qarqushqätapis”.
Ichic wilacuycuna
^ 11.9 Israel runakuna Hosana nirqan Tayta Diosta alabarmi.
^ 11.15 Jesús kawanan witsanmi Roma runakunapa qellayninta Israel runakuna manijaq imatapis rantipakunanpaq. Tayta Diospaq ofrendata apananpaqmi itsanqa templuman apananpaq kaq qellaytaraq rantiq.
^ rabí Rabíqa Tayta Diospa palabranta yachaq y yachatsiq runami karqan. Jesucristo kawashqan witsanmi Tayta Diospa palabranta yachatsir markan markan rabíkuna puripäkurqan. Rabíkunawanmi wakin runakunapis yachakuyta munar puripäkurqan. Tsay runakunatami rabípa discïpulun kashqanta nipäkurqan. Jesucristupis rabími karqan (Juan 1.38; 3.2, 26; 4.31; 6.25).
^ 11.23 Mat. 17.20; 1Cor. 13.2.
^ 11.25 Mat. 6.14-15.
^ bautizay Jesucristuta chaskikuqkuna bautizakurqa runakunata musyatsipäkun jutsankunata kacharishqanta, Jesucristuman yärakärishqanta y Jesucristuta cäsukärinanpaq kashqantami. Discïpulunkunatami Jesucristo nirqan payta chaskikuqkunata bautizananpaq (Mat. 28.19; Mar. 16.16).
