Marcos 13:1-37
13 Templu patiupita yarquykaptinmi juk discïpulun Jesústa kayno nirqan: “¡*Rabí, rikay! ¡Kuyaylapaq jatusaq rumikunawanmi templuta y nawpancho kaq cuartukunatapis sharkatsishqa!”
2 Tsawraqa Jesús kayno nirqan: “Kay lapan rikarkaykashqaykita chipyaqmi juchutsipäkunqa. Manami ni juk rumilapis perqaranqanatsu”.
Manaraq kutimuptin imano kananpaq Jesús nishqan
Mateo 24.3-14; Lucas 21.7-19
3 Templu tsimpan Olivos jirkancho kikilankuna jamaykashqanchömi Pedro, Santiago, Juan y Andrés Jesústa tapupäkurqan kayno nir:
4 “Wilaykalämay, tayta. ¿Imaytaq nishqaykino kanqa? Tsayno kananpaq ¿ima señaltaq kanqa?”
5 Tsayno niptinmi Jesús kayno nirqan: “Paqta pipis lulapaykäshunkiman.
6 Atskaqmi jutïcho shamunqa ‘noqami Cristo kä’ nir. Tsayno nirmi atska runakunata engañapäkunqa.
7 Guërra kaptinpis y guërra kananpaq kashqanta mayarpis ama mantsakäriytsu. Puntataqa tsaykunaraqmi kanqa. Tsayno kaptinpis kay patsaqa manaraqmi ushakanqaraqtsu.
8 Juk nacionmi juk nacionwan guërrata ruranqa y juk marka runakunami juk marka runakunawan wanutsinakunqa. Tsaynölami terremötu maytsaychöpis kanqa. Muchuypis pasaypami kanqa. Tsay nakaykunaqa kanqa qalaykunalanraqmi.
9 “Cuidakäriy. Chikishushpaykimi prësu tsarirkur autoridäkunaman apapäkushunkipaq. *Sinagögakunachöpis astapäkushunkipaqmi. Noqaman yärakamashqaykipitami gobernadorkunamanpis y reykunamanpis prësu apapäkushunkipaq. Tsaynöpami wilakuynïta paykunatapis wilapanki.
10 Manaraq kay patsa ushakaptinmi maytsay nacionchöpis noqapita wilakärinqa.
11 “Autoridäkunaman apashuptikipis ama lakikärinkitsu ‘¿imataraq nishaq?’ nishpayki. Tsay hörami imata parlanaykipaqpis Espíritu Santu tantiyatsishunkipaq. Manami kikikikuna yarpashqaykitatsu parlapäkunkipaq, sinöqa Espíritu Santu tantiyatsishushqaykitami.*
12 Noqaman yärakamashqanpitami wawqintapis, tsurintapis y taytantapis wanutsinanpaq autoridäkunaman apapäkunqa.
13 Noqaman yärakamashqaykipitami pïmaypis chikishunkipaq. Tsayno chikishuptikipis wanunaykiyaq yärakamashpaykiqa salvashqami kankipaq.*
Nakaykuna kananpaq kashqanta Jesús tantiyatsishqan
Mateo 24.15-28; Lucas 21.20-24
14 “[Profëta Daniel qelqashqannölami] Tayta Dios mana munashqanta templucho rikapäkunkipaq.* (Kay qelqashqäta liyiqkunaqa shumaq tantiyakutsun.)* Tsayno kaykaqta rikar Judea markakunacho taqkuna jirkakunapa qeshpir aywakäritsun.
15 Wayi janancho kaykaqkuna* imankunatapis mana jorquylapa qeshpikäritsun.
16 Chakracho kaykaqkunapis ni punchun jorquqpis ama kutitsuntsu.*
17 ¡Wawalaw, imanöraq nakanqa chichu warmikuna y iti wawayuqkuna!
18 Tayta Diosta manakäriy qeshpishqayki junaq tamya witsan mana kananpaq.
19 “Tsay witsanqa runakuna fiyupami nakapäkunqa. Tayta Dios kay patsata kamashqanpita patsa manami imaypis tsayjinanpa nakapäkushqatsu. Tsaynöpis yapayqa mananami imaypis tsayno nakapäkunqanatsu.*
20 Akrashqan runakunata kuyaparmi Tayta Dios tsay nakay junaqkunata pasatsinqa. Mana pasatsiptinqa lapanpis wanurmi ushakanqa.
21 “ ‘Tayta Dios kachamushqan Cristo kaychömi kaykan’ nishuptikipis ama criyipäkunkitsu. ‘Wakchömi kaykan’ nishuptikipis ama cäsupankitsu.
22 Tsay witsanmi Cristo tukuqkuna y lula profëtakunapis yurimunqa. Runakunata criyitsinan kashqami espantaypaq milagrukunatapis ruranqa. Tsayno rurarmi Tayta Dios akrashqan runakunatapis engañayta munapäkunqa.
23 Paykunata mana chaskipänaykipaq shumaq tantiyakäriy. Manaraq tsayno kaptinmi musyanaykipaq qamkunata wilaykä”.
Jesús kay patsaman kutimunanpaq kashqan
Mateo 24.29-44; Lucas 21.25-33
24 “Fiyupa nakaykuna pasarkuptinmi intipis tsakakäkunqa, killapis atsikyämunqanatsu,
25 qoylarkunapis shikwamunqa y jana patsapis siksikyanqa.*
26 Tsaypitanami runakuna rikapäkunqa *Runapa Tsurin pukutay janancho chipchipyaykar pasaypa munayniyuq aywaykämuqta.*
27 Nirkurmi *angilninkunata kachamunqa akrashqan kaqkunata maytsaypitapis shuntakurkunanpaq.
28 “Hïgus yörata rikar tantiyakäriy. Raprankuna tsintsimuptinmi musyapäkunki usya tiempu qalaykunanpaqna kashqanta.
29 Tsaynölami nishqäno pasaykashqanta rikar musyapäkunki *Runapa Tsurin kutimunanpaqna kashqanta.
30 Rasunpami kayno nï: Kanan tiempu runakuna manaraq ushakaptinmi lapan nishqäkuna cumplikanqa.
31 Jana patsa y kay patsa ushakaptinpis noqa nishqäkunaqa manami ushakanqatsu.
32 “Runapa Tsurin imay junaq imay höra kutimunanpaq kashqanta manami jana patsacho kaykaq angilkunapis ni Diospa Tsurinpis ni pï runapis musyantsu.* Tsaytaqa Taytalämi musyaykan.
33 ¡Mayaq mayaqla karkaykay! [Tayta Diosta manakäriy.] Manami musyapäkunkitsu imay kutimunanpaq kashqantapis”.
34 “Shumaq tantiyakäriy. Juk runashi karupa aywakur wayinta täpananpaq ashmayninkunata kachapaykurqan. Punku kichapaqnintashi yätsirqan mayaq mayaqla kaykänanpaq.*
35 Tsaymi kamarikushqalana karkaykanki. Manami musyapäkunkitsu wayiyuq* imay kutimunanpaq kashqantapis. Patsa tsakaykashqan höratsuraq, pulan paqas höratsuraq, walpa waqay höratsuraq o patsa waraytsuraq chayamunqa.
36 Mana yarpashqayki höra kutimur paqta punurkaykaqta tarishunkiman.
37 Manami qamkunalatatsu niykä, sinöqa lapan runakunatami. Tsayno wilapaykaptïqa mayaq mayaqla karkaykay”.
Ichic wilacuycuna
^ rabí Rabíqa Tayta Diospa palabranta yachaq y yachatsiq runami karqan. Jesucristo kawashqan witsanmi Tayta Diospa palabranta yachatsir markan markan rabíkuna puripäkurqan. Rabíkunawanmi wakin runakunapis yachakuyta munar puripäkurqan. Tsay runakunatami rabípa discïpulun kashqanta nipäkurqan. Jesucristupis rabími karqan (Juan 1.38; 3.2, 26; 4.31; 6.25).
^ sinagöga Sinagögaqa Israel runakuna juntakänan wayimi karqan. Tsaymanmi juntakäriq Tayta Diosta manakärinanpaq, Moisés qelqashqan leykunata yachakärinanpaq, sesionkunata rurapäkunanpaq y wamrakuna liyiyta yachakärinanpaq (Mar. 1.21; Juan 9.34; Hech. 15.21).
^ 13.9-11 Mat. 10.17-20; Luc. 12.11-12.
^ 13.13 Mat. 10.22.
^ 13.14 Dan. 9.27; 11.31; 12.11.
^ 13.14 Kay qelqashqäta liyiqkunaqa shumaq tantiyakutsun nishqanqa manami Jesucristo nishqantsu kaykan, sinöqa kay libruta qelqaq Marcos yapashqanmi.
^ 13.15 Tsay witsanmi wayita qatananpa trukan terrädu jananman tsaqlarkur mituwan lashtapäkuq. Tsay jananchönami awakäriq, aqakäriq y trïgutapis akrapäkuq.
^ 13.15-16 Luc. 17.31.
^ 13.19 Dan. 12.1; Apoc. 7.14.
^ 13.24-25 Isa. 13.10; Joel 2.10, 31; 3.15; Apoc. 6.12-13.
^ Runapa Tsurin Runapa Tsurinpaq parlarqa Jesucristo kikinpaqmi parlarqan (Juan 9.35-37). Tsaynöpami tantiyatsirqan Daniel 7.13-14-cho qelqaraykashqanno Runapa Tsurin kashqanta, kutimunanpaq kashqanta (Mat. 13.41-42; 24.27, 30, 44; 25.31) y lapanpaq munayniyuq kashqanta (Mar. 2.10; 2.28).
^ 13.26 Dan. 7.13; Apoc. 1.7.
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ Runapa Tsurin Runapa Tsurinpaq parlarqa Jesucristo kikinpaqmi parlarqan (Juan 9.35-37). Tsaynöpami tantiyatsirqan Daniel 7.13-14-cho qelqaraykashqanno Runapa Tsurin kashqanta, kutimunanpaq kashqanta (Mat. 13.41-42; 24.27, 30, 44; 25.31) y lapanpaq munayniyuq kashqanta (Mar. 2.10; 2.28).
^ 13.32 Mat. 24.36.
^ 13.34 Luc. 12.36-38.
^ 13.35 Wayiyuqpaq parlarqa kikinpaqmi Jesucristo parlarqan.
