Proverbios 26:1-28
26 Usya tiempucho raju mana ali kashqanno y cosëcha tiempucho tamya mana ali kashqannömi upa runata alabashqanpis mana ali kaykan.
2 Oqrakashqa pichiwchanka y oqrakashqa wayanay* qeshwanman mana chayashqannömi jutsaynaq runamanqa maldicionashqanpis mana chayanqatsu.
3 Cawalluta bozalwanmi amansantsi.Bürruta wiruypami manshuyätsintsi.Mana tantiyakuq runatanami astaypa corrigintsi.
4 Mana tantiyakuq runawan shimi shimi ama rimanakuytsu.Rimanakurqa payno mana tantiyakuqmi kankipaq.
5 Ali chölu tukuq runataqa mana runa tukunanpaq sitiunman churay.
6 Mana yärakuypaq runata ima encargutapis encargakurqa chakikita pakikuqnömi kaykanki.Tsay niraq runataqa rabyanaykipaqmi encargakunki.
7 Chankan pakishqa runa puriyta mana kamäpakushqannömi mana tantiyakuq runapis shumaq yätsiyta kamäpakuntsu.
8 Warakaman rumita watarkur warakaqnömi mana tantiyakuq runata alabashqanpis kaykan.
9 Shinkashqa runa kashawan runa mayinta astashqannömi mana tantiyakuq runa yätsishqanpis kaykan.
10 Pïmaytapis lutala flëchashqan mana ali kashqannömi mana tantiyakuq runata minkakushqanpis mana ali kaykan.
11 Alquqa gumitashqanta yapaymi kutipan.Tsaynölami mana tantiyakuq runapis jutsa rurayman yapay kutin.*
12 Alabakuq runaqa mana tantiyakuq runapitapis peormi kaykan.*
13 Qela runaqa aruyta mana munarmi kayno nin:“Leonchari nänicho mikamanqa”.*
14 Kushpilancho punku tumashqannömi qela runapis cämalancho tikrapakur tikrapakur jitaräkun.
15 Qela runaqa plätun sirvishqa kaykaptinpis mikunalanpaqpis qelami kaykan.*
16 Qela runaqa qanchis yätsikuq runakunapitapis mas yachaq kashqantami yarpan.
17 Juk rimanakushqanman jatikarqa fiyu alquta rinripita tsariqnömi kaykan.
18 Löcu runa lutala pitapis flëchaqnömi
19 amïgunta lulapar brömapaqkunaqa kaykan.
20 Yanta mana kaptinqa nina upinmi.Shimi jatipäkuq mana kaptinqa rimanakuypis manami kantsu.
21 Carbón kaptinraqmi shanshapis rawran.Yanta kaptinraqmi ninapis rupan.Shimita jatipäkuq kaptinraqmi rimanakuypis kan.
22 Tulu shimi* wilapashqanqa mishkinöraqmi runata gustaykun.Tsaymi mayaqkunapa shonqunyaq chayaykun.*
23 Mitu mankata qellaywan enchapaptinpis rurinpaqa kashqalanmi kaykan.Tsaynömi fiyu runa ali shimilanpa parlarpis shonqunchöqa nanaparaykan.
24 Runa mayinta nanaparaq runaqa ali shimilanpa parlaparpis shonqunchöqa rabyapaykanmi.
25 Ali shimilanpa parlapäshuptikipis ama chaskiytsu.Shonqunchöqa contrayki sharkunanpaqmi yarpachakuykan.
26 Wamayäshuptikipis lapanmi musyapäkun rabyapaykäshushqaykita.
27 Juk jeqananpaq uchkuta uchkurqa kikinmi tsayman jeqanqapaq.Jukta nitinanpaq rumita churapaptinqa kikintami nitinqapaq.
28 Lulakuq runaqa mana lulakuqkunata chikinmi.Pitapis lulapaq runaqa pïmaytapis rabyanätsinmi.
Ichic wilacuycuna
^ 26.2 Wakin runakunaqa waqya pishqu nipäkun.
^ 26.11 2Ped. 2.22.
^ 26.12 Prov. 29.20.
^ 26.13 Prov. 22.13.
^ 26.15 Prov. 19.24.
^ 26.22 Wakin runakunaqa cuentestëru nipäkun y wakin runakunanami wilapishtëru nipäkun.
^ 26.22 Prov. 18.8.
