Salmos 26:1-12
(1a) David qelqashqan salmu.
26 (1b) TAYTA DIOS, jutsaynaq kaykashqäta conträkunata tantiyaykatsilay.Noqaqa munashqaykinömi kawaykä.Imaypis qamlamanmi yärakamü.
2 Imano kawashqätapis rikaykalämay.Shonqü alita o mana alita yarpashqantapis musyaykulay.*
3 Kuyakuq kashqaykitaqa imaypis yarparaykämi.Tsaymi munashqaykino imaypis kawaykä.
4 Lulakuqkunawanqa manami juntakashqätsu.Ali tukuqkunawanqa manami qoturashqätsu.
5 Fiyu runakuna juntakashqanmanqa manami aywätsu.Lutan yarpayniyuq runakunawanqa manami kirüpis tinkuntsu.
6 Jutsaynaq karmi maylashqano kaykä.Tsaymi *altarniki nawpanmanpis yaykü.
7 Tsaychömi agradëcikushpä qamta alabä.Kushikuypaq rurashqaykikunatami wakintapis wilapä.
8 Täkunayki wayikitapis kuyämi, TAYTA DIOS.Tsay wayikichömi munayniyuq kashqaykita tantiyä.
9 Jutsayuq runakunatanöqa ama wanuykatsilämaytsu.Wanutsikuq runakunatanöqa ama castigaykalämaytsu.
10 Paykunaqa mana alita ruranalanpaqmi yarpachakärin.Tsaynöpis chaskipakuypami imaykayuqpis rikakushqa.
11 Noqaqa manami jutsata rurartsu kawä.Kuyapämashpayki salvaykalämay, Tayta.
12 Yanapamaptikimi mana mantsakünatsu.Kuyashqayki runakuna juntakashqanchömi qamta alabashayki.
Ichic wilacuycuna
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
