Salmos 27:1-14
(1a) David qelqashqan salmu.
27 (1b) TAYTA DIOSQA atskïmi y salvamaqnïmi kaykan.Tsayno kaykaptinqa ¿pitaraq mantsaküman?Tayta Diosmi imapitapis tsapäman.Tsaymi pitapis mana mantsakütsu.
2 Wanutsimänanpaqmi conträkuna juntakarkaykan.Tsayno karpis kikinkunami ushakanqa.
3 Tsaytsika soldädukuna juntapämaptinpis manami mantsakushaqtsu.Wanutsimänanpaq kamarikuptinpis qammanmi yärakamü.
4 TAYTA DIOSTA juklaylatami manakü.Tsaylapaqmi yarparaykä.Payta manakü waran waran wayincho kanäpaq,kuyakuq kashqanta shumaq tantiyakunäpaq*y templuncho payta adoranäpaq.
5 Nakaykuna chayamuptin paymi wayinman pakamanqa.Tsaychömi conträkunapita tsapämanqa.Qaqa jananman qeshpitsiqnömi qeshpitsimanqa.
6 Conträkunata vincinäpaqmi yanapamanqa.Tsaymi templunman aywaykur kushikuypita sacrificiukunata rupatsishaq.Tsaychömi TAYTA DIOSTA kushishqa alabashaq.
7 Manakamushqäta mayaykalämay, TAYTA DIOS.Kuyapämashpayki ruwakamushqäta contestaykalämay.
8 Lapan shonqüwanmi qamta *ashiykä.Imaypis tsaynölami ashishayki.
9 Noqapita ama *pakakuykulaytsu.Rabyarpis ama kachaykalämaytsu.Qamlami imaypis yanapamanki.Japalätaqa ama kachaykalämaytsu.Qamlami salvamaqnï kaykanki.
10 Mamä y taytä kacharimaptinpis qammi shuntakamanki, TAYTA DIOS.
11 Imano kawanäpaq nänikita reqiykatsilämay,* TAYTA DIOS.Conträkuna rikakamänanpaq yanapaykalämay.
12 Chikimaqnïkunapa makinman ama kachaykalämaytsu.Paykunaqa conträ sharkurmi imatapis manakaqkunata jitapaykäman.
13 Noqa musyämi TAYTA DIOS yanapamänanpaq kashqanta.Kay patsacho kawashqäyaqqa yanapamashqanta rikashaqmi.
14 TAYTA DIOSLAMAN imaypis yärakäriy.Mana ajayaypa y mana utikaypa paylaman yärakäriy.
Ichic wilacuycuna
^ ashiy, Diosta ashiy Tayta Diosta ashirqa lapan shonquntsiwanmi payta manakuntsi (Sal. 105.3-4; 2Crón. 7.13-14). Manami templulachötsu Tayta Diosta Israel runakuna ashipäkurqan, sinöqa maytsaychöpis ashipäkurqanmi (Deut. 4.27-31; Jer. 29.12-14). Tayta Diosta ashirqa jutsata rurashqantsipita perdonta manakuntsi (Ose. 3.5) y payta imaypis cäsukuntsi (Sof. 2.3). Tayta Diosta ashirqa tarishunpaqmi (Deut. 4.29-31; 2Crón. 15.2; Isa. 45.19). Tayta Dios nimantsi payta ashinantsipaq (1Crón. 16.10-11; 22.19; Amós 5.4). Mana ashirqa manami pay munashqannötsu kawantsi (2Crón. 12.14).
^ pakakushqan, Dios pakakushqan Tayta Dios pakakushqanpaq Bibliacho parlarqa Tayta Dios mana yanapashqanta o mana tantiyatsishqantami niykan (Sal. 10.1; 13.1; 44.24; 89.46; 143.7).
^ 27.11 Nänikita reqiykatsilämay ninanqa munashqaykino kawanäpaq tantiyaykatsilämay ninanmi.
