Salmos 30:1-12
(1) Diospa wayinta inaurarmi kay salmuta cantapäkurqan.* David qelqashqan salmu.
30 (2) Conträkunapita salvamashqaykipitami qamta alabä, TAYTA DIOS.Manami kachapashqankitsu chikimaqnïkuna kushipämänanta.
2 (3) Ruwakur manakamuptï aliyätsimashqankimi, TAYTA DIOS.
3 (4) Qammi wanuypita tsapämashqanki.Wanunäpaq kaykaptïmi libramashqanki.
4 (5) TAYTA DIOS munashqanno kawaqkunaqa, payta alabapäkuy.Salmukunata cantar *santu Diosta alabapäkuy.
5 (6) Rabyarpis payqa rätulami rabyan.Kuyakuq kayninqa manami imaypis ushakantsu.Tsaymi tsakaypa waqarpis kushishqana wararkuntsi.*
6 (7) Ali kawanäpaq yanapamaptiki yarparqä imapis mana pasamänanpaq kashqanta.
7 (8) Kuyamashpayki shumaqmi cuidamarqayki, TAYTA DIOS.Kachaykamaptikimi itsanqa pasaypa mantsakuy tsarimarqan.
8 (9) TAYTA DIOS, qamtami manakamü.Qamtami ruwakamü.
9 (10) Wanuptï ¿ima alitataq qam jorqunki?Pamparaptï ¿imatataq jorqunki?Wanushkunaqa manami alabashunkinatsu.Ali kashqaykitapis manami wilakunqanatsu.
10 (11) TAYTA DIOS, mayamashpayki kuyapaykalämay.TAYTA DIOS, imaypis yanapaykalämay.
11 (12) Lakishqa kaykaptï kushikatsimaptikimi kushishqana qatswä.Lütu röpata jatikunäpa trukanqa fiesta röpatanami jatipämashqanki.
12 (13) Tsaymi salmukunata cantar alabashayki.Manami imaypis upälakushaqtsu.Qamtami imaypis agradëcikushayki.
Ichic wilacuycuna
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ 30.5 Isa. 54.7-8.
