Salmos 34:1-22
(1) Kay salmuqa David qelqashqanmi kaykan. Qelqashqan witsanmi Abimelecpa nawpancho löcu tukurqan.* Tsaymi Abimelecqa markanpita Davidta qarqurqan.
34 (2) TAYTA DIOSTA imay hörapis yusulpalä nishaq.Paytami imaypis alabashaq.
2 (3) TAYTA DIOSMAN yärakur pasaypami kushikü.Alabaykashqäta mayamar humildi kaqkuna kushikäritsun.
3 (4) TAYTA DIOSTA lapantsi alabashun.Juk shonqula jutinta joqarishun.
4 (5) Ruwakuptïmi TAYTA DIOS mayamashqa.Mantsariptïpis paymi valorta qomashqa.
5 (6) Tayta Diosman yärakuqkunaqa kushishqami karkaykan.Paykunaqa imaypis manami penqayman churashqatsu kanqa.
6 (7) Lakikur qayakuptïmi TAYTA DIOS mayamashqa.Yanapamaptinmi mana lakikütsu.
7 (8) TAYTA DIOSTA *mantsakuqkunataqa *angilninmi imapitapis tsapan.
8 (9) Kuyakuq kashqanta musyanaykipaq TAYTA DIOSMAN yärakäriy.Payman yärakurqa kushishqami kawankipaq.
9 (10) TAYTA DIOS munashqanno kawaq *santu runakuna, payta mantsakushun.Payta mantsakuqkunapaqqa manami imanpis pishinqatsu.
10 (11) Muchuy kaptinqa leonkunapis yarqananmi.TAYTA DIOSTA *ashiqkunami itsanqa lapan munashqankunata taripäkunqa.
11 (12) Kuyay wamräkuna, yachatsishqäta mayapäkunaykipaq shapäkamuy.TAYTA DIOSTA mantsakunaykipaqmi yachatsishayki.
12 (13) Atska wata kawayta munarqa y kushishqa kawayta munarqa
13 (14) lutankunata ama rimapäkuytsu.Tsaynöla imaypis ama lulakäriytsu.
14 (15) Lutankunata ruranaykipa trukanqa alilata rurapäkuy.Rimanakunaykipa trukanqa pïmaywanpis ali kawapäkuy.
15 (16) Alilata ruraqkunataqa TAYTA DIOS imaypis alimi rikan.Manakushqankunatapis mayanmi.
16 (17) Mana ali ruraqkunatami itsanqa rikaytapis mana munantsu.*Rabyashpanmi paykunata chipyaq elqätsinqa.
17 (18) Ali runakuna manakuptinqa TAYTA DIOS mayanmi.Ima nakaycho kaptinpis paymi yanapan.
18 (19) Jutsa rurashqanpita lakikuqkunataqa TAYTA DIOS kuyapanmi.Ima ruraytapis mana kamäpakuqkunata paymi yanapan.
19 (20) Diosta cäsukuq runapaqqa imalapis kaykanmi lakikunanpaq.Tsayno kaptinpis TAYTA DIOSMI imaypis yanapan.
20 (21) Paytaqa mana alikunapita tsapanmi.Manami juk tululanpis pakishqatsu kanqa.*
21 (22) Fiyu runakunaqa mana alita rurashqanpitami wanupäkunqa.Ali runata chikiq kaqtaqa Tayta Diosmi castiganqa.
22 (23) Sirviqninkunatami itsanqa TAYTA DIOS wanuypita tsapanqa.Payman yärakuqkunataqa manami castiganqatsu.
Ichic wilacuycuna
^ 34.0 1Sam. 21.10-15.
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ ashiy, Diosta ashiy Tayta Diosta ashirqa lapan shonquntsiwanmi payta manakuntsi (Sal. 105.3-4; 2Crón. 7.13-14). Manami templulachötsu Tayta Diosta Israel runakuna ashipäkurqan, sinöqa maytsaychöpis ashipäkurqanmi (Deut. 4.27-31; Jer. 29.12-14). Tayta Diosta ashirqa jutsata rurashqantsipita perdonta manakuntsi (Ose. 3.5) y payta imaypis cäsukuntsi (Sof. 2.3). Tayta Diosta ashirqa tarishunpaqmi (Deut. 4.29-31; 2Crón. 15.2; Isa. 45.19). Tayta Dios nimantsi payta ashinantsipaq (1Crón. 16.10-11; 22.19; Amós 5.4). Mana ashirqa manami pay munashqannötsu kawantsi (2Crón. 12.14).
^ 34.12-16 1Ped. 3.10-12.
^ 34.20 Juan 19.36.
