Salmos 36:1-12
(1) Cantaqkunapa mandaqninpaqmi. TAYTA DIOSPA sirviqnin David qelqashqan salmu.
36 (2) Jutsa ruraqkunaqa mana alita ruranalanpaqmi yarpachakärin.Tayta Diosta *mantsakunanpaq manami yarpaylapis yarpapäkuntsu.*
2 (3) Paykunaqa yarpapäkun pïmaypitapis mas ali kashqantami.Jutsata rurarpis manami penqakärintsu.
3 (4) Imata parlarpis lulakurmi manakaqkunata rimapäkun.Yarpayninkunapis upatakashqami kaykan.Alikunata rurananpa trukanqa lutankunalatami rurapäkun.
4 (5) Cämanchöpis lutankunata ruranalanpaqmi yarpachakärin.Yachakashqa karmi jutsa ruraykunata kachariyta mana munapäkuntsu.
5 (6) TAYTA DIOS, kuyakuq kashqaykiqa jana patsayaqmi chayan.Promitishqaykita cumpliq kashqaykiqa pukutayyaqmi chayan.*
6 (7) Ali arreglaq kashqaykiqa jatun puntakunanömi firmi kaykan.Yachaq kashqaykiqa lamar hondu kashqannömi kaykan.Runatapis uywatapis qammi cuidaykanki, TAYTA DIOS.
7 (8) Kuyakuynikiqa pasaypa kushikuypaqmi kaykan.Älayki rurinmanmi runakuna amparakun.
8 (9) Wayikipita mikuyta kamaripaptikimi lapan saksashqa karkaykan.Mayutanöraq bendicionnikita chaskirmi kushishqa kawapäkun.
9 (10) Qammi pïmaytapis kawayta qonki.Qamman yärakurraqmi ali kawapäkü.
10 (11) Qamman yärakamuqkunata kuyapaykulay.Munashqaykino kawaq runakunata yanapaykulay.
11 (12) Runa tukuqkuna nakatsimänanta ama kachapaykulaytsu.Fiyu runakuna makitsakamänanta ama munaykulaytsu.
12 (13) Rikapäkuy tsay runakunata desgracia imano pasashqantapis.Yapayqa manami munayniyuq kanqanatsu.
Ichic wilacuycuna
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
^ 36.5 Sal. 57.10.
