Salmos 42:1-11
(1) Cantaqkunapa mandaqninpaqmi. Corépita miraqkuna qelqashqan salmumi.
42 (2) Yakunashqa luychu yakuta ashishqannöraqmi noqapis qamta *ashï, Tayta Dios.
2 (3) Imayyaqpis kawaq Dios kaptikimi yakunaypanöraq qamta ashiykä.*¡Imayraq nawpaykiman chayamushaq qamta adoranäpaq!
3 (4) Runakunaqa imay hörapis asipaykäman kayno nirmi: “¿Maytaq Diosniki?”Tsaymi pasaypa lakikur shonqüpis mana mikanantsu.Wararküpis qoyarküpis waqaykälarmi.
4 (5) Nawpataqa atska runakunata pushakurkurmi Tayta Diospa wayinman aywaq kä.Tsaychömi fiestata rurar Tayta Diosta kushishqa alabaq kä.Tsayno kashqäta yarparkurmi pasaypa lakikü.
5 (6) Ay vïdala vïda, ¿imanirtaq turwatä?¿Imanirtaq lakikü?Tayta Dioslamanmi imaypis yärakushaq.Paytami imaypis alabashaq.Paymi salvamaq Tayta Diosnï.
6 (7) Imata ruranäpaqpis gänasnï manami kantsu.Hermón y Mizar puntakunapita Jordán mayu qalaykamuqcho kaykarpis qamlatami yarparaykä.
7 (8) Manana yanapamaptikimi pasaypa lakishqa kaykä.*Bunyaypa bunyar mayu aywar mantsariypaq kashqannömi lakikuynïkuna kaykan.
8 (9) Tsayno kaptinpis TAYTA DIOSMI kuyakuq kashqanta waran waran tantiyatsiman.Tsakaypapis alabanäpaqmi yanapaman.Kawayta qomaqnï Tayta Diostami lapan shonqüwan manakü.
9 (10) Imapitapis tsapämaq Tayta Diosnïta manakurmi kayno nï:“¿Imanirtaq qonqaykalämashqanki?Conträ sharkuptinpis lakishqa mana purinäpaq yanapaykalämay”.
10 (11) Chikimaqnïkunami waran waran kayno nirkaykäman:“¿Maychötaq Diosniki kaykan?”Tsayno nir asipämaptin toqshüyaqmi nanaypis chayaykun.
11 (12) Ay vïdala vïda, ¿imanirtaq turwatä?¿Imanirtaq lakikü?Tayta Dioslamanmi imaypis yärakushaq.Paytami imaypis alabashaq.Paymi salvamaq Tayta Diosnï.
Ichic wilacuycuna
^ ashiy, Diosta ashiy Tayta Diosta ashirqa lapan shonquntsiwanmi payta manakuntsi (Sal. 105.3-4; 2Crón. 7.13-14). Manami templulachötsu Tayta Diosta Israel runakuna ashipäkurqan, sinöqa maytsaychöpis ashipäkurqanmi (Deut. 4.27-31; Jer. 29.12-14). Tayta Diosta ashirqa jutsata rurashqantsipita perdonta manakuntsi (Ose. 3.5) y payta imaypis cäsukuntsi (Sof. 2.3). Tayta Diosta ashirqa tarishunpaqmi (Deut. 4.29-31; 2Crón. 15.2; Isa. 45.19). Tayta Dios nimantsi payta ashinantsipaq (1Crón. 16.10-11; 22.19; Amós 5.4). Mana ashirqa manami pay munashqannötsu kawantsi (2Crón. 12.14).
^ 42.1-2 Sal. 63.1; 143.6.
