Salmos 66:1-20
(1a) Cantaqkunapa mandaqninpaqmi. Kay salmuqa cantanantsipaqmi kaykan.
66 (1b) Kay patsacho taqkuna, Tayta Diosta kushishqa alabapäkuy.
2 Jutinta joqarishpayki adorapäkuy.Munayniyuq kashqanpita lapan shonquykiwan alabapäkuy.
3 Tayta Diosta alabar kayno nipäkuy:“Rurashqaykiqa lapanpis kushikuypaqmi kaykan.Munayniyuq kaptikimi contraykikunapis nawpaykiman qonqurpakamun.
4 Kay patsacho taqkunaqa lapanmi adoraykäshunki.Alabanzakunata cantarmi alabashunki”. Selah
5 Tayta Dios rurashqanta rikaq shapäkamuy.Favornintsi sharkur mantsariypaq rurashqanta rikapäkuy.
6 Paymi Puka Lamartapis tsakitsirqan.*Mayutapis tsakirkatsirmi unay ayluntsikunata pasatsirqan.*¡Tayta Diosta alabar kushikäriy!
7 Munayniyuq karmi imayyaqpis mandanqa.Intëru naciontami imano kashqantapis rikaykan.Jutsasapakuna paypa contran ama sharkutsuntsu. Selah
8 ¡Intëru nacioncho taq runakuna, Tayta Diosnintsita alabapäkuy!¡Maytsaymanpis mayakaqpaq payta alabapäkuy!
9 Paymi kananyaqpis kawayta qomantsi.Contrantsikuna mana wanutsimänantsipaqmi tsapaykämantsi.
10 Tayta Dios, tsayno karpis noqakunata probamashqanki.Qellayta tsulutsir qanranta jorquqnömi noqakunata purificamashqanki.
11 Trampamanmi yaykatsimashqanki.Pasaypa nakaymanmi churapäkamashqanki.
12 Manakaq runakunapa munayninman churamashqanki.Cargashqa mayupa pasaqno y rupaykaq ninapa pasaqnömi nakapäkushqä.Tsaypitaqa ali kawapäkunäpaqmi yanapamashqanki.
13 Templuykiman yaykurmi sacrificiukunata qampaq rupatsishaq.Tsaychömi cumplishaq
14 fiyupa lakikushqä höra qamta promitishqäta.
15 Sacrificiuta rupatsinäpaqmi wera uywakunata apamushaq.Törukunata, chïvukunata y carnikunatami apamushaq. Selah
16 ¡Tayta Diosta *mantsakuq kaqqa, lapayki mayanaykipaq shapäkamuy!Tayta Dios imano yanapamashqantapis wilapäshayki.
17 Lapan shonqüwanmi Tayta Diosta manakurqä.Lapan yarpaynïwanmi payta alabarqä.
18 Jutsa ruraykunata mana kachariptïqa manakushqäta Tayta Dios manami mayamanmantsu karqan.
19 Itsanqa manakushqäta mayamar ruwakushqänömi yanapamashqa.
20 ¡Alabashqa kaykulätsun Tayta Dios!Payqa manakushqäta mayashqami.Kuyamashqantapis musyatsimashqami.
Ichic wilacuycuna
^ 66.6a Éxo. 14.21; Sal. 114.3, 5.
^ 66.6b Jos. 3.14-17.
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
