Salmos 71:1-24
71 TAYTA DIOS, qamlamanmi yärakamü.Runakuna mana penqapämänanpaq ama kachaykalämaytsu.
2 Alilata ruraq kashpayki salvaykalämay.Manakamushqäta mayaykalämay.Jukla salvaykalämay.
3 Pakakunä qaqa kaykulay.Qammanmi imaypis qelikamü.Salvamänaykipaq kashqanta musyarmi yärakamü.Qammi tsapämaqnï qaqa y amparakunä törri kaykanki.
4 Tayta Dios, fiyu runakunapita tsapaykalämay.Jutsasapakunapita y wanutsikuq runakunapita salvaykalämay.
5 Yärakamuptïmi ima desgraciapitapis tsapämanki.Mözu kashqäpita patsami qamman yärakamü.
6 Mamäpa pachancho kaykaptïpis noqawanmi kaykashqanki.Qam munaptikimi yurishqäpis.Tsaymi imaypis alabashayki.
7 Lapanchöpis yanapamaptikimi wakin runakunapis noqano kawayta munarkaykan.
8 Lapanpaq munayniyuq kaptikimi waran waran alabaykälar qoyarkü.
9 Awkin kaptïpis ama qonqaykalämaytsu.Kalpaynaqna kaptïpis ama kachaykalämaytsu.
10 Wanutsimayta munaqkunaqa juntakaykurmi conträ sharkunanpaq wilanakurkaykan.
11 Paykunaqa kaynömi nirkaykan: “Qatikachashpantsi tsarimushun.Diospis kachariykushqanami.Manami pipis salvanqatsu”.
12 Tayta Dios, noqapita ama witikuytsu.Jukla shamur yanapaykalämay.
13 Chikipämaqkunaqa penqaypaq wanutsishqa kaykulätsun.Conträ sharkuqkunataqa kikinkunata asipaykulätsun.
14 Noqaqa imayyaqpis qamlatami shuyaraykäshayki.Waran waranmi qamta alabashayki.
15 Qoyaytami kuyapämar salvapäkamashqaykita wilakushaq.Ayka kuti salvamashqaykitapis manami yupayta kamäpakütsu.
16 Espantaypaq rurashqaykitami wilakushaq.Japalayki imaypis ali ruraq kashqaykitami pïmaytapis wilapäshaq.
17 Tayta Dios, mözu kashqäpita patsami yachatsimashqanki.Tsaymi espantaypaq rurashqaykikunata kananyaqpis wilakuykä.
18 Kanan witsan runakunata y paykunapita miraqkunatapis wilapäshaqraqmi.Awkinyar soquyashqa kaptïpis ama kachaykalämaytsu.
19 Tayta Dios, manami pipis qamno alilata ruraq kantsu.Espantaypaqkunatami rurashqanki.Manami pipis qammanqa tinkuntsu.
20 Fiyupa nakayman y lakikuyman churarkamarpis yapaymi yanapamanki ali kawanäpaq.Wanunäpaqna kaykaptïpis yapaymi sharkatsimankipaq.
21 Munayniyuq kanäpaqmi yanapamankipaq.Yapaymi kushikatsimankipaq.
22 Israel runakunapa *santu Diosnin, tsayno yanapamashqaykipitami arpakunata y *salteriukunata tukapalanpa adorashayki.Himnukunata cantarmi alabashayki.
23 Salvamashqaykipitami lapan shonqüwan kushishqa alabashayki.
24 Desgracia pasamänanta munaqkunaqa pasaypa penqakushqami karkaykan.Tsaymi ali ruraq kashqaykita imay hörapis parlaykäshaq.
Ichic wilacuycuna
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ salteriu Salteriuqa taksha arpa niraqmi kaykan (1Sam. 10.5; 2Sam. 6.5; 1Rey. 10.12; 1Crón. 13.8; 15.28; 2Crón. 5.12; Sal. 33.2; 57.8; 81.2; Isa. 5.12).
