Salmos 9:1-20
(1) Cantaqkunapa mandaqninpaqmi. Kënata y arpata tukapalanpa cantapäkunki. David qelqashqan salmu.
9 (2) Tayta Dios, lapan shonqüwanmi alabashayki.Mantsariypaq rurashqaykikunatami wilakushaq.
2 (3) Yanapamashqaykita tantiyarmi pasaypa kushikü.Poderniyuq Tayta Diosnilä, qamlatami imaypis alabashayki.
3 (4) Yanapamaptiki conträkunapis qeshpikärinmi.Qeshpiykashqanchömi wanupäkun.
4 (5) Trönuykiman jamaykurmi conträkunata juzgashqanki.Manakaqta jitapämaptin favornïmi sharkushqanki.
5 (6) Juk nación runakunata olqüpashqankimi.Jutsa ruraq runakunata wanutsishqankimi.Paykunataqa manami pipis yarpanqanatsu.
6 (7) Conträ runakuna lapanmi ushakashqa.Markankunapis chipyami ushakashqa.Markankunapa jutinkunapis qonqakashqanami kaykan.
7 (8) TAYTA DIOSQA imayyaqpis mandamaqnintsi reymi kaykan.Paymi trönunman jamaykur runakunata juzganqa.
8 (9) Lapan runatami imanöpis kawashqanman tupu juzganqa.Lapan naciontami mana jananpaylapa juzganqa.
9 (10) TAYTA DIOSMI waktsakunapa favornin sharkun.Nakaptinpis paymi yanapan.
10 (11) TAYTA DIOS, *ashishuqnikikunataqa imaypis yanapaykankimi.Tsaymi makikicho kawaqkuna qamlaman yärakamun.
11 (12) *Sióncho taykaq TAYTA DIOSTA alabashun.Yanapaykämashqantsita maytsay nacionchöpis wilakushun.
12 (13) Wanutsikuq runakunataqa Tayta Dios juzganmi.Nakaqkuna waqashqanta mayar yanapanmi.
13 (14) Kuyapaykalämay, TAYTA DIOSNILÄ.Conträkuna nakatsimaptin yanapaykalämay.Wanutsimänanta ama munaykulaytsu.
14 (15) Yanapamaptikiqa Siónpa punkunkunaman aywaykurmi pïmaytapis wilapäshaq alabashunaykipaq.Salvamashqaykipitami kushishqa alabashayki.
15 (16) Juk nación runakunaqa kikin uchkushqan pözuman jeqaqnömi karkaykan.Trampata churashqanman kikin jatikaqnömi karkaykan.
16 (17) Tsaynöpami TAYTA DIOS tantiyatsimantsi mana cäsukuq runakunata castigaykashqanta.Castigashqa kananpaqqa kikinkunami jutsayuq karkaykan. Higaión. Selah
17 (18) Jutsa ruraq runakuna y Diosta mana cäsukuq runakunaqa wanurmi ushakanqa.
18 (19) Waktsakunataqa Tayta Dios manami pasaypatsu qonqaykunqa.Jukla mana salvarpis nirkur salvanqami.
19 (20) TAYTA DIOS, jukla yanapaykulay.Runakuna lutanta rurananta ama kachapaykulaytsu.Juk nación mana criyiq runakunata nawpaykicho juzgaykulay.
20 (21) Mantsakärinanpaq regorwan juzgaykulay, TAYTA DIOS.Ushakaqla kashqanta tantiyaykatsilay. Selah
Ichic wilacuycuna
^ ashiy, Diosta ashiy Tayta Diosta ashirqa lapan shonquntsiwanmi payta manakuntsi (Sal. 105.3-4; 2Crón. 7.13-14). Manami templulachötsu Tayta Diosta Israel runakuna ashipäkurqan, sinöqa maytsaychöpis ashipäkurqanmi (Deut. 4.27-31; Jer. 29.12-14). Tayta Diosta ashirqa jutsata rurashqantsipita perdonta manakuntsi (Ose. 3.5) y payta imaypis cäsukuntsi (Sof. 2.3). Tayta Diosta ashirqa tarishunpaqmi (Deut. 4.29-31; 2Crón. 15.2; Isa. 45.19). Tayta Dios nimantsi payta ashinantsipaq (1Crón. 16.10-11; 22.19; Amós 5.4). Mana ashirqa manami pay munashqannötsu kawantsi (2Crón. 12.14).
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
