Wamralapita auquisganyaj Samuelga Jehovalata cäsucurgan. Wamrala carpis, Elipa Hofní y Finehás wamrancunano manami carganchu, paycunaga Jehovata manami cäsucärejchu (1Sa 2:22-26). Samuel winaycashgancho Jehovapa nawinpäga alimi caycargan (1Sa 3:19). Samuel auquinna caycarpis y wamrancuna mana cäsucoj captinpis, payga Jehovalata cäsucurgan (1Sa 8:1-5).

¿Imatataj yachacunchi Samuel rurashganpita? Mozo-jipashcuna sasa pruebacunapa pasaptiqui Jehovaga musyanmi imano caycashgayquita. Jina valiente canayquipäpis yanapashunquimi (Is 41:10, 13). Samuelpa wamrancuna Jehovata mana cäsucuptinpis, payga calpachacurgan yäracoj cananpaj y Jehovalata sirvinanpaj. Chaynolami canan wichanpis waquin taytacuna laquishga caycanman wamrancuna Jehovapita carucäcuptin, chay horami Samuel rurashganman yarpachacur shacya shacyala caycanman. Taytancuna Jehovata mana cachaypa sirviycashganta ricar wamrancuna tiempuwanga Jehovaman cutimunmanmi.

CAY VIDEUTA RICÄRIY: PAYCUNAPITA YACHACUSHUN: SAMUEL. NIRCUR CAY TAPUCUYCUNAPITA PARLACAMUY:

• ¿Imanotaj Samuel wamra captin valurcharcurgan?

• ¿Ima rurartaj Dani valurcharcurgan?

• ¿Samuel auquisna caycaptin ima alitaj rurargan?

• ¿Danipa taytancuna ima alitaj rurargan?