¿IMA rasumpa kajpita? Maychika tapukuykunata runakuna rurakuyangampita. Capazchi imaylapis kay tapukuykunata tapukushkanki:

• ¿Yarpachakunchuraj noganchipaj Dios?

• ¿Imaylapis ushakangachuraj guërrakunawan nakaykuna?

• ¿Imataj pasamanchi wanurishga?

• ¿Wanushgakuna kawariyämungachuraj?

• ¿Imanötaj Diosta mañakushwan wiyamänanchipaj?

• ¿Imanötaj tarishwan kushishga kawayta?

¿Maychötaj tarishwan kay tapukuykunapa respuestankunata? Maychika librokunam respuestankunata charanganta niyan, pero contranakuyanmi. Wakinkunapa respuestankunaga tiemponchö alinömi kashga, pero tiempo pasanganmannömi gongakäriyan o alchapäriyan o juktana rurayan.

Pero juk librochöga kaykanmi rasumpa kaj respuestankuna. Diosta mañakunganchömi Jesucristo kaynö nirgan: “Palabraykiga rasumpa kajmi” (Juan 17:17, NM). Chay Palabratam Biblia nishpa reguinchi. Gatejninchömi rikäshun Biblia ali claro kay tapukuykunata contestanganta.

¿IMANIRTAJ KAYNÖ TAPUKUNCHI?: Pasaypa mana ali tiempochömi kawanchi. Nakachimanganchi problëmakuna Diospa munaynin kangantami maychikaj religionkuna yachachikuyan.

BIBLIA YACHACHIKUNGAN: Diosga manam mana alikunata ruranchu. Job 34:10 textom kaynö nin: “¡Yarpayllapis ama yarpäshunchu munayniyoj tayta Diospäga ‘mana allitami ruran o llutantami ruran’ nerga!”. Aläpa kuyakoj karmi Diosga runakunata bendecinga. Chaymi Jesús kaynö mañakunanchipaj yachachimargunchi: “Ciëlochö kaykaj Taytalä [...]. Gobiernoyki shamuchun. Munayniki rurakaykuchun ciëlochöpis y patsachöpis” (Mateo 6:9, 10, NM). Diosninchiga yarpachakunmi noganchipaj, chaymi imaykata ruramushga munaynin cumplikänampaj (Juan 3:16).

Jina rikäri Génesis 1:26-28; Santiago 1:13 (NM), y 1 Pedro 5:6, 7 (NM).

¿IMANIRTAJ KAYNÖ TAPUKUNCHI?: Guerra kanganrëkurmi maychikaj runakuna wanuyashga. Y problëmakuna kaptinmi imaypis nakaykanchi.

BIBLIA YACHACHIKUNGAN: Diosga awnikushga entero Patsachö ali kawakuy kanampajmi. Jesucristo gobernamuptinga runakuna manam “guërrapäpis yachachinaconganachu” y espädankunatapis “rëjancunamanmi” tikrachinga (Isaías 2:4). Runakunapaj awnikurmi Biblia kaynö wilamanchi: “Wagay manami canganachu. Wañuy manami canganachu. Nanächicuypis, llaquicuypis manami canganachu. Unay caj cawaycunaga llapannami ushacanga” (Apocalipsis [Revelación] 21:3, 4).

Jina rikäri Salmo 37:10, 11; 46:9, y Miqueas 4:1-4.

 

¿IMANIRTAJ KAYNÖ TAPUKUNCHI?: Casi lapan religionkunam yachachikuyan pipis wanuriptin alman puringanta. Wakinkunanam yachachikuyan wanushgakuna kawaykajkunata manchakächinganta, o mana ali kajkunatana infiernochö Diosninchi castiganganta.

BIBLIA YACHACHIKUNGAN: Wanurirga ushakärinchimi. Eclesiastés 9:5 textom kaynö nin: ‘Wanushgacunaga imatapis manam musyayanchu’. Awmi, rasumpam chayga, manam pitapis manchakächinchu ni yanaparimpischu (Salmo 146:3, 4).

Jina rikäri Génesis 3:19 y Eclesiastés 9:6, 10.

¿IMANIRTAJ KAYNÖ TAPUKUNCHI?: Lapanchimi ali kawakuyta munanchi kuyashga amïgonchikunawan y kastanchikunawan; chaymi, wanushga kaykajkunawanga aläpa munanchi yapay tarinakuyta.

BIBLIA YACHACHIKUNGAN: Casi lapan wanushga runakunam kawariyämunga. Awmi, Jesusmi awnikushga kaynö nir: “Diospa yarpayninchö kaykaj lapan wanushgakunam [Jesuspa] vozninta wiyarir yargariyämunga” (Juan 5:28, 29, NM). Lapan kawayämoj runakunaga kay Patsachömi kawayanga, y puntalapitana Diosninchi awnikungannö kay Patsa mushojman tikrangantam rikäyanga (Lucas 23:43, NM). Awmi, chay wichanmi lapan Diospa sirwejninkuna mana gueshyaypa y mana wanuypa kawakuyanga. Bibliam nin: “Alli runacunami ichanga alli pachacho tiyanga [täranga]. Chayllachömi imaycamapis” kawakuyanga (Salmo 37:29).

Jina rikäri Job 14:14, 15; Lucas 7:11-17, y Hechos 24:15.

¿IMANIRTAJ KAYNÖ TAPUKUNCHI?: Lapan religionkunachömi runakuna Diosta mañakuyan. Chaynö kaptimpis, mañakuyninkunata Diosninchi mana wiyangantami pensayan.

BIBLIA YACHACHIKUNGAN: Mañakuyninchichö chay palabralata yapay yapay mana ninapajmi Jesusga yachachikurgan, kaynömi nirgan: ‘Diosta mañacorga juk rimashgallayquita yaparir-yaparerga ama rimanquichu’ (Mateo 6:7). Dios wiyamänanchita munarga, pay munangannömi mañakushwan. Chaypajga, munaynin ima kangantami yachakunanchi, chaynöpa pay munangannö mañakunapaj. 1 Juan 5:14 textomi kaynö nin: ‘Chaymi Tayta Diosninchëga Pay munashganta mañacuptinchi wiyamanchi’.

Jina rikäri Salmo 65:2; Juan 14:6, 14, y 1 Juan 3:22.

¿IMANIRTAJ KAYNÖ TAPUKUNCHI?: Kushishga kawakuyta pensarmi runakunaga guellayta, reguishga kayta o kuyaylapa kayta ashiyan. Chaynö kaptimpis, manam kushishgachu kawakuyan.

BIBLIA YACHACHIKUNGAN: Jesusmi parlargan kushishga kawayta imanö tarinapaj kajta, kaynömi nirgan: “Kushishgam kayan Diospita yachakuyta munajkunaga” (Mateo 5:3, NM). Kushishga kawaytaga tarishun Diospita rasumpa kajta y munaynin ima kanganta yachakurmi. Chay rasumpa kajga Bibliachömi kaykan, y chayta yachakunganchimi yanapamanchi kawayninchichö ima más välej kanganta musyanapaj. Biblia yanapamänanchita dejarmi más kushishga y alila kawakunchi (Lucas 11:28).

Jina rikäri Proverbios 3:5, 6, 13-18 y 1 Timoteo 6:9, 10.

 Sojta tapukuykunata Biblia contestangantam yachakurirgunchi. ¿Maslata musyayta munankiku? Chaynö kaptinga, ‘Diospita yachakuyta munajkunachöchi’ gampis kaykanki. Capazchi tapukushkanki Diosninchi noganchipaj yarpachakurga imanir aläpa mana alikunata y nakaykunata permitinganta. O quizá musyayta munanki familiayki imanö más kushishga kawakuyänampaj kajta. Bibliam alej claro contestamun kay tapukuykunata y maskunatapis.

Chaynö kaptimpis, manam wakin runakunaga chay respuestakunata Bibliachö ashiyanchu. Biblia aläpa sasa o aja entiendinan kangantam pensayan. ¿Munankimanchuraj Bibliachö chay respuestankunata tarinaykipaj pipis yanapashunaykita? Chayrëkurmi Jehoväpa testïgonkunaga juk shumaj yanapakuyta alistayämushga.

Y chayga, wayiykichö Bibliapita grätisla yachakunaykipaj yanapakuymi. Juk Jehoväpa testïgonmi wayiykiman o munangayki sitioman Bibliapita yachachishunaykipaj shamuyta puëdin. Maychikaj runakunami kaynö yanapakuyta chaskiyashga, y rasumpa kajta tariyangantam niyashga.

Jina kikikim rikanki Bibliapa rasumpa kaj yachachikuyninkuna imapitapis más välej kanganta. Manam manchakächikoj y pantakächikoj creenciakunalapitachu libramanchi, sinöga aläpa kushishga kawakunapaj, shamoj tiempochö ima bendicionkunata tarinapaj y imapaj kawaykanganchita musyanapajmi yanapamanchi. Kikin Jesusmi nirgan: ‘Rasunpa cajtam musyanquipaj. Chay rasunpa cajmi jorgushunqui libri canayquipaj’ (Juan 8:32).