13 CAJ YACHACUY
Biblia wilakunganno, ¿imataj religiunkunawan pasanga?
1. ¿Alichuraj lapan religiunkuna kayan?
Lapan religiunkunachömi ali shongu runakuna kayan. Y paykunataga Diosninchi kuyanmi, y ¡chayga ali wilakuymi! Pero lakikuypajga religiunpa jutincho alapa mana alikunata rurayanganmi (2 Corintios 4:3, 4; 11:13-15). Wakin religiunkunapaj parlarmi noticiakunacho wiyanchi terroristakunata yanapäyashganta, colorninkunaraykur wanuchinakuyashganta y pishi wamrakunata tukuyta rurayashganta. ¡Mayraj kayga lakichishga ali shonguyoj runakunata! Lei Mateo 24:3-5, 11, 12.
Rasumpa kaj religiunga Jehovatami respetan, pero lutan kajga ofendinmi. Kaymi Diosninchipita, wanushgakunapita y Biabliacho mana yurimoj yachachikuykunapita lutankunata yachachikuyan. Pero Jehovaga munan runakuna rasumpa kajta Paypita musyayänantami. Lei Eclesiastés 9: 5, 10 y 1 Timoteo 2:3-5.
2. Biblia wilakunganno, ¿imataj religiunkunawan pasanga?
Diosga manami chaskinchu “Diosta kuyä” nirpis Satanás munashganno kawaj runakunataga (Santiago 4:4). Bibliaga ‘Jatuncaray Babilonia’ nishpami lutan religiunkunata gayan, chaynöga nin unay Babilonia markacho mana ali religiunkuna yuriyashga kaptinmi. Ichiklachönami runakunata pantakächej lutan religiunkunata ilajpita Diosninchi ushakärachinga. Lei Apocalipsis 17:1, 2, 5, 16, 17 y 18:8.
Jehovaga manami gonganchu lutan religiunkunacho kaykaj ali shonguyoj runakunata, y paykunatami markanman apaykämun. ¿Imano? Rasumpa kajpita yachachirmi. Lei Miqueas 4:2, 5.
3. ¿Imatataj rurayanman ali shonguyoj runakuna?
Rasumpa kaj religiunchöga manami rakinakuy kanchu
Jehovaga yarpanmi rasumpa kajta kuyaj y ali kajta rurayta munaj runakunata. Chaymi luta religiunpita yarguyänanta munan. Y Jehovata kuyarga listumi kaykäyanga cambiayänampaj. Lei Apocalipsis 18:4.
Apostulkunapa tiempunchömi ali shonguyoj runakunaga Diospa ali wilakuyninta kushishga chaskikuyaj. Jehovapa yanapakuyninwanmi chay runakunaga kushi kushila ali kawayta tariyargan. Paykunanölami noganchipis espiritual kajta puntaman churarkur Diosninchipa ali wilakuyninta chaskikunanchi. Lei 1 Tesalonicenses 1:8, 9 y 2:13.
Luta religiunninta jaguirirkur rasumpa kajpita yachakojkunataga kushishgami Diosninchi chaskin. Paykunaga Dioswanmi amigo kayan, kuyakoj cristianukunawanmi goturäyan y imaykamapis kawaytami shuyaräyan. ¿Kay bendiciunkunata chaskita munankimanchuraj? Lei Marcos 10:29, 30 y 2 Corintios 6:17, 18.
4. ¿Imatataj Dios ruranga kay Patsacho jauka y kushi kushi kaway kanampaj?
Luta religiunkunata ushakärachirmi Jehovaga ali kawayta apamunga. Mananami pantakächikoj ni rakikächikoj religiunkunaga kanganachu. Lapan runakunami Jehová Dioslata adorapäkunga. ¿Manaku kayga juk ali wilakuy? Lei Apocalipsis 18:20, 21 y 21:3, 4.
