Chayno captenga chay cristianupa canan caj casado vidantaga runacunapa leynincho valejtano ricanman (unay caj matrimoniunga ushacashgana caycan). Chaypäga divorciupita y yapay casaracuypita Jesús tantiachicushganta ricärishun.

Mateo 19:9 textucho Jesús nergan imaraycur pipis raquicäcunanpaj cajta. Cayno nergan: “Mayqan runapis warmin mana jarukuykaptin juk warmiwan tarqa adulteriu jutsatami ruraykan”. Jesusga caytami yachachicuycargan 1) pï runapis raquicanman warmin jucwan cacuptinraj, 2) chayno mana captenga, chay runaga adulterio juchatami ruraycan. a

Chauraga, ¿nishwanchuraj chay runa juchata rurarcur warminpita divorciacurcur Jehovapa ricayninchoga librina caycan yapay casaracunanpaj? Manachi ¿Imanir?, warmi cajpitami canga perdunananpaj o manapis. Pero mana perdunayta munaptenga y divorcio cananpaj ley nishganno papelcuna ruracaptenga, librinami mayganpis caycan yapay casacärinanpaj.

Ichanga warmi cäga matrimoniunta valurashganraycur majanta perdunayta munanmanmi. Pero ¿imaraj canman warmin perdunananpaj niycaptinpis runan mana chasquicuptin y quiquilan divorciacuptin? Warmin perdunayta munaptin y divorciacunapaj papelta mana firmapaptenga, chay runaga Jehovapa ricaynincho manami librichu caycan yapay casaracunanpaj. Y imatapis mana cäsucur jucwan casacurga yapaymi adulterio juchata ruraycan. Ancianucunaga yapaymi comité judicial nishganta camacächenga y gayachenga chay runata (1 Cor. 5:1, 2; 6:9, 10).

Juc cristiano casaduraj caycar yapay casaracuptenga, ¿imanotaj congregaciunga ricanman naupa caj y canan caj matrimoniuta? ¿Jehovapa ricayninpäga naupa caj matrimoniun jinalachuraj valin? ¿Punta caj warminga majan jucwan casäduna caycaptinpis decidinmanchuraj perdunananpaj o manapis? ¿Último caj matrimoniutaga adúltero nishpachuraj gayashwan?

Naupataga tantiarganchi inocente caj warmi cawaycaptenga o yapay mana casaracuptenga o jucwan mana punucuptenga runanpa matrimoniun adúltero cashganta. Pero Jesús nishganga jucnopana tantiachimanchi. Payga parlaycargan pipis jucwan casaracunalanpaj divorciacuptenga adulteriuta rurashganta. Divorcio captin y jucwanna pipis casacuptenga chaywanmi unay caj matrimoniunta ushaycächin.

 Chauraga inocente caj warmiga manami yarpachacunmannachu perdunananpaj o manapis. Jinamanpis hermanucuna imano mushoj matrimoniuta ricananpäga manami inocente caj warmi wanuptinrächu, yapay casaracuptinrächu ni jucwan cacuptinrächu canga. b

Galananlacho parlashcanchi runa caj adúlterio juchata rurashganraycur divorcio cashganta. ¿Imaraj canman juc maja warminta manaraj traicionar divorciacuptin y jucwan casaracuptin? ¿O imaraj canman pipis warminpita divorciacurcur juc warmiwan punucuptin y punta caj warmin perdonayta munaptinpis payga jinala jucwan casaracuptin? Imano captinpis divorciacur y yapay casaracurmi adulterio rurashganwan punta caj matrimoniunta ushacächin. Chauraga mushoj matrimoniuga valinmi. La Atalaya, 15 febrero quilla, 1980 wata, 30 caj paginancho nergan, pipis yapay casacurcurga manami ninmanchu ‘raquicäcushaj unay warmëwan cacunäpaj’, chaytaga manami ruranmanchu, payga unaycajwanga mayna divorciacush, adulteriuta rurash y yapay casacurishgapis.

Caywanga manami niycanchichu matrimoniuta mana valuranapaj ni pipis adulteriuta ruracunanpaj. Jehovapa ricayninpa mana ali caycar pipis jucwan casaracuptenga ancianucunaga adulterio jucha ruracashganraycurmi gayaycachir comité judicial nishganta rurapäcunga. (Yapay casaracushgan warmi cristiana captenga, paytapis comité judicial nishgantami rurapäcunga adulterio juchata paypis rurashgayraycur). Cay mushoj matrimonio adúltero mana captinpis, olgo caj ima cargulatapis congregaciuncho chasquinanpäga achca watacunarächi pasanga. Congregaciunpis y waquin runacunapis alirämi paytaga ricänan. Jinamanpis musyacänanraj traiciunashganraycur imanotaj unay caj warmin caycan, churincunapis abandonashgachu caycan o manachu (Mal. 2:14-16).

Chauraga pipis jucwan casaracunalanpaj majanpita divorciacuptenga Biblia nishganwanga manami tincunchu; chaymi cristianucunaga Jehová ricashgannola matrimoniuta ricashwan, matrimoniuga Paypa nawinpa santo caycan (Ecl. 5:4, 5; Heb. 13:4).