1. ¿Gamga ima ninquimanraj Camacoj Diosninchipita?

YURIMUSHGAYQUI wichan taytayquicuna Jehovapa testigunna cashga carga, gampis Jehovaman yaracurchi winashcanqui. Camacojninchi cashganta y imano Dios cashgantapis yachacushcanquichi. Nircurpis yachacushcanquichi cay Pachacho mana nacaypa cawanapaj Diosninchi munashganta (Gén. 1:1; Hech. 17:24-27).

2. ¿Imatataj waquincuna nipäcun Camacoj Diosninchiman creicushganchipita?

² Waquin runacunaga nipäcun ‘Diosga mana canchu, imacunapis japalanmi yuricamush’ nir. Chaywanga nircaycan mana cajlapita ichiclapa ichiclapa runaman ticrashganchita. ‘Lapantami noga musyä’ nirmi cay runacunaga Biblia lulacushganta nipäcun. Jina Camacoj Diosninchiman creicushganchipitaga upa cashganchita nipäcun.

3. ¿Imanirtaj alapa ali canman quiquinchicuna yaracuyninchita sinchiyarcuptinchi?

³ ¿Imano yarpar-raj galaycushwan mana creicoj runacunata casuparga? Casuparga jucnopapis Camacojninchi Diospita yarpachacächimashwanmi, pero lapanpis canga imanir Diosninchiman creicushganchita musyashganchipitami. Jina tapucushwan: ¿Diosmanga creinchi juccuna nimashganchilapitachu o quiquinchi ali ricapacaramur shumaj tantiapärir yachacushganchipitachu? (1 Cor. 3:12-15). Achca watapis mayna Diosta sirviycashwan, chayno captinpis Diosman yaracushganchega ali sinchimi caycanman. Chayta rurashpanchega imayca luta yachachicuycunaga manami pantachimäshunchu (Col. 2:8; Heb. 11:6). Y ¿imataj yanapämäshun mana pantacänapäga? Canan yachacurishun imanirtaj waquin runacuna Camacojninchi  Diosman creipäcunchu, y imatataj rurashwan yaracuyninchita sinchiyarcachinapaj y chaynola cananpaj calpachacunapäpis.

4. Hebreos 11:1 wilacushganno, ¿ima nishwantaj yaracuyninchipita?

⁴ Waquin runacunaga imatapis manaraj tantiapashga carmi ‘yaracoj cä’ nipäcun. Chayno nishgancunaga Bibliawan tincunchu (leiriy Hebreos 11:1). Bibliaga shumajmi wilacun Jehovaman, Jesusman y Gobiernunman creishganchiga ali tantiashganchipita y shumaj musyashganchipitaraj cashganta (Heb. 11:3). Juc yachaj runa (canan Jehovapa testigunna caycan) cayno nin: “Yaracojga canchi manami lutancunata creirchu, yaracuyninchega ciencia nishganwanpis tincunmi”.

5. ¿Imanirtaj waquincuna nipäcun ‘Diosga manami imatapis camashgachu’?

⁵ Imayca camashga cajcunapa guepancho Diosninchi caycashganta musyaycarga, ¿imanirtaj waquin runacuna Payman creipäcunchu? Chayga ichanga canman quiquincuna yarpashganlaman yaracushga carmi. Robert jutiyoj cristiano cayno nin: “Escuelächoga manami pipis parlapämarganchu Diospita, chaymi ‘pipis camamashcanchichu’ nergä. 22 watata aywaycaptërämi Jehovapa testiguncuna shumaj tantiachipäcamargan y Jehová Camacoj cashgantapis Bibliawanmi parlapämargan” * (“ Taytacuna imata rurapäcunanpaj” recuadruta ricäriy).

6. ¿Imanirtaj waquincuna ‘Dios mana canchu’ nipäcun?

⁶ Waquincunaga ‘Diosta ricaptërämi creishaj’ nipäcun. Rasun cajchoga paycunaga mayna creircaycanna mana ricashgancunaman.  Wayrataga manami ricanchichu pero may chaychomi caycan. Bibliaga shumajmi wilacun “yaracoj cashpanchi mana ricacajcuna rasunpa cashganman” yarpachacunapaj (Heb. 11:1). Chayno shumaj yarpachacunapäga calpachacunanchirämi. Ichanga waquincunaga ‘tiempö mana canchu’ nirmi Diosman creipäcunchu.

7. ¿Nishwanchuraj lapan estudioso runacuna Diosman mana creipäcunganta?

⁷ Lapanta ricapacur y shumaj yachacurir-rämi yachaj runacuna nipäcun ima aycatapis Dios camashganta. * Robert waugui pasashgannopis, ichanga waquincunaga Diosman creipäcunchu, universidänincunacho ichiclapis Paypita mana yachacushga carmi. Chayno  captinpis caycanmi Diosta cuyaj achca estudioso runacuna. Estudiashga carpis o mana estudiashga carpis lapanchimi calpachacunanchi Diosta reguir payman yaracunapaj. Chayga quiquinchicunapitami canga.

8, 9. 1) ¿Ima tapucuypitataj canan yachacurishun? 2) ¿Imatataj yachacushun Jehová camashgancunaman yarparcurga?

⁸ ¿Imanotaj Camacojninchiman yaracushganchita sinchiyarcachishwan? Chusculata ricärishun.

⁹ Camashga cashgancunapita imayca caycan yachacunapaj. Uywacunapita, plantacunapita y goyllurcunapita shumaj yachacurga, masrämi yaracushun Camacojninchiman (Sal. 19:1; Is. 40:26). Chayno shumaj lapanpita yachacurga mananami niycäshunnachu ‘¿Jehovachuraj camamashcanchi?’ nir. Publicaciunninchicunachoga yargaycämunmi yachachicuycuna; achca caycan Jehová camashganpita yachacunapaj. Öraga sasa canman tantiarcunapaj, chayno captinpis calpachacushun lapanta yachacunapaj. Jehová camashganpita cuyaylapa videucuna caycan jw.org paginanchichopis, caycunaga ruracämurgan jatun asambleanchicunapämi.

10. Ima nishwantaj intipa achquin cay Pachaman imano chayamushganpita (Romanos 1:20).

¹⁰ Camashga cajcunaman yarpachacurga ‘imaraycurtaj cayta Jehová camashga’ nishwanmi yachacunapaj (leiriy Romanos 1:20). Intipita parlarcushun, achquinwanrämi cay Pachacho caway caycan. Chayno captinpis mana gueshyaypa cawacunapäga, capa de ozono nishganshi imayca escudo japuyno chaparämanchi. Masraj achachaycamuptenga masräshi jatunyarcun cay escuduga. Caycunaga manachi japalanla yuricamushgachu. Lapanpa guepanchomi yachaj y cuyacoj Taytalanchi Jehová caycashga.

11. ¿Imata rurartaj Jehovaman yaracushganchita sinchiyächishwan? (“ Yaracoj runa canapaj imacuna yanapämänanchipaj” recuadruta ricäriy).

¹¹ Índice de las publicaciones Watch Tower y jw.org paginanchichoga, imayca caycan Jehová camashganpita yachacunapaj; chayta rurarga yaracuyninchega miraycungami. Ashinapaj caycanman “¿Lo diseñó alguien?” nishganmi, chaycho tarishun uywacunapitapis plantacunapitapis yachacunapaj. Videucunapis caycan, chaychopis tarishun cientificucuna ima rurashgancuna, imano Diosninchi rurashganta ricar paycunapis chaynola rurapäcun.

12. ¿Imatataj rurashwan Bibliapita yachacuycarga?

¹² Bibliapita yachacushun. Chuscu caj parrafucho parlargunchi juc yachaj runapaj, juc Camacojman mana yaracuycarpis tiempuwanga payga jucnopa yarparnash galaycurgan. Paymi cayno nin: “Yaracuynëta winachinäpäga camashga cajcunata estudiapashgämi yanapämashga. Jina alapa yanapämashga Bibliapita shumaj yachacushgämi”. Bibliapita mayna yachacushga carpis, waran waranpis yachacuycarla caycashwan Camacoj Diosninchiman yaracuyninchi masraj winananpaj (Jos. 1:8; Sal. 119:97). Bibliachoga ricaycäshunmi ima pasashgancuna rasunpa cashganta, profeciancunapitapis y wilacamushgancunapis mana contranacäringanta. Chayta rurashpanchega ali yaracoj car ‘Diosmi camaycalämashga y Palabrantapis goycalämashga’ nishunmi (2 Tim. 3:14; 2 Ped. 1:21). *

13. Bibliapa maygan consejunman yarpartaj shumaj yanapämashganchita nishun.

 ¹³ Bibliapita yachacurga cuentata gocushun cawayninchipaj ali cashgantami. Yarparcushun, Bibliaga unaynami wilacurgan guellaylata ashicurga mana alicunaman chayachimänanchipaj (1 Tim. 6:9, 10; Prov. 28:20; Mat. 6:24). ¿Canan wichanpis yanapacunchuraj chayno wilacushgan? Aumi. Ricärishun La epidemia del narcisismo nishgan libro ima wilacushganta: “Öraga riquezacunalata ashejcunaga laquicuycarla, yarpachacuycarlami cawacärin; y cawaynincho locuyaypa guellaylata ashejcunapis gueshyaycarla cawapäcun”. Chauras guellayta mana cuyanapaj Biblia wilacushganga alimi caycan cawayninchipaj, y mana chaylachu, Bibliachoga masraj caycan yanapämänanchipaj. Bibliata casucushpanchi cawacurga yachaj Diosninchiman masraj yaracushun (Sant. 1:5). Lapanchimi munanchi mana nacaypa cushi cushila cawacuyta (Is. 48:17, 18).

14. ¿Imatataj Jehovapita yachacushun Palabranta estudiarga?

¹⁴ Bibliata estudiarga Taytalanchi Jehovata reguinapämi yachacushwan (Juan 17:3). Imano cashganpitapis shumajmi yachacushun y camashgancunachopis ricacämungami imano cashgan. Aumi, Bibliapita shumaj yachacurga Jehovataga Taytanchitanomi y Camacojninchitanomi ricaycäshun (Éx. 34:6, 7; Sal. 145:8, 9). Diosninchita ichiclapa ichiclapa reguishganchimi yaracuyninchita winachenga, paytaga masraj cuyashun y amigunmanpis ticrarishunmi.

15. ¿Imataj yanapämashwan Diosman yaracushganchita waquin runacunata parlapänapaj?

¹⁵ Yaracoj runamanga ticrashun waquin runacunata Diosman yaracushganchipita parlaparmi. Y ¿pilapis Diospita imalatapis tapucamaptinchi y chay hora mana musyaptinchega? Ali canga Bibliacho ashiptinchi y nircur chaypita parlapaptinchi (1 Ped. 3:15). Tantiaj hermanucunapis caycangapämi yanapämänanchipaj. Öraga chasquicärengachu yanapänapaj imaycata rurashga carpis. Chayno captinpis yachacushganchicunaga yaracuyninchipaj ali canga. Yaracuyninchicuna mana juchoj gagano caycaptenga luta yachachicojcuna ima nishgancunapis manami pantachimäshunchu.

16. ¿Imaraj pasanman yaracoj runa canapaj mana calpachacurga?

¹⁶ Unayna o chaylaraj Jehovata sirviycarpis, calpachacuycashwanmi yaracoj runa canapaj, mana calpachacurga ichanga yaracuyninchega ushacäcunman. Yarpashun, yaracoj runaga canchi mana ricacaj cajcunamanpis yarpachacushganchipitami, mana ricacaj cajcunaga gongacanmanmi, chaymi alapa calpachacunanchi. Mana yaracoj cajpita parlarmi Pablo nergan “jucla pantachicoj jucha cashganta” (Heb. 12:1, TNM). Chauras, ¿imatataj ruraycashwan yaracuyninchi mana ushacänanpaj? (2 Tes. 1:3).

17. ¿Imataj yanapämashwan Diosman yaracuycarla caycänapaj?

¹⁷ Naupataga Jehovata cutin cutin ruwacushun santo espiritunta gomänanchipaj. Chaywanrämi yaracuyninchi shumaj winamunga (Gál. 5:22, 23). Jina Diospa espirituwanrämi Camacojninchiman guelicushun. Chaymi mana yamacaypa mañacuycäshunla, payga goycalamäshunmi (Luc. 11:13). Cayno nirpis mañacushwanmi: “Yanapaykalämay mas yärakärinäpaq” (Luc. 17:5).

18. Salmo 1:2, 3 texto nishganno, ¿imanotaj ricacunchi Diospa Palabranta leir?

 ¹⁸ Nircurpis, mana gongaypa Diospa Palabranpita yachacushun (leiriy Salmo 1:2, 3). Cay Salmo escribicashgan wichanga, walca israelitacuna, reycunapis y sacerdoticunapis Diospa Leyninta lapanta charapäcoj. Ganchis watacuna pasarcuptinmi olgucunapis, warmicunapis, wamracunapis y jäpa runacunapis juntacärej Diospa Leyninta leipäcushganta wiyapäcunanpaj (Deut. 31:10-12). Jesús cawashgan wichan walca runacunalashi Diospa Palabranta charapäcoj y tariyta munarga sinagoga nishganmanräshi aywapäcoj. Canan wichan ichanga Bibliata tarinapäga manami sasachu caycan. Bibliata charashganchipitaga, ¿imanotaj agradecicushwan?

19. ¿Imata rurartaj yaracoj cashganchi ricacämunga?

¹⁹ Bibliapitaga agradecicunchi cutin cutin leiparmi. Diospa Palabrantaga manachi yarpashganchi horalaga leiycashwanchu, tiempota raquiycurmi yachacushwan. Chaynoparaj yaracoj runa cashganchi ricacämunga.

20. ¿Ima ruraytataj lapalanchi munanchi?

²⁰ Manami canchichu cay mundo yachaj tucojcunanoga, yaracuyninchega manami yangalachu, Diospa Palabranchomi camacashga caycan (Mat. 11:25, 26). Jina Biblialami tantiachimanchi cay mundo imanir chayno caycashganta y alchacänanpaj Diosninchi imata rurananpaj. Chauras calpachacushun yaracoj runa canapaj y waquincunapis Camacojninchiman yaracärinanpaj yanapänapaj (1 Tim. 2:3, 4). Chayamunanpäna caycan ali caway, chay wichanga juc shongula Taytalanchi Jehovata lapalanchi alabaycushun y cayno nirmi caycäshun, Apocalipsis 4:11 texto nin: “Tayta Diosnilä, qamlami lapanpaq munayniyuq kaykanki. Qammi lapan imaykatapis kamashqanki”.