• “Runä jucwan jucwan cacushgantano ricacurgä”.

• “Mana cuyaylapaj y mana valejno ricacurgä”.

• “Japalämi wagar laquicoj cä. Pilatapis wilapänäpaj carganchu”.

• “Jehová mana cuyamashganta yarpargä”.

Cay warmicuna nishgancunacho claro ricacämun juc runa pornografiata ricaptin warmin imano sienticushganta. Pornografía ninan videucunacho o revistacunacho, ganracunata ruraycar galapächula oglanacuycar yargamoj cajcunami. Juc runa achca tiempo chaycunata ricaycuptenga, warminga mananachi payman yäracunganachu. Juc warmi nin: “Runätaga jäpatanona ricargä, ‘imataraj pacapaycäman’ nirpis yarpargä”.

¿Runayquipis pornografiatachu rican? a Chayno captenga, gamno cristianacunapämi cay yachacuy ruracämushga. Caycho yachacunqui Jehová imano shogashushgayquita, y imano yanapäshushgayquita ima captinpis cushishgala cawacunayquipaj y paywan amigo canayquipäpis. b

Runayqui ima rurashganta mana controlayta puedirpis, jaucala o tranquilula ricacunayquipaj caycunata ruranquiman.

Culpayoj cashgayquita yarpaychu. Juc runa pornografiata ricaptin, warminga ‘imachoraj pantashcä runä chayta ricananpaj’ nir yarpanman. Alice c jutiyoj warmipis chayno yarpar, cayno tapucurgan: “¿Imanirtaj runäga ricamänanpaj trucan juc warmicunata ricayta gustan?” nir. Waquin warmicunaga culpayoj ricacun pasaycashganpita y casado vidanpis mana valishganta yarpar galaycun. Danielapis nin: “Runä pornografiata ricaycashganpita pasaypa rabiacurgä. Quiquëmi matrimoniüta ushacächiycashgäta yarpargä”.

Öraga chayno ricacushga captiquega, Jehovaga runayqui rurashganpita manami culpashunquichu. Bibliapis nin: “Quiquin runa jucha rurayta munapan” (Santiago 1:14, Mushuj Testamento de Panao; Rom. 14:12; Filip. 2:12). Jehovaga manami  yarpanchu gam culpayoj cashgayquita. Chaypa trucanga, paylaman yäracushgayquipita alapa cushicunmi (2 Crón. 16:9).

Chauraga ‘nogapa culpäraycurchi runä pornografiata rican’ nirga ama yarpanquimanchu. Estudioso runacuna nipäcun pornografiata ricajcunaga manami pï warmiwanpis contentacärinchu.

Alapa yarpachacuycarla cacuychu. Catherine wilacun chacaypa junajpapis yarpachacurla caycashganta runan pornografiata ricashgalanman. Frances warmipis nin: “Runä wasicho mana caycaptenga, ‘maychoraj caycan, imataraj ruraycan’ nilarmi goyarcö”. Waquin casaracushga warmicunapis alapa pengacärin runan imawan luchaycashganta waquincuna musyapäcuptin. Waquincunana nin: “Japalämi ricacö, pipis tantiamanchu imapa pasaycashgäta”.

Chayno yarparga masrämi laquicunqui, chaymi más ali caycan calpachacuptiqui Jehovawan más amigo canayquipaj. Chayga yanapäshunqui jaucala y calpayoj canayquipaj (Sal. 62:2; Efes. 6:10).

¿Imanotaj Bibliata leishgayqui y chayman yarpachacushgayqui yanapäshunquiman? Chaychomi wilacun unay Diosta sirvej warmicunapis imacunapa pasashganta. Sasacunapa pasarpis Jehovata shongunta mashtapar mañacurgan. Problemancuna mana alchacaptinpis, Jehová paycunata yanapargan jaucala ricacunanpaj. Yarpäshun Ana pasashganman, payga “pasaypa lakikurmi” caycargan. Ichanga “TAYTA DIOSTA may höra Ana manacuptinmi” alina ricacurgan probleman mana alchacaptinpis (1 Sam. 1:10, 12, 18; 2 Cor. 1:3, 4).

Jina ancianucunapa yanapacuynintapis ashinquiman, paycunaga “tsaki jirkakunacho yakunömi” caycan shacyächimänanchipaj (Is. 32:2). Capaz nishunquiman juc yäracoj cristianawan parlar shogashunayquipaj (Prov. 17:17).

Runayqui pornografiata ricaptenga öraga tapucushcanquichi ‘¿imanotaj runäta yanapäman?’ nir. ¿Imalapis caycanchuraj ruranayquipaj? Aumi, Bibliaga nin: “Japalan arunanpa trukanqa ishkaq arushqanmi mas ali kaykan” (Ecl. 4:9-12). Chauraga ishcayquicuna yanapänacäriptiquega más fácil canga mayganpis pornografía ricaycashganta jaguirinanpaj y yapay confianza cananpaj. Chayno waquincunapis nipäcun.

 Chaypäga musyanayqui runayqui pornografía ricaycashganta jaquiriyta munashganta y decidido caycashgantapis chayta rurananpaj. ¿Nishushcanquichu Jehová yanapänanpaj mañacushganta, y ancianucunapa yanapacuynintapis ashishgachu? (2 Cor. 4:7; Sant. 5:14, 15). ¿Imacunataj rurargan pornografiata manana ricananpaj? Capaz shumaj tantiacush celularninta cada cadala manana ricaycunanpaj, masraj japalan caycaptin (Prov. 27:12). Yanapayta munaptiqui chasquicuptin y lapanta wilapäshuptiquega, capaz yanapayta puedinquimi.

Felicia cristianapa runan Ethanga, wamra cashganlapitash pornografiata ricaj. Chaura casacurna Feliciaga runanta nergan yapay pornografía ricayta munaptenga payta wilapänanpaj. Ethan cayno wilacun: “Warmiläwanga mana manchacuypa parlapacärë y lapanta wilapä. Chaura paynami cuyacuywan parlapaman chaycunaman mana ishquinäpaj. Nircur cada cadala tapupaycäman ricashgäta o manapis. Jina yarpächiman internet-tapis imano shumaj utilizanäpaj”. Ichanga, Feliciaga alapa laquicunmi runan pornografiata ricayta munaptin. Chayno captinpis payga nin: “Musyämi alapa piñashga o laquishga caycaptëga, chayga manami yanapangachu runä viciunta jaguirinanpaj. Chaymi puntata parlapacunchi imata payta yanapänanpaj y nircur nogatapis imataj yanapämanga laquicuycarla mana caycänäpaj”.

Warmi caj runanwan parlashganga yanapacunga runan viciunta jaguirinanpaj. Y warmi cajtapis yanapan runanman yapay yäracunanpaj. Runa caj ima ricashganta o rurashganta warminta mana pacapaptenga, warmiga runanman yapay yäracungami.

¿Gampis Felicia rurashganno ruranquimanchuraj? Chayno captenga, ishcayniqui cay yachacuyta yachacärinayqui. Runayquega decidido caycanman viciunta jaguirinanpaj payman yapay yäracunayquipaj. Manami piñacunmanchu chaycunapita parlapänayquipaj captin, sinoga tantiacunmanmi rurashgancuna laquichishushgayquita. ¿Y gamga imataraj ruranquiman? Jinala runayquita yanapay y caynopis ninquiman, ‘calpachacuptiquega yapay gamman yäracushaj’ nir. Jina ishcayniqui yachacäriy imanir runacuna pornografiata ricashganta y imacunata rurashgantapis jaguirinanpaj. d

Cay temacunapita runayquiwan mana piñacuylapa parlacuyta mana puedirga, ali canman  maygan yäracushgayqui ancianulatapis invitaptiqui parlapacushgayqui horacho caycänanpaj. Runayqui pornografía ricayta jaguirishgana captinpis, capaz galananlachoga payman manami jucla yäracunquirächu. Chayno captenga, mana ajayaypa jinala yanapaycuy. Yarpachacuy runayqui ima alicunata rurashganta. Chayno captenga pacienciawan shuyarashgayquipita tiempuwanga casado vidayqui más ali cangapaj (Ecl. 7:8; 1 Cor. 13:4).

Runayqui pornografiata yapay ricaycuptenga, ¿ninquimanchuraj chayta cachayta imaypis mana puedinanpaj cajta? Öraga manami chaynochu. Pay chaycunata juc viciuno ricaycuptenga, capaz achca watacunapa chaywan luchaycanga. Waquincuna achca watapana chaycunata mana ricashga carpis, capaz yapay ricaycunmanmi. Ichanga chayno mana cananpäga, masraj calpachacunan y shumaj tantiacunman imacunata rurananpäpis (Prov. 28:14; Mat. 5:29; 1 Cor. 10:12). Chaypäga jucnona yarpar yachacunman y Jehová chiquishgan ruraycunatapis chiquinman; cayga ninan pornografía, masturbación y waquin ganra ruraycunatapis chiquinanpaj (Efes. 4:23; Sal. 97:10; Rom. 12:9). Chay lapancunata rurarga, tiempuwanga pornografía ricayta capaz jaguirinmanmi. e

Y runayqui pornografía ricayta jaguiriyta mana munaptenga, öraga pasaypa piñashga o laquishgapis ricacunquimanchi. Chayno captenga, lapan pasashushgayquita Jehovata wilapanquiman. Payga yanaparcushunqui jaucala ricacunayquipaj (1 Ped. 5:7). Nircur calpachacunquimanpis Jehovaman masraj guelicamunayquipaj Palabranta yachacur, leishgayquicunaman yarpachacur y mañacurpis. Chayta ruraptiquega Jehová más ali amiguyquimanmi ticranga. Bibliapis nin: “Lakikuqkunataqa TAYTA DIOS kuyapanmi”. Payga sirvejnincunata yanapan tranquilula goyäcunanpaj (Sal. 34:18). Lapan puedishgayquimanno calpachacuy ali cristiana canayquipaj, ancianucunapa yanapacuyninta ashiy y yarpachacuy tiempuwan runayquipis capaz cambiangapaj (Rom. 2:4; 2 Ped. 3:9).