1. ¿Diospa sirvejnincunaga imacunatataj cushi cushila rurarcaycan?

 UNAYNAMI Bibliaga wilacurgan achca runacuna Jesusta cäsucur Jehovata cushi cushila sirvipäcunanpaj (Sal. 110:3). Y chaytami canan wichan ricaycanchi. Cada watami Diospa sirvejnincunaga aypala horacunata Bibliapita gratisla runacunata yachachin. Jina tiempuntapis shumaj camacächir may chaycho caycaj hermanucunata imalawanpis yanapaycun y Bibliawanpis shacyächin ali caycänanpaj. Y ancianucuna y siervo ministerial cajcunapis cada cadalami hermanunchicunata watucaycämun y reuniuncunapäpis shumaj preparacaycämun ali yachachicamunanpaj. Chay lapantaga ruran Jehovata y runa masinta cuyashpanmi (Mat. 22:37-39).

2. Romanos 15:1-3 nishganno, ¿imataj Jesuspita yachacunchi?

² Jesusga quiquilanman yarpachacunanpaj trucan waquincunatami yanapargan y cristianucunaga calpachacunchi pay rurashganno rurananchipaj (leiriy Romanos 15:1-3). Chayta ruraptinchega ali ricacunchi. Jesusga nergan: “Chasquir cushicunanchïpitaga pitapis tarichiymi mas cushicuypäga” nir (Hech. 20:35).

3. ¿Imatataj canan yachacushun?

³ Cananmi yachacushun imacunata Jesús rurashga waquincunaraycur y imataj chaypita yachacunchi. Jina ricashun noganchipis imacunata rurashwan waquincunata yanapänapaj.

4. ¿Imatataj Jesús rurashga uticashga caycarpis?

⁴ Uticashga caycarpis Jesusga waquincunata yanaparganmi. Capernaúm marcapa jircancho Jesús caycaptin achca runacuna payta ricänanpaj aywargan. Payga chay jircacho waraylata Tayta Diosta mañacuycar warargan, chaura sellama uticashgachi caycargan. Ichanga pampacho achca runacuna shuntacashga carcaycajta ricarmi Jesusga paycunata laquipargan. Chaura gueshyajcunata cachacächergan y Diospita imaycacunata yachachir galaycurgan (Luc. 6:12-20).

5. Taytacuna familianta cuyashpan uticashga caycarpis, ¿imatataj ruranman?

⁵ Taytacunaga Jesuspita yachacunmanmi. Cayman yarparcushun: juc taytashi aruyninpita wasinman pasaypa uticashga chayan y chay chacaycho familianwan Diosta adurananpaj caycan. Chaura punucuyta munarpis payga Jehovatami mañacun calpanta goycunanpaj familianwan estudiananpaj. Jehovaga oraciunninta wiyan y yanaparcunmi. Chay chacaycho wamrancunaga cuentata gocärin taytancunapäga Diosta adurananpämi imapitapis más ali cashganta.

6. Jesusga chunyajcho japalanla cayta munaptinpis, ¿imatataj rurargan runacunata cuyashpan?

⁶ Jesusga waquincunata yanapänanpämi yarpachacoj. ¿Imanirtaj chayta ninchi? Jesusga Bautizacoj Juan wanuchishga cashganta musyar laquicurganchi. Bibliaga nin: “Büquiman witsarkur chunyaqninman Jesús japalan aywakurqan” (Mat. 14:10-13). Waquincunaga pipis wanuptin japalanla cayta munan y Jesuspis chayta munarganchi, ichanga paypäga manami chaynochu cashga. Chunyaj sitiuman chayananpäga chaychomi achca runacuna shuyarpaycargan. Chauraga, ¿imataj rurashga? Aypala runacunata ricar cuyapargan y tucuynopami yanapargan. Payga cuentata gocurgan runacuna michejniynaj uyshacunano caycajta. Chaymi Diospita “may öra yachachiran” (Mar. 6:31-34; Luc. 9:10, 11).

7, 8. ¿Canan wichan imacunata rurartaj Jesusnopis ancianucunaga yanapacärin? Wilacaramuy.

 ⁷ Ancianucunaga Jesusno waquincunata cuyacuywan yanapanmanmi. ¿Manachu agradecicunchi ancianucuna tucuynopa yanapämaptinchega? Ichanga manami musyanchichu yanapämänanchipaj imacunata rurashganta. Tantiarinapaj, maygan hermanunchipis gueshyaptenga hospitalcunawan yanapacojcuna ancianucunami paycunata yanaparcun. Öraga pulan pagas captinpis yanapacärinmi. Paycunaga familianwanmi hermanunchicunata cuyapäcun, chaymi quiquincunalaman yarpachacärinchu sinoga waquincunamanmi.

⁸ Jina ancianucunaga Diosta aduranapaj wasicunata sharcachiycho y desgraciacunapa pasajcunatapis yanapacärinmi. Chaypitapis calpachacärin congregaciunnincho shumaj yachachipäcunanpaj y hermanucunatapis shacyächinanpaj. Chaymi paycunata y familiantapis ‘gracias’ ninchi yanapacuynincunapita. Jina Jehovapa espiritun paycunawan cayculächun. Ancianucuna ichanga tantiacoj runacuna capäcunman. Familiantaga mana cajman churanmanchu congregaciuncho cajcunalata atiendinanpaj, sinoga tiempunta shumaj camacächinman familiantapis ali ricänanpaj.

9. Filipenses 2:4, 5 nishganno, ¿imano runa canapätaj calpachacushwan?

⁹ (Leiriy Filipenses 2:4, 5). Lapanchimi anciano mana carpis Jesús rurashganpitaga yachacushwan. Bibliaga nin payga  “ashmaynöla kananpaq noqantsino yurirqan” (Filip. 2:7). ¿Imataj caypita yachacunchi? Juc ashmayga imanopäpis calpachacun patronninta cushichinanpaj. Noganchipis Jehovapa y hermanunchicunapa ashmay japuymi canchi. Chaymi munanchimi paycunata y Diosninchita cushichinapaj. ¿Imanopataj chayta rurashwan? Mä ricärishun.

10. ¿Imatataj lapanchi tapucushwan?

¹⁰ Imano cashgayquiman yarpachacuy. Tapucuy: “¿Quiquiläman yarpachacunäpaj trucan waquincunata yanaparcunäpaj yarpachacöchu? ¿Imataraj ruräman pipis nimaptin juc edayashga wauguita watucunäpaj o juc panita reuniunman apanäpaj? ¿Saloncuna y Asambleacuna ruracänanpaj localcuna pichapacunapaj caycaptenga, juclachu yanapacö?”. Jehovaman dedicacushpanchi paytami aunishcanchi lapan calpanchiwan y imaycanchiwanpis sirvinapaj. Chaura Jehovaga cushicunmi waquincunata yanaparcunapaj calpachacuptinchi. Pero, ¿imataraj rurashwan cuentata gocuptinchi imalachopis mejoranapaj captenga?

11. Diosta mañacushganchega, ¿imanotaj yanapämanchi waquincunata voluntäwan yanapänapaj?

¹¹ Shongupita Jehovata mañacuy. Imalachopis mejoranayquipaj captin, ichanga ruranayquipaj sasa captenga shongupita Jehovata mañacuy. Jina imano ricacushgayquita lapanta wilapay y waquincunata yanapänayquipaj voluntäniqui y calpayqui mana captenga Jehovata ruwacuy (Filip. 2:13).

12. Mozularaj bautizacushga hermanucunaga, ¿congregaciuncho imanotaj yanapacunman?

¹² Mozularaj y bautizacushgana captiquega congregaciuncho más yanapacunayquipaj voluntäniqui cananpaj Jehovata mañacuy. Waquin congregaciuncunachoga siervo ministerial cajcunaga walcalami y waquincunaga edayashgana carcaycan. Congregaciuncunaga cada cadala miraycan, chaymi mozo hermanucuna ancianucunata yanapänanpaj necesitanchi congregaciuncho caycajcunata cuidar yanapänanpaj. Chauraga yanapacojcuna mana cashgan congregaciuncunacho yanapacunayquipaj calpachacuptiquega, Jehovata y waquincunata cushichinquipaj y quiquiquipis alimi ricacunqui.

13, 14. ¿Imanirtaj altanto caycashwan hermanunchicunata yanaparcunapaj? (Garancho caycaj fotuta ricäriy).

¹³ Altanto caycay waquincunata yanaparcunayquipaj. Hebreo cristianucunatami Pablo cayno nergan: “Mana gongaypa alli cajcunata ruray. Jucniqui-jucniqui imallawanpis yanapänacuy. Chaycunami Tayta Diospaj alli ofrenda caycan” (Heb. 13:16). Paycunaga Pablo cartacamushgantaga cäsucärinmanmi cargan. ¿Imanir? Ichiclachomi jircacunapa gueshpicärinanpaj cargan wasincunata, negociuncunata y mana cristiano caj familiancunatapis jaguiriycur (Mat. 24:16). Chay wichanga alapa alimi cashga jucnin jucnin yanapänacunanpaj. Chauraga Pablo nishganta mayna cäsucushga carga sasanachu canman cargan maycho caycarpis yachacänanpaj.

¹⁴ Öraga waquincuna manami wilamanchichu imacuna necesitashganta. Juc viudashga hermanunchiman yarpachacushun. ¿Yanaparcunapaj caycanmanchuraj wasinta pichapacur, micuyta macyarcunapaj o imalancunatapis rantipaycunapaj? Pitapis afanayta mana munarchi imatapis  ninmanchu. Pero pipis chaycunawan yanaparcuptenga ‘graciaslä’ nirpis niycunmanchi. Manami yarpashwanchu ‘waquincunachi yanapanga’ o ‘nimangachi ima necesitashgantapis’ nir. Tapucushun: “Noga payno caycaptëga, ¿imano yanapämänanpätaj munäman?” nir.

15. Waquincunata yanapayta munarga, ¿imatataj rurashwan?

¹⁵ Yanapacunayquipaj listo caycay. Congregaciunchoga ricashcanquichi hermanunchicuna jucnin jucnintapis yanapacojta. Imalachopis yanapämänanchipaj niptinchega cushi cushila yanapämanchi. Noganchipis paycunano rurayta munanchi. Alan jutiyoj ancianumi calpachacun listo caycänanpaj waquincunata yanaparcunanpaj. Jesús imano cashganman yarpachacur nin: “Jesusga ocupado caycaptinpis pï maypis payta ashej yanaparcunanpaj. Paycunaga musyapäcurganmi Jesús paycunata cuyashgantami. Nogapis Jesusno waquincunata yanapänäpaj listo caycashgäta, cuyapäcoj y altanto caycashgätapis waquincuna musyananpaj munä”.

16. ¿Imanotaj yanapämanchi Salmo 119:59, 60 Jesús rurashganno ruranapaj?

¹⁶ Jesús yanapacushganno lapanta ruranapaj mana puederga laquicushwanchu (Sant. 3:2). Juc mama yachaycächinman wamran awacunanpaj, wamraga jucla mamanno awacuyta musyangachu, galananchoga pantarcungarämi pero ichic ichiclapa yachacungami shumaj awacunanpaj. Chaynolami Bibliapita yachacushganchita cäsucuptinchipis y pantashganchicunapita yachacuptinchega ichic ichiclapa Jesús  rurashgannomi rurashun (leiriy Salmo 119:59, 60).

17, 18. Pipis yanapacunanpaj listo caycaptenga, ¿ima bendiciuncunataj canga?

¹⁷ Pitapis cushishgala yanapacuycajta ricarga waquincunapis chayno rurayta munapäcun. Tim jutiyoj juc anciano cayno wilacun: “Congregaciunnëchoga achca joven hermanucunami siervo ministerialcunano yanapacunanpaj calpachacärergan y chaytaga rurargan waquincuna cushishgala yanapacushganta ricarmi. Waquincunata yanapänanpaj listo caycashganga congregaciunta y ancianucunatapis yanapanmi”.

¹⁸ Canan wichan runacunaga quiquincunalaman yarpachacärin, ichanga Jehovapa sirvejnincunaga manami chaynochu. Jesús waquincunata yanapänanpaj listo caycashganga noganchitapis yachachimanchi payno ruranapaj. Chaymi öraga pantarcuptinchipis calpachacushwanmi Jesús rurashganno ruranapaj (1 Ped. 2:21). Taytalanchi Jehovaga bendiciycalämäshunmi calpachacuptinchi Jesús rurashganno waquincunata yanapänapaj listo caycaptinchega.