1. Unaycho Diospa sirvejnincunaga, ¿imano runa cashgantataj ricächicurgan?

 JEHOVAWAN ali amigo cashgayquitaga alapachi valuranqui. Pero manami gamlachu chayno ricacunqui. Unaychopis achca runacuna chayno ricacärergan (Sal. 104:33, 34). Achcajmi imaycata rurargan Jehovata sirvishganraycur, waquincunaga cargan Israelcho caycaj nazareucuna. ¿Pïcunataj paycuna cargan y imataj yachacunchi rurashganpita?

2. 1) ¿Pïcunataj nazareucuna cargan? (Números 6:1, 2). 2) ¿Imanirtaj waquin israelitacuna nazareuman ticrargan?

² Nazareo palabraga ninanmi, “raquishga” o “acrashga” cashgantami. Diosta cuyaj israelitacunaga Jehovata sirvinanraycur imaycacunata rurananpaj listumi caycargan. Chaymi maygan olgupis o maygan warmipis auninmanmi cargan Jehovata nazareuno sirvinanpaj, chayga unay Leycho claro niycargan (leiriy Números 6:1, 2). a Pipis chayta auniptenga waquin israelitacuna mandatucunata cäsucushganpitapis masraj cäsucärinanpaj caycargan. ¿Imanirtaj waquincunaga nazareuman ticrargan? Chaytaga ruraj Jehovata alapa cuyashpan y lapan bendiciuncunata chasquishganpita alapa agradecicur (Deut. 6:5; 16:17).

3. Nazareucuna rurashganno, ¿imataj noganchipis rurayta munanchi?

³ Unay Ley nishgannomi waquincunaga nazareuman ticranan cargan, pero Cristupa leynin chayta trucachiptin manami chaynonachu cargan (Gál. 6:2; Rom. 10:4). Chayno captinpis noganchega Jehovata sirviyta munanchi lapan shongunchiwan,  lapan voluntäninchiwan, lapan yarpayninchiwan y lapan calpanchiwan (Mar. 12:30). Chaymi manaraj bautizacur Jehovata mañacur auninchi cawashganchicama chayta ruranapaj. Chaypäga imaycataraj rurananchi Jehovapa voluntäninta cumplinapaj. Canan ricärishun nazareucuna Diosta promitishganta imano cumplishganta y imataj noganchipis yachacunchi aunishganchita cumplinapaj (Mat. 16:24). b

IMAYCATARAJ RURANAPAJ LISTUMI CAYCÄSHUN

4. Números 6:3, 4 nishganno, ¿imataj nazareucuna quiquinpa voluntäninpita rurapäcoj?

⁴ (Leiriy Números 6:3, 4). Nazareucunaga vinuta upupäcojchu, uvacunata y pasascunatapis manami micupäcojchu. Chaycunata micunanpaj jucha mana captinpis, israelita masincunami chayta micupäcoj. Bibliaga nimanchi vinuga Diospa regalun cashganta, chayta ‘upur kushikunapaq’ (Sal. 104:14, 15). Chayno captinpis, nazareucuna quiquinpa voluntäninpita chaycunata micupäcojchu ni upupäcojchu. c

5. ¿Ima cambiucunatataj Madián y Marcela rurargan? ¿Imanirtaj chayta rurapäcurgan?

⁵ Noganchipis nazareucunano imaycataraj jaguinchi y ruranchipis lapan tiempunchiwan Jehovata sirvinapaj. Ricärishun Madián y Marcela d rurashganta, paycunaga alishi cawacuycargan. Madián runaga trabajuncho achca guellaytashi ganaycargan y cuyaylapaj wasicho tiyarcaycargan. Pero Jehovata sirvishgancho masta rurayta munar achca cambiucunataraj rurargan. Paycuna cayno wilacärin: “Más walcala gastöcuna cananpaj camacächirgä, tacshala wasita ashirgä tiyapäcunäpaj y carrütapis ranticurgä”. Madián y Marcelaga quiquinpa voluntäninpita chay lapanta rurargan predicaciuncho más yanapacuyta munar. Paycunaga cushishga carcaycan Jehovata sirvinanpaj chay lapanta rurashganpita.

6. ¿Imanirtaj cristianucunaga cawaynincho achca cambiucunata ruran? (Dibujutapis ricay).

⁶ Cristianucunaga imatapis cushi cushila ruranchi Jehovata más sirvinanchipaj (1 Cor. 9:3-6). Payga manami mañamanchichu o exigimanchichu imaycanchicunata jaguirinapaj payta sirviyta munar. Yarpäshun waquincuna imacunata jaguirishganta Jehovata lapan tiempunwan sirvinanpaj. Juccunaga jaguirergan wasincunata, ali pagashga  trabajunta. Waquincunaga decidirgan soltero capäcunanpaj y casaracushgana caycar wamrancunata mana charananpäpis. Waquincunana familiancunata y amiguncunatapis jaguiriycur caru marcapa aywacärergan yanapacunanpaj. Achcajmi listo caycanchi chay lapanta ruranapaj Jehovata sirvishganchicho mastaraj rurayta munar. Chaymi seguro caycashwan Jehová alapa valurashganta payraycur imaycata ruraptinchi sirvinapaj (Heb. 6:10).

VALURCHARCUSHUNRAJ WAQUINCUNAPITA JUCNOMI CANAPAJ

7. ¿Imanirtaj öraga nazareucunapaj sasami cargan aunishganta cumplinanpaj? (Números 6:5, dibujutapis ricay).

⁷ (Leiriy Números 6:5). Nazareucuna Diosta aunishganraycur ajchantapis rutupäcojchu. Chayta rurarmi Jehovapa autoridäninta respetaycargan. Juc israelita achca tiempupa nazareo cananpaj acraptin, ajchanga jatunmi canaj. Y pay decidishganwan acuerducho caycajcunaga cushicärejmi. Pero israelitacuna mana alicunata rurashgan wichancho, pipis nazareucunata respetapäcojchu ni valurajchu. Profeta Amós cawashgan wichancho, Diosta mana cäsucoj israelitacunaga ‘nazareo runakunata mana munaykaqtami vïnuta upuchipäcoj’, chaytaga rurarganchi Jehovata aunishganta mana cumplinanpaj (Amós 2:12). Öraga sasachi cargan waquincunapita jucnomi cananpaj, chaypäga valurcharcurganrächi.

8. ¿Imataj yachacunqui Benjamin rurashganpita?

⁸ Noganchitapis Jehová yanapämanchimi waquincunapita jucnomi canapaj. Ricärishun chunca watayoj Benjamin wamrata ima pasashganta, payga Noruega naciunpitami caycan. Escuelanchoshi juc reuniunta rurargan Ucraniacho guerra cashganraycur yanapänanpaj. Wamracunaga Ucrania banderapa colornincunawan ropata jaticuycur naupamanshi yargurgan cantananpaj. Pero Benjamin chayta rurayta mana munar carulapitami ricananpaj quedacurgan. Ichanga profesoran ricaycur caynoshi nergan: “¡Jucla noganchiwan shamuy! ¡Caycho shuyarpaycä!”. Benjamin valurcharcur profesoran cajman aywaycur cayno nergan: “Nogaga política ruraycunacho manami jaticöchu. Achca Testigucuna carcelcho caycan guerraman mana aywashganraycur”. Chauraga profesoran manash imatapis nergannachu. Pero estudiaj masincunaga tapuparganshi imanirmi paycunawan mana cantashganta. Benjaminga alapashi manchacurgan y wagaytapis munarganraj. Pero yapay valurcharcur shumaj tantiachirgan imanirtaj chaycunata mana rurashganta.  Wasinman cutiycurnash taytanta mamantawan wilargan imano Jehová yanapashganta creishganta defendinanpaj.

9. ¿Imata rurartaj Jehovapa shongunta cushichinchi?

⁹ Jehovata cäsucuptinchimi runacuna cuentata gocärin paycunano mana cashganchita. Chaymi escuelachopis, trabajuchopis o maycho caycaptinchipis, valurcharcunanchirämi waquincuna Jehovapa testiguncunano reguimänanchipaj. Pero musyanchimi cay munducho runacuna más mana alicunaman chayananpaj, y öraga más sasami canga Jehová munashganno cawacunapaj y Diospa Gobiernunpita ali wilacuynincunatapis runacunata yachachicunapaj (2 Tim. 1:8; 3:13). Chayno captenga cayta ama gongashunchu: Diosta mana cäsucoj runacunano mana canapaj calpachacuptinchega, Jehovapa shonguntami cushichinchi (Prov. 27:11; Mal. 3:18).

IMAPITAPIS MÁS PUNTAMAN JEHOVATA CHURASHWAN

10. ¿Imanirtaj nazareucunapaj sasa cargan Números 6:6, 7 nishganta cäsucunanpaj?

¹⁰ (Leiriy Números 6:6, 7). Nazareucunaga wanushga cajcunaman ladunman witinmanchu o acercanmanchu cargan ni yatanmanpischu cargan. Pero chayga alapa sasachi cargan chayta mana rurananpaj cuyashgan castan o familian wanuriptin. ¿Imanir? Chay wichan costumbricuna cargan jitarashga ayapa laduncho runacuna y familianpis goturänanpaj (Juan 19:39, 40; Hech. 9:36-40). Pero nazareucunaga chay costumbrita manami rurapäcojchu. Cuyashgan castan wanushganpita alapa laquesawan caycapis, paycunaga valurcharcurgan Jehovata cäsucunanpaj, chaynopa musyachicuycargan payman lapan shongunwan yäracushganta. Chaycunapa pasarga manami japalanga carcaycarganchu, sinoga Jehovami imaypis espiritunwan yanapargan.

11. Familianchiraycur imaycata ruraptinchipis, ¿pitataj más puntaman churananchi? (Dibujutapis ricay).

¹¹ Noganchipis cristianucunaga calpachacunchimi Jehovata aunishganchita imaypis cumplinapaj. Chayga claro ricacämun cawayninchicho imata decidishganchicunacho y familianchitapis imano ricashganchicho. Imaycata ruranchi familianchicuna ali caycänanpaj, pero imapitapis masga Jehová ima munashgantami más puntaman churanchi (Mat. 10:35-37; 1 Tim. 5:8). Öraga capaz familianchicuna contranchicho churacanga o  chiquimashwanpis Jehovata imanopapis cushichiyta o cäsucuyta munaptinchi.

12. Bibliapita yachacushganraycur sasacunapa pasaptin, ¿imataj rurargan Alexandru?

¹² Ricärishun Alexandru y warmin Dorina imapa pasashganpita. Ishcancuna juc watana Bibliapita yachacurcaycaptin, Dorinaga estudiayta jaguirirgan y Alexandrupis chayta rurananpaj munargan. Pero runanga ali shimilapa y cuyacuywan tantiachergan yachacuyta munashganta. Chayta musyar Dorinaga pasaypa rabiacurgan y imaycata rurargan Bibliapita yachacuyta jaguirinanpaj. Alexandru chaycunapa pasar alapa sasami cargan, warmin gayapaptin y mana alipa trataptin, öraga yarparganshi paypis estudiayta jaguirinanpaj. Chayno captinpis valurcharcurgan Jehovata imapitapis más puntaman churananpaj y warmintapis cuyacuywan y respetuwan tratananpaj. Chayta rurashganraycur warminpis Bibliapita yapay yachacuyta galaycurgan y bautizacurgan. (Cay videuta ricay: Alexandru y Dorina Văcar: Cuyacoj cajga pacienciacunmi y pitapis ali rican, caytaga tarinqui “Rasunpa cajmi ali cawayta yachachimanchi”, jw.org paginacho).

13. ¿Imata rurartaj musyachicunchi Jehovata y familianchitapis cuyashganchita?

¹³ Jehovami lapan familiata camargan, chaymi payga munan lapan familiacuna cushishga cawapäcunanpaj (Efes. 3:14, 15). Pero rasunpa cushishga cawacunapäga Jehová munashgannomi lapanta rurananchi. Payga ricaycanmi y manami gonganchu lapan rurashganchicunata sirvinapaj. Jina cushicunmi familianchicunata ali cuidaptinchi, respetuwan y cuyacuywan trataptinchi (Rom. 12:10).

SHACYÄCHINACUSHUN NAZAREUCUNANO CANAPAJ

14. ¿Pïcunatataj masraj shacyächishwan?

¹⁴ Lapanchimi Jehová Diosta cuyashganchiraycur imaypis listumi caycashwan imaycacunata ruranapaj Diospa voluntäninta puntaman churanapaj. Pero öraga chayga manami facilchu canman. Chaura, ¿imataj jucninchi jucninchi rurashwan? Ali shimilawan shacyächinacushun (Job 16:5). ¿Reguinquichu pilapis congregaciunniquicho Jehovata masraj sirvinanraycur cawaynincho cambiucunata rurashganta? ¿Musyanquichu juc joven escuelancho calpachacuycashganta estudiaj masincunapita jucnomi cananpaj sasa captinpis? ¿Yarpanquichu juc hermano o Bibliata estudiaycajcuna Jehovata sirvinanraycur familiancuna contrancho churacashganta? Chaymi imaypis calpachacushun  paycunata shacyächinapaj valiente capäcushganpita Jehovata puntaman churananpaj y nirishwanpis alapa cuyashganchita (Filem. 4, 5, 7).

15. ¿Imataj juc edayashga cristiana rurargan ishcay precursoracunata yanapänanpaj?

¹⁵ Öraga imalatapis rurayta puedinchimi lapan tiempunwan Diosta sirvej hermanucunata yanapänanchipaj (Prov. 19:17; Heb. 13:16). Chaytami juc edayashga cristiana rurargan Sri Lanka naciunpita. Payshi ricargan ishcay jipash precursora cristianacunata guellayraycur sasacunapa pasaycajta, chaura pensiunninta mastana chasquiptin, payga cada quilla guellayninta raquirgan chay jipashcunapa telefununta pägananpaj, chaynopa precursoracunano siguinanpaj. ¡Chay cristiana rurashganga cushicuypämi cargan!

16. ¿Imataj yachacunchi nazareucunapita?

¹⁶ ¡Nazareucuna rurashganpitaga achcatami yachacushcanchi! Y ¿imataj yachacunchi Taytalanchi Jehovapita? Payga musyanmi shongupita cäsucuyta munashganchita y payta sirvinapaj aunishganchita cumplinapaj imaycata rurashganchitapis. Jina jaguimanchi payta cuyashganchiraycur imaycacunata ruranapaj (Prov. 23:15, 16; Mar. 10:28-30; 1 Juan 4:19). Jehovaga ricaycanmi payraycur lapan rurashganchita y alapami valuran, chaytaga ricashcanchina nazareucuna rurashgancho. Chaymi Jehovata sirviycäshunla y noganchipita más ali cajta goycushwan.