1. ¿Imanirtaj Jehovaga ima rurashganchitapis tincuchiycanchu waquincunapa cajwan?

JEHOVAGA cushishgalami runatapis y ima aycatapis camamushga. Mayganchipis jucno jucnomi canchi, chaymi Jehovaga jucwan jucwan tincuchimaycanchichu, payga shongunchicho imano caycashganchita masga ricaycan (1 Sam. 16:7). Jina payga musyanmi imacunata ali ruraycashganchita y imacunacho aliyarcunapaj pishiycashgantapis. Payga manami mañamaycäshunchu imaycataraj ruranapaj. Paynola rurarga cushicushunmi ima rurashganchipitapis y ali tantiaycurmi alapa laquicuycäshunnanchu (Rom. 12:3).

2. ¿Imanirtaj ima ruraycashganchitaga waquincunapa cajwan tincuchiycashwanchu?

² Waquin hermanucuna Diospita shumaj yachachicuycashganta ricarga alimi canman (Heb. 13:7). Paycunapita yachacurga ali yachachicoj runamanmi ticrarcachimashwan (Filip. 3:17). Ichanga mana aliga canman ‘paycunanola nogapis ruräman’ nir laquicuptinchimi. Waquincunata ricapaycarga envidioso runapis ticracurishwanmi o mana valejnopis ricacushwanmi. Jinamanpis pasajcho yachacushganchino congregaciuncho hermanunchicunawan imalapitapis yalinacuycarga Jehovapitapis quiquinchimi raquicaycashwan. Taytalanchi Jehovaga caytami yarpächimanchi: “Quiquincuna imanuy cangantapis tantiyacuchun. Ali cawarga shongulanchru ali cawanganpita yarpachracuchun. Runamasin  imanuy cangantapis ama ricapächunchu” (Gál. 6:4, Ambo Pasco Biblia).

3. ¿Jehovata sirvir imacunapitataj cushicurcunqui?

³ Jehovaga munanmi mana yamacaypa payta sirvir jucninchi jucninchi cushicunanchita. Bautizacushgana carga imayca caycan cushicunapaj. Jehovata cuyashpanchimi bautizacushcanchi. Y canancamaga cushi cushilami Palabranta leir y shongupita mañacur cawacunchi (Sal. 141:2). Ichanga cananpis ali yachachicojman ticrashganchiraycur pitapis shumaj Diospa Palabranpita yachachiycanchi. O casaracushgana carga Jehovaga mayraj yanapaycämanchi ali runa, ali warmi, ali tayta, ali mama canapaj. Aumi, canancamaga Diospa ricayninpäga imayca alicunatami rurashcanchi, chaypitaga cushicushwanmi.

4. ¿Imacunapitataj canan yachacurishun?

⁴ Waquincunatapis yanapashwanmi Jehovata sirvir cushicurcunanpaj y rurashgancunatapis waquincunapa cajwan mana tincuchiycänanpaj. Cananmi yachacurishun imanotaj taytacuna wamrancunata yanapanman, casaducunapis jucnin jucnincuna yanapanacärinanpaj y congregaciuncho ancianucunapis y hermanucunapis yanapanacärinanpaj. Nircurpis yachacuycäshun Bibliapa shumaj consejuncunapita, imanotaj caycuna yanapämashwan imayca rurashganchicunacho.

5. ¿Imatataj taytacuna mana rurapäcunmanchu Efesios 6:4 wilacushganno?

⁵ Tayta cajcunaga wamrancuna ima rurashgancunata tincuchiycanmanchu waquincunapa wamrancunawan, chayno rurarga laquichirpis laquircachinmanmi wamrancunata (leiriy Efesios 6:4). Sachiko * jutiyoj panimi cayno nin: “Escuelächo profesornëcunaga pipitapis más ali nötayoj canätami munapäcurgan. Jina mamänëpis ali estudiante canäta munargan chaynopa mana Testigo caj papänë cushicunanpaj. Examennëcunachopis lapan tapucuycunata alila ruranäta munargan, ichanga cayga nacachimajmi. Escuelätaga unaynami ushashcä, chayno captinpis Jehovapa naupancho imaycata rurarpis mana valejnomi ricacö”.

6. ¿Ima ali yarpächicuytaj caycan taytacunapaj Salmo 131:1, 2 textucho?

 ⁶ Taytacuna shumaj yarpachacärinanpäga Salmo 131:1, 2 (leiriy) textumi ali caycan. Unay rey Davidmi cayno nergan: “Manami munächu ima-aycatapis aypallata ni ima allicunatapis mana aypänäpaj cajtaga”. Chayno nir ‘upallalla cawacurmi’ Davidga jauca jaucala cawacoj. Chauras taytacunaga humilde car y camäpacushganlata rurarmi, quiquincuna y wamrancuna ima rurashgancunataga mana tincuchiycanmanchu waquincunapa cajwan. Wamrancunapaj yarpachacurga ‘¿imachotaj ali caycan y imachotaj yanaparcöman?’ nirmi carcaycanman, chaynopami wamracunaga imapitapis laquicuycanganachu. Marina jutiyoj panipis cayno nin: “Wasëchoga manami imaypis mamänëga hermanöcunawan tincuchimajchu. Jucnë jucnëtami nipäcamaj achca ruraycunayoj cashgäta y Diospa nawilancho ali capäcushgäta. Chayno ashmamashganraycurmi mana piwanpis igualacuycächu”.

7, 8. ¿Imanotaj casado olgucuna musyachicunman warminta respetashganta?

⁷ Casado olgucunaga warmintami cuyapar respetanman (1 Ped. 3:7). Chayga ricacämunga paylaman yarpar imacunalachopis yanapacushganchomi. ¿Imanotaj chayta ruranman? Warmincunapita alapa mana shuyarar, wasicho imayca arushganpitaga ‘alitami ruraycanqui’ nir y waquin warmicunawanpis mana igualachir. ¿Imanirtaj waquin warmicunapita parlapar tincuchiycanmanchu? Rosa paninchipita parlarcushun. Runanga manami Testiguchu, payga ‘imanirtaj waquin warmicunanoga mana canquichu’ nirshi parlapan. Chayno parlapashganwanga mana cajpami warminta churaj. Mana valejno ricacurshi Rosa paninchipis tapucun ‘¿pilapis cuyamanchuraj?’ nir, jina payga cayno nin: “Imanomi munaycö Jehová cuyamashganta pilapis niycalämanganta”. Ichanga casaduna Testigo olgucunaga warmintami cuyapar respetan, musyapäcunmi chayta rurar-raj Jehovawanpis ali cananpaj. *

⁸ Warmiyoj cristianucunaga ‘gamtaga alapami cuyayculä’ nirmi cuyapaylapa warmincunata parlapan (Prov. 31:28, 29). Chaytami rurargan Katerinapa runan, paypitaga pasaj estudiuchomi yachacurganchi. Katerinataga mamäninshi wamrala cashganpita ‘gamga upano puricunqui, waquin chinitacunano canquiman’ nirshi parlapaj. Bautizacushgana carpis Katerinaga ‘waquincunano nogapis cäman’ nirshi yarpachacuycashgaraj. Runanga yanapaycushgash chayno mana yarpachacunanpaj. Chaychi Katerinaga cayno nin: “Runaläga cuyamarmi ‘alitami ruraycanqui’ niman, Diostapis ruwacamunmi nogapaj. Jucnopa yarpachacur galaycuptëpis Jehová imano cashganpitami parlapäman yanapämananpaj”.

9, 10. ¿Imanotaj ancianucuna yanapacurgan Hanuni jutiyoj panita?

⁹ Congregaciuncho pipis ima rurashgancunata waquincunapa cajwan tincuchiycarga ¿imanotaj ancianucunaga yanapacunman? Hanuni panipita parlarcushun, paytaga manash wamralaraj cashgan wichanchoga pipis niparganchu ‘alitami rurashcanqui’. Paymi nin: “Upälalami cacoj  cä, waquincunala más tantiaj, más yachaj cashganta yarpachacoj cä”. Testigumanna ticrarpis chaynolash yarpachacuycashgaraj y congregaciuncho imatapis mana ruraycashganno ricacurgan. Pero ¿imataj yanapargan precursorano yanapacur cushishgalana cawar galaycunanpaj?

¹⁰ Ancianucunash paytaga yanapargan y ali rurayniyoj warmi cashganta yarpächergan. Hanuni paninchi cayno nin: “Öraga ancianucuna nipäcamaj waquin cristianacunata yanaparcunäpaj, chayno yanapacuycashgäman yarparga cushichimajmi. Más jipash cajcunata shacyächishgäpitapis ancianucunaga agradëcicurmi ali shimilapa parlapämargan y 1 Tesalonicenses 1:2, 3 textuta leipämashganpis shongüta cushircächishgarämi. Ancianuläcunataga alapami agradëcicö. Cananga cushi cushilanami congregaciuncho yanapacö”.

11. ¿Imanotaj yanaparcushwan ‘umildicunatapis y laquishgacunatapis’ Isaías 57:15 texto nishganno?

¹¹ (Leiriy Isaías 57:15). ‘Umildicunapapis laquishgacunapapis’ Jehovaga yarpachacun. Chaynolami noganchicunapis congregaciunchoga shacyächinacur lapanchi yanapänacushwan. Waran waranmi Jehovataga ricächishwan uyshancunapa yarpachacuycashganchita (Prov. 19:17). Jina humilde cashpanchega imalapitapis manami ali tucuycäshunchu. Imalachopis yachaj tantiaj carga, jucninchi jucninchi yanapanacunapämi canman (1 Ped. 4:10, 11).

12. ¿Imanirtaj pï runacunapis Jesuswan cushi cushila cacärej? (Garancho caycaj dibujuta ricay).

¹² Waquincunawan ali caycänapäga, gatejnincunawan Jesús imano cawacushganpita yachacurmi yanapämäshun. Diospa Churin caycarpis ali shongulanwanmi pï maytapis ricaj (Mat. 11:28-30). Lapanta yachaj y tantiaj caycarpis, manami ali tucurchu cawacurgan. Pï maytapis yachachicurga reguishga cajcunalapita tantiachicamurmi parlacaramoj (Luc. 10:21). Pushacoj religiosucunaga ali tucushpanmi chayta mana rurapäcojchu. Runacunaga Jesuswan caycar-rami cushishgala cawacärej (Juan 6:37). Aumi, Jesusmanga pï maypis cushi cushilami shacäramoj.

13. ¿Imanirtaj ninchi Jesusga ali shongulanwan gatejnincunata cuyapashganta?

¹³ Maypita captinpis, yachaj o mana yachaj captinpis ali shongulanwanmi Jesusga gatejnincunata cuyapaj. Chaymi Jesusga nergan calpan cashganmannola jucnin jucninpis arupäcunanpaj, chaycho ricacämurgan imano Jesús paycunata valurashganta. Cayta tantiarcunchi talentos nishgancho yachachicamushganchomi. Chaychoga parlamurgan esclavuncunata juc patrón guellayta goshganpita; chay guellaytaga aruchipäcurganmi ishcay esclavucuna, ichanga jucnin cajmi maslata miraycachergan, chayno captinpis ishcancunatami patrunnin cayno nergan: “ali ashmaymi canqui” (Mat. 25:14-23).

14. ¿Imanotaj Jesusnopis waquincunata ali nawilanchiwan ricaycashwan?

¹⁴ Noganchitapis Jesusga cuyapämashpanchimi ali nawilanwan ricaycalämanchi. Calpanchi cashgannola jucninchi jucninchi arucuptinchimi payga lapantaraj manami mañamanchichu. Hermanunchicunataga ali nawilanchiwanmi ricaycushwan, pengachiswanchu ima ruraytapis mana puedishganpitaga. Paycunata imaypis shacyächirmi Diospa naupancho alicunata ruraycashganta nishwan.

15, 16. ¿Ima rurashgancunataj Midori paninchita yanapargan?

¹⁵ Diosta imano sirvinapaj cada cadala yarpachacurga musyashunmi shamoj watacunacho imata rurar cushi cushila caycänapaj, quiquinchiman yarparmi chayta rurashwan. Waquincunawan igualachicuycarga ichanga mana ali ricacur laquishga caycashwan (Luc. 14:28). Precursorano yanapacoj Midori panipita parlarcushun.

¹⁶ Midori paninchitaga wamrala cashgan wichanshi mana Testigo papäninga ‘¡imata gamga, waquincunano canquiman!’ nirshi pasaypa jagayächej. Paymi cayno nin: “Imapänataj cawashaj” nirmi yarpachacur galaycurgä. Tiempuwanga aliyarcurganshi. Caynopis wilacunmi: “Bibliätaga waran waranmi leipacur cacurgä, chayta rurashgämi ricächimargan Jehová imano cuyamashganta”. Jehovata ruwacurcurshi imata rurananpaj cajmanpis yarpachacurgan. Chay lapanta rurarga más cushishgalana Jehovata sirvirgan.

17. ¿Imanotaj cristianucunaga ‘llutan yarpashganchita cachaycur jucnopana yarpar’ galaycushwan, y chayta rurarga imanotaj ricacushun?

¹⁷ Öraga pucutaynopis ima yarpachacaycächimashganchicunaga manami jucla ilacangachu. Chaymi Taytalanchi Jehovaga “llutan yarpashayquita cachaycur jucnöna yarpay” nimanchi (Efes. 4:23, 24). Chayno cananpäga mañacushwanmi, Bibliatami leishwan y leishganchiman yarpachacushwan. Diospa calpalantapis mañacushwanmi. Santo espiritunpis yanapämäshun waquincunawan igualachicur laquishga mana  caycänapaj. Jinamanpis Jehovaga tantiarcachimäshunmi ali tucoj envidioso runaman ticrashga carga y yanapämäshunmi chayno mana canapaj.

18. ¿Imanotaj 2 Crónicas 6:29, 30 texto gamta shacyarcachishunqui?

¹⁸ (Leiriy 2 Crónicas 6:29, 30). Shongunchicho ima cashgantaga Jehová musyanmi. Jina musyanmi imanomi cay munduwan y quiquinchiwanpis luchaycashganchita. Mana yamacaypa alicunalata rurarga jucninchi jucninchiwanmi Jehovaga cushi cushila caycanga.

19. ¿Imanirtaj ninchi Jehovaga juc mamano cuyaycalämashganchita?

¹⁹ Imanomi wamranta juc mama amatar cuyan, chaynolami Jehová cuyamanchi (Is. 49:15). Rachel jutiyoj pani cayno wilacun: “Stephanie jutiyoj wawaläga, quillan pishiycaptinraj yurishga. Puntalachoga juc caja nirajlachomi caycargan, itiläga ichiclarämi caycargan y waran waran malgaycunäpäga doctorpis michämarganchu, chaynopami wamraläta cuyar galaycurgä. Canancamaga sojta watacunana pasashga y manami waquin wamracunanochu, chayno captinpis lapan shongüwanmi jinala cuyaycä y cushishga caycä”. Chay wamranolami noganchipis cawanapäga ichanga imaycataraj ruranchi pero Jehovaga juc mamanomi imaypis cuyaycalämashun. Cayga cushircachimanchimi ¿au?

20. ¿Imacunata rurartaj cushi cushila caycäshun?

²⁰ Maypita carpis imano carpis Jehovapa naupanchoga lapanchipis igual-lami canchi. Payta sirvinapäpis manami acramashcanchichu waquincunapita más yachaj cashganchipita, Jehovaga acramashcanchi ali runa y ñanpu shongu cashganchipitami (Sal. 25:9). Y mayraj cushicunpis sirvinapaj cada cadala calpachacuptinchega. Chayno mana raquicaypa Payta sirvishganchichomi ricacämunga shonguchicho ima cashgancuna (Luc. 8:15). Jehovata lapan shongunchiwan y yarpayninchiwan aduraycäshun, chayta rurarga masrämi cushicushun.