1. ¿Imatataj Jehovaga rurashga jucninchi jucninchipaj?

QUIQUIN Jehovami Testigun canapaj acramashcanchi (Juan 6:44). ¿Imanirtaj chayno ninchi? Jehovaga cay Pachacho lapan runacunata ricapacaramurmi, lapancunapita shongunchicho alicunata ricar, noganchita acramashcanchi (1 Crón. 28:9). Cuyapämashpanchi Jehovaga imano caycashganchita lapanta musyan noganchipita. ¡Cushicuypämi chayga!

2. ¿Imapitataj Jesús wilacamurgan Jehová cuyamashganchita tantiachimänanchipaj?

² Jehovaga alapami gamta cuyashunqui y lapan cristianomasinchicunatapis. Cayta tantiarcunapaj Jesús imapita parlashganta ricarcushun. Paymi nergan: “Pipis pachak (100) uyshanpita jukta oqraykurqa ¿manaku wakin kaqta ayluykur jukla ashiq aywan?”. Awmi, tariycurga alapami cushicun. ¿Imata yachacunchi? Jehovaga jucnin jucnin uyshanpämi yarpachacun. Chaymi Jesús nergan: “Taytäpis mana munantsu juk wamralapis oqrakänanta” (Mat. 18:12-14).

3. ¿Imapitataj canan yachacurishun?

³ Awmi, öraga imatapis lutanpa ruraycashwan, pero hermanunchicunataga manami imaypis laquircachishwanchu. Cananmi cayta yachacushun: ¿Imataraj rurashwan waquincunata mana ishquichinapaj? y ¿imataraj rurashwan pipis ofendicamaptinchi? Nawpataga parlarcushun “kay wamrakunata” nir Mateo librucho Jesús parlashganpita.

4. ¿Picunataj ‘kay wamrakuna’ caycan?

⁴ ‘Kay wamrakuna’ Jesús nerga lapan gatejnincunapämi parlaycargan. Ima edayoj carpis ‘wamrakunanomi’, ñanpu shongulanwanmi imatapis chasquicun (Mat. 18:3). Maypita carpis, ima casta carpis Jesusmanmi lapancuna yaracärin. Y Jesusga jucnin jucnintami alapa cuyan (Mat. 18:6; Juan 1:12).

5. ¿Imanotaj Jehová rican pipis waquincunata nacachiptin?

⁵ ‘Kay wamrakunataga’ Taytalanchi Jehovaga amatarmi cuyan. Cayta tantiarcushun ichic wamracunapita parlar. Wamracunataga cuyanchimi y imapitapis chapaycunchimi; wamralaraj carmi paycunaga calpaynajraj caycan y imatapis chaylaraj yachacuycan. Ichanga maygan runatapis pipis nacachinganta ricarga piñacurinchimi, pero wamracunata pipis nacachiptenga masrächi rabiacurishwan. Taytanchi Jehovapäpis mana alimi chayga canman, payga manami munanchu pitapis nacachinanchita o pipis nacachimänanchita, rabiarpis rabiacurinmanmi (Is. 63:9; Mar. 9:42).

6. 1 Corintios 1:26-29 textucuna nishganno, ¿imanotaj cay mundo runacuna ricämanchi?

⁶ ¿Imanotaj Jesuspa gatejnincunaga ‘wamracunano’ cashwan? Cay mundo runacunaga ricucunalata, reguishga cajcunalata y carguyoj cajcunalata ali nawilanwan rican. Noganchicuna ichanga jucnopa ricanacunchi: ‘wamracunano’; chaymi cay mundo runacunaga mana valejtano ricämanchi (leiriy 1 Corintios 1:26-29). Pero Jehovaga ali nawilanwanmi ricaycalämanchi.

7. ¿Waquincunawan imano goyäcunanchitataj Jehová munan?

⁷ Unayna sirviycarpis, chaylaraj sirviycarpis Jehovaga lapanchitami cuyamanchi. Jehová ali nawilanwan hermanunchicunata ricaycarga chaynolami noganchipis rurashwan. ‘Atskaq karpis juknintsi juknintsipis juk cuerpunöla kaykashwan’ (Rom. 12:5). Hermanunchicunata cuyarga paycunaraycur wanurpis wanushwanmi. Pilatapis ofendirishga carga juclami parlanapaj aywashwan, pacapämaptinchipis calpachacushwanmi tarinapaj y manami nishwanchu ‘gongaycunganami’. ¿Imaraycurtaj waquincuna ofendicunman? Ichanga canman imano winashganraycur y mana valejno ricacushganraycurmi. Jinamanpis waquincunaga chaylaraj bautizacärishga canman y yarpanman pï hermanupis ni imalachopis mana pantananpaj. Imano captinpis calpachacushwanmi jauca jaucala goyänapaj. Y imalapitapis pipis ofendicurga calpachacunmanmi chayno mana cananpaj. Chayta rurarga quiquinpis y waquincunawanpis alimi goyäcunga.

8. ¿Imanotaj runacuna capäcoj Jesuspa gatejnincuna cawashgan wichan?

⁸ ¿Imanirtaj ‘kay wamrakuna’ Jesús nergan? Discipuluncunami chaylaraj cayno tapurgan: “Tayta Dios mandaykashqancho ¿pitaq mas ali rikashqa kanqa?” (Mat. 18:1). Chay wichan judiucunaga ima ayca charashganpitami alitucärej. Juc runa cayno wilacun: “Runacunaga waran waranmi pipis ali ricänantaraj ashej, pipis alabanantaraj shuyaraj”.

9. ¿Imatataj rurapäcunman cargan Jesuspa gatejnincuna?

⁹ Jesusga musyarganmi gatejnincuna calpachacärinanpaj, judiucunano imatapis yalinacuypa mana rurapäcunanpaj. Cayno nergan: “Munayniyuq karpis wamrano humildi  kapäkuy. Mandaq karpis ashmaynöla yanapakuq kapäkuy” (Luc. 22:26). ‘Wamrano’ cashganchita musyachicunapäga waquincuna más ali rurajcuna cashganta yarpänanchi (Filip. 2:3). Chayno runa carga manami pitapis laquichir ishquichishunchu.

10. ¿Pablo ima nishgantataj mana gongashwanchu?

¹⁰ Waquin hermanucunaga imalachopis más tantiaj o más yachajmi noganchipita, chaynoga ninchi pantashganlaman mana yarparäcurmi. Mana gongaypami Corinto cristianucunata Pablo escribishganta yarparaycashwan, paymi nergan: “Gamtaga ¿pitaj waquinpita mas alli cashayquita nishurayqui? ¿Llapan yachashayquitapis manachu Tayta Diospita chasquishcanqui? Chayno chasquisha caycarga ¿imanirtaj yarpaycanqui yachaj cashayqui quiquillayquipita cashanta?” (1 Cor. 4:7). Pipitapis más yachaj cashganchita yarparäcurga o imalapitapis alitucurga mana alimi caycan. Ali discursaj wawgui carga o maygan panilapis achca runacunata Bibliapita yachaycächerga Jehovapa yanapacuyninwanmi lapanpis ruracaycämun.

11. ¿Imatataj yachacunchi reypaj y ashmayninpaj Jesús wilacamushganpita?

¹¹ Laquichir pitapis mana ishquichinanpaj Jesús parlarirmi, gatejnincunata wilapargan juc reywan y esclavunwan ima pasashganta. Chay reyshi esclavunpa lapan jaganta perdunaycurgan. Ratulancho cay esclavo, jagan caycaj ashmaymasinwan tincurir mana perdunarganchu, walcala jagan caycaptinpis. Chaypitana reyga chay mana cuyapäcoj esclavuta carcilcho wichgachergan. ¿Imata yachacunchi? Jesusmi nergan: “Chaynömi gamcunatapis syëlucho caycaj Taytä rurashunquipaj yäracoj-masiquicunata llapan shonguyquipa mana perdunaptiquega” (Mat. 18:21-35).

12. ¿Imaraj pasanman pitapis mana perdunaycurga?

¹² Cay esclavo rurashganga mana alichomi ushargan, waquincunapis laquicärirganmi ima rurashganta ricar, payshi esclavomasinta ‘jinan öra carsilman wichgachisha pristashanta cutichinancama wichgaränanpaj’. Caytapis Jesús wilacurganmi: “Chayno rurashanta ricaycur waquin caj uywayga fiyupashi llaquicusha”. Chaynolami noganchipis pitapis laquicherga, waquincuna musyaycurpis laquicärinmanmi. ¿Imaraj pasanman pilatapis mana perdunaycurga? Pasaypami laquichishwan, nircurpis sasa canman yapay junto caycänapaj. Congregaciuncho hermanunchicunapis laquicurmi galaycärinman piwanpis mana ali caycashganchita ricar.

13. ¿Imatataj yachacunchi juc precursora imapa pasashganpita?

¹³ Hermanunchicunata perdunarga quiquinchipis y waquincunawanpis alimi goyäcushun. Precursorano yanapacoj Crystal jutiyoj panipita parlarcushun. Paytash congregaciuncho juc pani cutin cutin jagayächej, cayno nin: “Parlapämashganga cuchilluwan tucsiycämajnomi cargan. Predicaj aywarpis, pay caycashgan carrucho aywayta munargächu. Manami cushishgalanachu caycargä, ganasnëpis ushacarganmi”. Chayno cacunanpäga Crystal paniga ‘manami culpächu’ nirganshi, pero yarpachacurgan jucaj panita mana nanaparänanpaj. Humilde carmi La Atalaya (1999 wata, 15 de octubre) revistacho ima wilacushganta chasquicurgan, chaycho tarirgan “Perdonemos de corazón” nishgan temata. Nircur perdunarganshi hermananta. Cayno nin: “Tantiarcömi, lapanchicunami  calpachacuycanchi ali runaman ticranapaj, y Jehovapis imano cutin cutin perdunamashganchita. Pitapis mana perdunarga lasaj guepita apajnomi canman, cananga cushishgalanami caycä”.

14. 1) Mateo 18:21, 22 textucuna nishganno, ¿imaraj pasargan Pedruwan, y imatataj yachacunchi Jesús ima nishganpita? 2) ¿Ima quimsa ruraycunataj yanapämäshun?

¹⁴ Pitapis perdunarga imaypis alimi canga. Pero öraga sasanomi ticracurinman. Ichanga apóstol Pedrupäpis sasano cargan waquincunata perdunay (leiriy Mateo 18:21, 22). ¿Imataj yanapämashwan? Nawpataga Jehová cutin cutin perdunamashganchiman yarpachacushwan (Mat. 18:32, 33). Mana perdunamänanchipaj captinpis payga waran waranmi perdunamanchi (Sal. 103:8-10). Noganchipis calpachacunanchimi jucninchi jucninchi cuyanacunapaj y paycunata laquipar imaypis perdunanacunapaj (1 Juan 4:11). Nircurna, caymi ishcay caj, perdunaptinchi ima pasashganman yarpachacushwan. Perdunarga yanapaycanchimi pï ofendimashganchita, hermanunchicunawanpis juc shongula caycäshun, Diospa nawpancho ali caycäshun y más cushishgala caycäshunpis (2 Cor. 2:7; Col. 3:14). Chaypitapis, caymi quimsa caj, Jehovata ruwacushun, paymi nimanchi perdunacoj canapaj. Diabluga imaycatami ruraycämunga hermanunchicunapita raquicänapaj (Efes. 4:26, 27). Jehovapa jutincho calpachacushun Diablupa trampancunaman mana ishquinapaj.

15. Efesios 4:32 texto nishganno, ¿imatataj rurashwan maygan hermanulapis ofendimaptinchi?

¹⁵ ¿Y maygan hermanulapis mana alita ruraycamaptinchega? Ali canga jauca jaucala caycänapaj calpachacuptinchega. Jehovata  ruwacushun y lapan yarpashganchitapis wilapäshun. Pï ofendimashganchi cajpäpis mañacushwanmi Diosninchi bendecinanpaj, paynola ali nawilanchiwan ricänapäpis (Luc. 6:28). Ima ruramashganchita gonganapaj sasa captenga alichi canman paywan parlanapaj calpachacuptinchega. Jina adrede mana ofendimashganchita yarpashwan (Mat. 5:23, 24; 1 Cor. 13:7). Parlarcaycaptinchipis manami ricächishwanchu culpayoj cashganta. ¿Chayta rurarpis ali goyäcunapaj mana munaptenga? Biblia cayno nin: “Jucniqui-jucniquipis alli ricanacur caway” (leiriy Efesios 4:32). Awmi, calpachacushwan mana nanaparaycänapaj, chayta rurarga Jehovawanpis alimi caycäshun. Imapis manami ishquichimashwanchu. Imapitapis Jehovata cuyashganchimi ricacämunman (Sal. 119:165).

16. ¿Imatataj rurashwan hermanunchicunaraycur?

¹⁶ ¡Cushicuypämi ‘llapanchipis jucllachacashalla’ carga y ‘uyshërunchipis jucnaylla’ captin! (Juan 10:16). 165 paginancho, librunchi Organizados para hacer la voluntad de Jehová cayno nin: “Juc shongula juc yarpayla caycänapämi imaypis calpachacushwan”. Nircurpis nin: “Hermanunchicunawanga mana chiquinacuypami cawashun Jehová ricashgannola ricarga”. Cuyapämashpanchimi Jehovaga ‘wamrantano’ ricämanchi. Noganchipis chaynola hermanunchicunatapis ricänanchi. Diosga cushicungami paycunata ganas ganasla yanapacuptinchi (Mat. 10:42).

17. ¿Imata rurananchipätaj calpachacushwan?

¹⁷ Cuyapänacurmi hermanunchicunawanga cawacunchi. Chaymi “yärakuq mayintsi imatapis rurashqantsita rikar qepaman kutikunanpaq kaptinqa tsayta ama rurashuntsu” (Rom. 14:13). Hermanunchicuna más yachaj más tantiaj cashganta yarparmi perdunapaj captinpis perdunaycushwan. Guepaman cutishwanchu waquincuna imatapis ruramashganchiraycurga. Ama gongashwanchu “ali kawanantsipaq y shakyätsinakur Tayta Dios munashqanno kawanantsipaq” (Rom. 14:19).