•  Ri rajawaxik kawetaʼmaj

•  Ri katkunik kabʼano

•  Ri kkichomaj ri nikʼaj chi alabʼom alitomabʼ

•   Pa ronojel ri e achilanik e kʼo kʼax. Rumal che oj ajmakibʼ, weneʼ ri winaq che kachomaj che are jun utz awachiʼl, o ri utzalaj awachiʼl, kubʼij o kubʼan jun jastaq che kubʼan kʼax chawe. Ksach ta chawe che xuqujeʼ at aj ajmak. Qastzij wi, che at xuqujeʼ abʼanom jun jastaq che utz taj che ubʼanom kʼax che jun chik (Santiago 3:2).

•   Ri kawil pa Internet kkunik kubʼan kʼax chawe. Jun kʼutbʼal, jun ala ubʼiʼ David kubʼij: «Are chiʼ katok pa Internet tekʼuriʼ kawil wachbʼal kech ri awachiʼl che e kʼo pa jun nimaqʼij, weneʼ kachomaj jasche xkibʼij ta chawe. Wariʼ kubʼano che kanaʼ bʼis xuqujeʼ kanaʼo che katkaj taj».

•   Katkunik kaqʼaxej ri ri kʼax.

 Chachomaj. Ri Biblia kubʼij: «Mayaʼ awibʼ chi katumajij ri oyowarik, rumal rech chi ri oyowarik are waʼ ri qas kʼo rukʼ ri winaq ri man kʼo ta unoʼj» (Eclesiastés 7:9).

 «Jujun mul, are chiʼ keqʼax ri e qʼij kawilo che, ri xbʼanow chawe che xpe awoyowal nim ta ubʼanik» (Alyssa).

 Chachomaj wariʼ: ¿La chanim kpe awoyowal? ¿La kachomaj che katkunik kawetaʼmaj uchʼijik ri kkibʼan ri e nikʼaj chik? (Eclesiastés 7:21, 22).

 Chnaʼtaj chawe che usachik ri mak kukʼam lo utzilal. Ri Biblia kubʼij che nim ubʼanik we kqasach kimak ri e nikʼaj (Proverbios 19:11).

 «Weneʼ qas kʼo rumal che xpe awoyowal, are kʼu ri más utz are usachik ri mak. Wariʼ kraj kubʼij che kqanaʼtasaj ta chiʼ che ri winaq ri kʼax xubʼan chqe xuqujeʼ kqataʼ ta che, che kusach umak chqawach amaqʼel. We qas xasach umak, xaq ta amaqʼel kabʼij che ri xubʼan chawe» (Mallory).

 Chachomaj wariʼ: ¿La qas nimalaj kʼax ri xkʼulmatajik? ¿La katkunik kasach umak ri winaq rech kʼo jamaril chixoʼl? (Colosenses 3:13).

 Chatchoman chrij ri jun winaq chik. Ri Biblia kubʼij: «Kʼo jun mutzukuj xuwi ri qas utz che, xaneʼ xuqujeʼ ri utz na chke ri juleʼ chik» (Filipenses 2:4).

 «We pa ri achilanik kʼo loqʼoqʼebʼal xuqujeʼ nim kkil kibʼ chanim riʼ kasukʼumaj ri kʼax chixoʼl, rumal che akojom achuqʼabʼ che ri awachilanik. Xuqujeʼ akojom achuqʼabʼ che uchajixik, kawaj taj katzaqo» (Nicole).

 Chachomaj wariʼ: ¿La katkunik kawil jun utz ubʼantajik ri winaq? (Filipenses 2:3).

 Kʼisbʼal re: Retaʼmaxik jas kabʼan chuwach ri kʼax che kariqo katutoʼ are chi katkʼiyik. Utz we kakoj achuqʼabʼ che ubʼanik kimik.