Ri xutzʼibʼaj Mateo 7:1-29
-
RI XUTZIJOJ RI JESÚS PA RI JUYUBʼ (1-27)
-
«Miqʼat chi tzij pa kiwiʼ nikʼaj chik» (1-6)
-
Mitanabʼaʼ utaʼik, mitanabʼaʼ tzukunem y mitanabʼaʼ ukʼorkʼoxik ri uchiʼ ja (7-11)
-
Ri rajawaxik kqabʼano rech oj utz kukʼ e juntir (12)
-
Ri uchiʼ ja latzʼ uwach (13, 14)
-
«Kiwetaʼmaj na kiwach rukʼ ri kkibʼano» (15-23)
-
Ri ja xbʼan puwiʼ abʼaj y ri ja xbʼan puwiʼ sanyabʼ (24-27)
-
-
Are chiʼ ri winaq xkita ri xubʼij ri Jesús sibʼalaj xemayinik (28, 29)
7 »Miqʼat chi tzij pa kiwiʼ nikʼaj chik rech kqʼat ta tzij piwiʼ ix.
2 Rumal che ri kibʼan che uqʼatik tzij pa kiwiʼ nikʼaj chik je kbʼan che uqʼatik tzij piwiʼ ix, y ri etabʼal kikoj chke ri e nikʼaj chik are ri kkoj na chiwe ix.
3 ¿Jasche are kawil ri mes kʼo pa ubʼaqʼwach ri awachalal y are ta kawil ri takʼatikalaj cheʼ kʼo pa ri awech at?
4 ¿Jasche kabʼij che ri awachalal ‹chayaʼ bʼe chwe kinwesaj ri mes pa abʼaqʼwach›, pero pa ri awech at kʼo jun takʼatikalaj cheʼ?
5 ¡Xa kebʼ apalaj! Nabʼe chawesaj ri takʼatikalaj cheʼ kʼo pa ri abʼaqʼwach at rech katkowinik kawesaj ri mes kʼo pa ubʼaqʼwach ri awachalal.
6 »Miya ri jastaq re ri Dios chke ri e tzʼiʼ y mikʼaq ri i perlas chkiwach ri e aq, we kikʼaqo kkixaqʼalej riʼ, kepe riʼ chiwij y kkibʼan kʼax riʼ chiwe.
7 »Mitanabʼaʼ utaʼik, kyaʼtaj kʼu na chiwe; mitanabʼaʼ tzukunem kiriq kʼu na ri kitzukuj; mitanabʼaʼ ukʼorkʼoxik* ri uchiʼ ja ktorotaj kʼu na chiwach.
8 Rumal che ri winaq ri kutaʼ kyaʼtaj na che, ri winaq ri ktzukunik kuriq na ri kutzukuj y ri winaq ri kukʼorokʼaʼ ri uchiʼ ja ktorotaj na chuwach.
9 We ri e iwalkʼwal kkitaʼ kikaxlanwa chiwe, ¿la xa jun abʼaj kiya apan chke?
10 Y we kkitaʼ jun kar chiwe, ¿la xa jun kumatz kiya chke?
11 Rumal laʼ, paneʼ ix ix itzel taq winaq pero kixkowinik kisipaj utz taq jastaq chke ri e iwalkʼwal, e ta kʼu lo ri Itat chilaʼ chikaj, ¿la ma ta lo kuya utz taq jastaq chke ri winaq ri kkitaʼ che?
12 »Rumal riʼ, juntir ri jastaq ri kiwaj kbʼan chiwe ix je chibʼanaʼ chke ri nikʼaj chik. We je kibʼano, tajin kibʼan riʼ juntir ri kubʼij ri Ley y ri xkitzʼibʼaj kan ri Profetas.
13 »Chixok pa ri uchiʼ ja ri latzʼ uwach, rumal che nim uwach ri uchiʼ ja y jeqejik uwach ri bʼe ri keʼukʼam bʼi ri winaq pa ri kamikal* y sibʼalaj e kʼi ri keʼok bʼi chilaʼ;
14 latzʼ kʼu uwach ri uchiʼ ja y nitzʼ uwach ri bʼe ri keʼukʼam bʼi ri winaq pa ri kʼaslemal, pero xaq jujun ri winaq keriqowik.
15 »Chichajij iwibʼ chkiwach ri kkijaluj kibʼ chi e profetas, ri keqebʼ iwukʼ jetaneʼ keʼilitajik chi e chij* pero xa e bʼanal taq kʼax junam kukʼ lobos.
16 Kiwetaʼmaj na kiwach rukʼ ri kkibʼano.* Iwetaʼm kʼu ix che kʼo ta jumul jun winaq kuyak uvas, ni higos che jun kʼix.
17 Xaq junam rukʼ, jun utz cheʼ kuya utz uwach, pero jun qʼayinaq cheʼ utz ta ri uwach kuyaʼo.
18 Jun utz cheʼ kbʼan taj kuya uwach ri man utz taj y jun qʼayinaq cheʼ kbʼan taj kuya utz taq uwach.
19 Ri cheʼ ri kuya ta utz uwach kket bʼik y kkʼaq pa ri qʼaqʼ.
20 Rumal riʼ, kiwetaʼmaj kiwach ri achijabʼ ri kkijaluj kibʼ chi e profetas rukʼ ri kkibʼano.*
21 »E juntir ta ri winaq keʼok pa ri Qʼatbʼal tzij re ri kaj* paneʼ ‹Wajaw, Wajaw› kecha chwe, xaq xiw keʼok ri kkibʼan ri utz kril ri Nutat kʼo chilaʼ chikaj.
22 Pa riʼ ri qʼij e kʼi kebʼin na chwe: ‹Wajaw, Wajaw xqakoj ya ri abʼiʼ are taq xqabʼan profetizar, are taq xeqesaj demonios y are taq xqabʼan kʼi milagros›.
23 Pero in kinbʼij na chke: ‹¡Chixel bʼi chnuwach, wetaʼm ta iwach, xa ix bʼanal taq kʼax!›.
24 »Rumal riʼ, ri e winaq ri kkitatabʼej y kkinimaj ri nubʼim kejunamataj rukʼ jun achi ri kʼo unojibʼal ri xuyak ri rachoch puwiʼ jun nimalaj abʼaj.
25 Xqaj ri jabʼ, xnimar kiwach taq ri jaʼ y xpe jun nimalaj kaqiqʼ, xkiyikopisaj* ri ja pero ri ja xyojyobʼ taj rumal che puwiʼ jun nimalaj abʼaj bʼanom wi ri uxeʼ.
26 Ri e winaq ri kkitatabʼej ri nubʼim, pero kkinimaj taj kejunamataj rukʼ jun achi ri kʼo ta unojibʼal ri xa puwiʼ sanyabʼ xuyak wi ri rachoch.
27 Xqaj ri jabʼ, xnimar kiwach taq ri jaʼ, xpe jun nimalaj kaqiqʼ y xkiyikopisaj ri ja..., kyojojik xbʼe ri ja y xsach uwach».
28 Are chiʼ ri Jesús ukʼisom chi ubʼixik ri jastaq riʼ, sibʼalaj xemayin e juntir ri tajin ketatabʼenik rumal ri xubʼan che kitijoxik,
29 rumal che xeʼutijoj rukʼ ri taqanik yaʼom pa uqʼabʼ rumal ri Dios, junam ta kukʼ ri escribas.
Notas
^ Pa nikʼaj chi lugar jewaʼ kbʼix che: «utonotoxik».
^ Pa ri idioma griego, «sachbʼal wachaj».
^ Pa nikʼaj chi lugar jewaʼ kbʼix che: «e karneʼl».
^ Pa ri idioma griego, «ri kiwach kkiyaʼo».
^ Pa ri idioma griego, «ri kiwach kkiyaʼo».
^ O «ri Reino re ri kaj».
^ Pa nikʼaj chi lugar jewaʼ kbʼix che: «xkislabʼisaj».
